ናብ ትሕዝቶ ኺድ

ናብ ተወሳኺ ዝርዝር ኪድ

ናብ ትሕዝቶ ኺድ

ናይ የሆዋ መሰኻኽር

ትግርኛ

ብስራት ኣምላኽ

 ትምህርቲ 2

ኣምላኽ መን እዩ፧

ኣምላኽ መን እዩ፧

1. ንኣምላኽ ከነምልኾ ዘሎና ስለምንታይ ኢና፧

እቲ ናይ ሓቂ ኣምላኽ፡ ፈጣሪ ዅሉ ነገራት እዩ። ንሱ መጀመርታ ዀነ መወዳእታ የብሉን። (መዝሙር 90:2) ምንጪ እቲ ኣብ መጽሓፍ ቅዱስ ዚርከብ ብስራት ድማ ንሱ እዩ። (1 ጢሞቴዎስ 1:11) ንሱ ህይወት ስለ ዝሃበና፡ ንዕኡ ጥራይ ከነምልኾ ይግባእ።ራእይ 4:11 ኣንብብ።

2. ኣምላኽ ከመይ ይመስል፧

ኣምላኽ መንፈስ ስለ ዝዀነ፡ ማለት ካብቶም ኣብ ምድሪ ዚነብሩ ፍጡራት እተፈልየን ዝለዓለን ዓይነት ህይወት ስለ ዘለዎ፡ ርእይዎ ዚፈልጥ ሰብ የልቦን። (ዮሃንስ 1:18፣ 4:24) ይኹን እምበር፡ ንባህርያት ኣምላኽ፡ ኣብቲ ንሱ ዝፈጠሮ ነገራት ክንርእዮ ንኽእል ኢና። ንኣብነት፡ እቲ እተፈላለየ ዓይነት ፍረታትን ዕምባባታትን ብዛዕባ ፍቕርን ጥበብን ኣምላኽ ይነግረና እዩ። ግዝፊ ዩኒቨርስ ከኣ፡ ብዛዕባ ሓይሊ ኣምላኽ ይነግረና እዩ።ሮሜ 1:20 ኣንብብ።

መጽሓፍ ቅዱስ ምስ እነንብብ፡ ብዛዕባ ባህርያት ኣምላኽ ብዝያዳ ኽንመሃር ንኽእል ኢና። ንኣብነት፡ መጽሓፍ ቅዱስ፡ ኣምላኽ እንታይ ከም ዚፈቱን እንታይ ከም ዚጸልእን፡ ንደቂ ሰብ ብኸመይ ከም ዚሕዞም፡ ከምኡውን ኣብ እተፈላለየ ዅነታት እንታይ ዓይነት ምላሽ ከም ዚህብ ይነግረና እዩ። መዝሙር 103:7-10 ኣንብብ።

3. ኣምላኽ ስም ኣለዎዶ፧

የሱስ፡ “ኣብ ሰማያት እትነብር ኣቦና፡ ስምካ ይቀደስ” በለ። (ማቴዎስ 6:9) ኣምላኽ እተፈላለየ መዓርጋት እኳ እንተ ኣለዎ፡ ሓደ ስም ጥራይ እዩ ዘለዎ። ስሙ በብቛንቋኡ እተፈላለየ ኣደማምጻ እዩ ዘለዎ። መብዛሕትኡ ግዜ፡ ብትግርኛ፡ “የሆዋ” ተባሂሉ ይጽዋዕ። ስም ኣምላኽ ኣብ እተፈላለየ መዝገበ ቓላት ትግርኛ ኽንረኽቦ ንኽእል ኢና። ንኣብነት፡ ኣብቲ ብ1999 እተሰናደወ ዘመናዊ መዝገበ ቓላት ትግርኛ፡ “ጀሆቫህ” ወይ “የሀዋህ” ዚብል ንረክብ ኢና። ኣብ መብዛሕትኡ ናይ እንግሊዝኛ መጽሓፍ ቅዱስ እውን ኣብ እተፈላለየ ጥቕስታት ክንረኽቦ ንኽእል ኢና።መዝሙር 83:18 ኣንብብ። *

 ሓያሎ ትርጕማት መጽሓፍ ቅዱስ፡ ንስም ኣምላኽ፡ እግዚኣብሄር፡ ጐይታ፡ ወይ ኣምላኽ ብዚብል መዓርጋት ተኪኦምዎ እዮም። መጽሓፍ ቅዱስ ኪጸሓፍ ከሎ ግና፡ ስም ኣምላኽ ዳርጋ 7,000 ሳዕ ተጠቒሱ ነበረ። የሱስ ንሰባት ብዛዕባ ቓል ኣምላኽ ኪገልጸሎም ከሎ፡ ስም ኣምላኽ ከም ዚፍለጥ ገይሩ እዩ።ዮሃንስ 17:26 ኣንብብ።

4. የሆዋ ይሓልየልና ድዩ፧

ኣምላኽ ልክዕ ከምዚ ፈቃር ኣቦ እዚ፡ ምእንቲ ነባሪ ረብሓና እዩ ዚዓዪ

ብዙሕ መከራ ምህላዉ፡ የሆዋ ብዛዕባና ዘይሓሊ ኣምላኽ ከም ዝዀነ ዜርኢ ድዩ፧ ገሊኦም ሰባት፡ ኣምላኽ ምእንቲ ኺፍትነና ኢሉ ኸም ዜሳቕየና እዮም ዚሓስቡ፣ እዚ ግና ሓቂ ኣይኰነን።ያእቆብ 1:13 ኣንብብ።

ኣምላኽ ንደቂ ሰብ፡ ናይ ምምራጽ ናጽነት ብምሃብ ኣኽቢርዎም እዩ። ንኣምላኽ ብዛዕባ ምግልጋል፡ ናይ ምምራጽ ናጽነት ዘሎና ምዃኑስ ኣይተማስወሉንዶ፧ (እያሱ 24:15) ኣዝዩ ብዙሕ መከራ ኺህሉ ዝኸኣለ፡ ብዙሓት ሰባት ኣብ ልዕሊ ኻልኦት እከይ ስለ ዚገብሩ እዩ። ከምዚ ዝኣመሰለ ግፍዒ፡ ንየሆዋ የጕህዮ እዩ።ዘፍጥረት 6:5, 6 ኣንብብ።

የሆዋ ብዛዕባና ዚሓሊ ኣምላኽ እዩ። ተሓጒስና ኽንነብር ይደልየና እዩ። ድሕሪ ሓጺር ግዜ፡ ንመከራን ነቶም መከራ ዜምጽኡ እኩያትን ኬጥፍኦም እዩ። ክሳዕ ሽዑ ግና፡ የሆዋ፡ መከራ ንእተወሰነ እዋን ኪቕጽል ዝፈቐደሉ ብቑዕ ምኽንያት ኣለዎ። ኣብ ትምህርቲ 8፡ እቲ ምኽንያት እንታይ ምዃኑ ኽንመሃር ኢና።2 ጴጥሮስ 2:9፣ 3:7, 13 ኣንብብ።

5. ናብ ኣምላኽ ክንቀርብ እንኽእል ብኸመይ ኢና፧

የሆዋ ብጸሎት ኣቢልና ኽንቀርቦ ዓዲሙና እዩ። ንነፍሲ ወከፍና በብውልቂ ይግደሰልና እዩ። (መዝሙር 65:2፣ 145:18) ይቕረ ኺብለልና ድሉው እዩ። ሽሕ እኳ ሓድሓድ ግዜ እንተ ወደቕና፡ ነቲ ንዕኡ ንምሕጓስ ኢልና እንገብሮ ጻዕሪ የስተብህለሉ እዩ። ስለዚ፡ ዘይፍጽምና እናሃለወና ኽነሱ፡ ምስ ኣምላኽ ጥብቂ ርክብ ኪህልወና ይኽእል እዩ።መዝሙር 103:12-14፣ ያእቆብ 4:8 ኣንብብ።

የሆዋ፡ ህይወት ስለ ዝሃበና፡ ካብ ዝዀነ ይኹን ንላዕሊ ኸነፍቅሮ ኣሎና። (ማርቆስ 12:30) ብዛዕባ ኣምላኽ ዝያዳ ትምህርቲ ብምቕሳምን ፍቓዱ ብምፍጻምን ናብ ኣምላኽ ብዝያዳ ኽትቀርብ ትኽእል ኢኻ።1 ጢሞቴዎስ 2:4፣ 1 ዮሃንስ 5:3

^ ሕ.ጽ. 4 “ንስኻ፡ ጐይታ [“የሆዋ፡” NW] ዝስምካ፡ በይንኻ ኣብ ልዕሊ ዅሉ ምድሪ ልዑል ከም ዝዀንካ፡ ይፍለጡ።”

ዝያዳ ፍለጥ

ብስራት ኣምላኽ

ኣምላኽ ስም ኣለዎዶ፧

ኣምላኽ ብዙሕ መዓርጋት ኣለዎ፣ ንኣብነት፡ ኵሉ ዚኽእል፡ ፈጣሪ፡ ጐይታ ይብሃል እዩ። ብሕታዊ ስም ኣምላኽ ግና ኣብ መጽሓፍ ቅዱስ ልዕሊ 7,000 ሳዕ ተጠቒሱ ይርከብ።