ኣምላኽ ንሰባት፡ ብዘይ ሕማምን ሞትን ንዘለኣለም ኣብ ምድሪ ንኺነብሩ እዩ ፈጢርዎም። ይኹን እምበር፡ እቲ ቐዳማይ ሰብ፡ ኣዳም፡ ንፈጣሪ ስለ ዘይተኣዘዞ፡ ንዘለኣለም ኪነብር ኣይከኣለን። ንሕና እውን ዘርኢ ኣዳም ስለ ዝዀንና፡ ሞት ወሪስና ኢና። (ሮሜ 5:8, 12፣ 6:23) እቲ ናይ ሓቂ ኣምላኽ ዝዀነ የሆዋ ንወዱ የሱስ፡ ንኺመውትን ነቲ ኣዳም ዘጥፍኦ ህይወት ንኺብጀዎን ኢሉ ናብ ምድሪ ለኣኾ።—ዮሃንስ 3:16 ኣንብብ።

ሞት የሱስ፡ ሓጢኣትና ይቕረ ንኺብሃለልናን ንዘለኣለም ንኽንነብርን መገዲ ኸፊቱ እዩ። መጽሓፍ ቅዱስ፡ እቲ እርጋንን ሕማምን ሞትን ዘይብሉ ኣብ ምድሪ ዚህሉ ህይወት፡ ከመይ ከም ዚመስል ይገልጽ እዩ።—ኢሳይያስ 25:8፣ 33:24፣ ራእይ 21:4, 5 ኣንብብ።

የሱስ ኣብ ድሮ ሞቱ ኣብ ዝነበረት ምሸት፡ ንሰዓብቱ፡ ሕጽር ዝበለ በዓል ገይሮም ንሞቱ ንኺዝክርዎ ነገሮም። ኣብ ዓዓመት ንሞት የሱስ በዚ መገዲ እዚ ምዝካሩ፡ የሱስን የሆዋን ንደቂ ሰብ ክሳዕ ክንደይ ከም ዜፍቅሩና ንኸነስተንትን ይሕግዘና።—ሉቃስ 22:19, 20፣ 1 ዮሃንስ 4:9, 10 ኣንብብ።

ኣብዛ ዓመት እዚኣ፡ ዝኽሪ ሞት የሱስ፡ ሰኑይ 14 ሚያዝያ፡ ጸሓይ ድሕሪ ምዕራባ እዩ ዚውዕል። ምስቶም ኣብ ከባቢኻ ዘለዉ ናይ የሆዋ መሰኻኽር ንኽትእከብ ተዓዲምካ ኣሎኻ።—ሮሜ 1:11, 12 ኣንብብ።