ዚርከበሉ ኣገባብ ኣዐሪ

ቋንቋ ምረጽ

ናብ ተወሳኺ ዝርዝር ኪድ

ናብ ትሕዝቶ ኺድ

ናይ የሆዋ መሰኻኽር

ትግርኛ

ብቛንቋ ኣደ መጽሓፍ ቅዱስ ንምድላው እተገብረ ጻዕሪ

ብቛንቋ ኣደ መጽሓፍ ቅዱስ ንምድላው እተገብረ ጻዕሪ

ናይ የሆዋ መሰኻኽር ነቲ መጽሓፍ ቅዱስ—ትርጉም ሓዳስ ዓለም ዚብሃል ትርጉም፡ ኬንብቦ ንዚደሊ ዘበለ ሰብ ይህብዎ እዮም።

ብቢልዮናት ዚቝጸር መጽሓፍ ቅዱሳትን ብዙሕ ዓይነት ትርጉማት መጽሓፍ ቅዱስን ብእተፈላለየ ማሕበራት መጽሓፍ ቅዱስ እኳ እንተ ተሓትመ፡ ብዙሓት ሰባት ግና ብሰንኪ ድኽነት ወይ ብሰንኪ ሃይማኖታዊ ኣድልዎ ብቛንቋኦም መጽሓፍ ቅዱስ ኣይረኽቡን እዮም። በዚ ምኽንያት እዚ፡ ናይ የሆዋ መሰኻኽር ንትርጉም ሓዳስ ዓለም ብ115 ቋንቋ ኣዳልዮምዎ ኣለዉ።

ገለ ኻብቶም በዚ እተጠቕሙ ኣብነታት እስከ ንርአ፦

  • ሩዋንዳ፦ ሲልቨስትርን ቨናንቲን ዚብሃሉ ኣርባዕተ ውሉዳት ዘለውዎም ሰብ ሓዳር ከምዚ ይብሉ፦ “ንሕና ድኻታት ኢና፣ ስለዚ፡ ንነፍሲ ወከፍ ኣባል ስድራ ቤትና መጽሓፍ ቅዱስ ክንዕድግ ኣይንኽእልን ኢና። ሕጂ ነናትና ቕዳሕ ትርጉም ሓዳስ ዓለም ብኪንያሩዋንዳ ኣሎና፣ መዓልቲ መዓልቲ ድማ ንመጽሓፍ ቅዱስ ብሓባር ነንብቦ ኣለና።”

    ሓደ ኣብታ ሃገር እቲኣ ዚነብር ቀሺ ኣንግሊካን ከኣ፡ “እዚ ኽርድኦ ዝኽእል መጽሓፍ ቅዱስ እዩ። ካብቲ ኽሳዕ ሕጂ ዘንበብክዎ ኻልእ መጽሓፍ ቅዱሳት ኣጸቢቑ ዝሓሸ እዩ። ናይ የሆዋ መሰኻኽር ብሓቂ ንሰባት ይሓልዩሎም እዮም” በለ።

  • ደሞክራሲያዊት ሪፓብሊክ ኮንጎ፦ ገሊአን ኣብያተ ክርስትያን በቲ ኣብታ ሃገር ብዙሕ ተዛራቢ ዘለዎ ቛንቋ ሊንጋላ ዚርከብ መጽሓፍ ቅዱስ ንናይ የሆዋ መሰኻኽር ምሻጥ ኣብየን እየን።

    ትርጉም ሓዳስ ዓለም ብሊንጋላ ኻብ ዚወጽእ ንነጀው፡ ደቂ ኮንጎ ዝዀኑ ናይ የሆዋ መሰኻኽር ነቲ ትርጉም መጽሓፍ ቅዱስ ተሓጒሶም ይጥቀሙሉን ንኻልኦት ይዕድልዎን ኣለዉ። ትርጉም ሓዳስ ዓለም ኣብ ሓደ ናይ የሆዋ መሰኻኽር ዝገበርዎ ኣኼባ ኣብ ዝወጸሉ እዋን፡ ኣብቲ ስታድዩም ዝነበሩ ኣባላት ፖሊስ ተሰሪዖም ሓሓደ መጽሓፍ ቅዱስ ወሲዶም እዮም።

  • ፊጂ፦ ብቛንቋ ፊጂ እተዳለወ መጽሓፍ ቅዱስ ኣዝዩ ኽቡር ብምዃኑ፡ ብዙሓት ናይ የሆዋ መሰኻኽር ብእንግሊዝኛ እተዳለወ ትርጉም ሓዳስ ዓለም ኪጥቀሙ ጸኒሖም እዮም። ብ2009 ግና እቲ ብልምዲ ሓድሽ ኪዳን ተባሂሉ ዚጽዋዕ መጽሓፍ ቅዱስ—ትርጕም ሓዳስ ዓለም (ማቴዎስ-ራእይ) ብቛንቋኦም ረኺቦም።

    ሓደ ሰብኣይ ድማ ንትርጉም ሓዳስ ዓለም በቲ ንጹር ኣተራጕማኡ ስለ ዝፈተዎ፡ ሓደ ቕዳሕ ኪውሃቦ ሓተተ። እቶም ኣብቲ ኸባቢኡ ዝነበሩ ናይ የሆዋ መሰኻኽር ግና፡ እቲ ቐጺሉ እተላእከ መጽሓፍ ቅዱሳት ናብታ ኸተማ ኽሳዕ ዚመጽእ እንተ ወሓደ ሓደ ወርሒ ኺጽበ ኸም ዘለዎ ነገርዎ። እቲ ሰብኣይ ግና ኪጽበ ፍቓደኛ ብዘይምንባሩ፡ ምስ ሓደ ትርጉም ሓዳስ ዓለም ኪህቦ ዚኽእል ዝነበረ ናይ የሆዋ መሰኻኽር ንምርኻብ 35 ኪሎ ሜተር ተጓዕዘ። “እዚ ትርጉም እዚ ኻብቲ ኣዘውቲርና እንጥቀመሉ ኣጸቢቑ ይሓይሽ። ንጹርን ንምርዳኡ ቐሊልን እዩ” ኢሉ እውን ርእይቶኡ ገለጸ።

  • ማላዊ፦ ዳቪደ ምስ ናይ የሆዋ መሰኻኽር ኰይኑ ኼጽንዕ ምስ ጀመረ፡ ኣባላት ማሕበር ባፕቲስት ናብ ቤቱ ኸይዶም፡ ነቲ ዝሃብዎ መጽሓፍ ቅዱስ ኣሕደግዎ። ስለዚ፡ ትርጉም ሓዳስ ዓለም ብቛንቋ ቺቸዋ ምውጻኡ፡ ብዙሕ እዩ ኣሐጒስዎ።

    መጽሓፍ ቅዱስ ኣብ ማላዊ ኣዝዩ ኽቡር ስለ ዝዀነ፡ ዳቪደ ኸመይ ገይሩ ኸም ዜጥሪ ሓርቢትዎ ነይሩ እዩ። ቅዳሕ ትርጉም ሓዳስ ዓለም ምስ ተዋህቦ ግና፡ “ሕጂ ኻብቲ ዝነበረኒ፡ ዝሓሸ መጽሓፍ ቅዱስ ኣሎኒ” በለ።

ልዕሊ 60 ዓመት ይገብር፡ ቀዳማይ ክፋል ትርጉም ሓዳስ ዓለም ኣብቲ ኣብ ከተማ ኒው ዮርክ እተገብረ ኣኼባ ብእንግሊዝኛ ምስ ወጸ፡ ነቶም ተኣከብቲ፡ “ካብ ጫፍ ናብ ጫፍ ኣንብብዎ። ኣጽንዕዎ . . . ንኻልኦት ከኣ ዓድልዎ” ዚብል ምሕጽንታ ተዋህብዎም ነይሩ። ነዚ ዕላማ እዚ ንምውቃዕ፡ ናይ የሆዋ መሰኻኽር ልዕሊ 175 ሚልዮን ቅዳሓት ትርጉም ሓዳስ ዓለም ኣሕቲሞም ኣለዉ። ብዘይካዚ፡ ሕጂ ንመጽሓፍ ቅዱስ ኣብ ኢንተርነት ብልዕሊ 50 ቛንቋ ኸተንብቦ ትኽእል ኢኻ።

 

ብዝያዳ ፍለጥ

ጽሑፋት ናይ የሆዋ መሰኻኽር ዚጸሓፍን ዚትርጐምን ብኸመይ እዩ፧

ጽሑፋት ብልዕሊ 600 ቛንቋታት ንትርጕም ኢና። ስለምንታይ ኢና ኸምኡ እንገብር፧