ቅድሚ ገለ ዓመታት ኣብ ኢንዶነዥያ ናብ ሳንጊር በሳር እትብሃል ንእሽቶ ደሴት እንተ ትኸይድ ኔርካ፡ ምናልባት ሰለስተ ክርስትያን ኣሓትና ኣብ ገምገም ባሕሪ ምረኣኻ። እዘን ኣሓት ብኣገልግሎተን እየን ዚፍለጣ፡ ንሰባት መጽሓፍ ቅዱስ ኪምህራ እየን ዚጽዕራ። ኣብቲ ኣጋጣሚ እቲ ግና፡ እተፈልየ ነገር እየን ዚገብራ ነይረን።

ፈለማ፡ ናብቲ ባሕሪ ኸይደን ኣእማን ናብ ገምገም ይጓርታ። ገሊኡ እቲ ኣእማን ግዝፉ፡ ክንዲ ዅዕሶ እግሪ እዩ ዚኸውን። ድሕሪኡ፡ ኣብ ድኳ ኾፍ ኢለን ግዝፉ ከክንዲ እንቋቝሖ ኽሳዕ ዚኸውን ብሞደሻ ይሰባብራኦ። ድሕርዚ፡ ነቲ ኣእማን ኣብ ናይ ፕላስቲክ ሳንኬሎ መሊአን፡ ብመደያይቦ ኣቢለን ናብ ገዛአን ይወስዳኦ። ቀጺለን፡ ነቲ ኣእማን ኣብ ከረጺት ይመልኣኦ፣ እዚ ድማ ብናይ ጽዕነት ማካይን ተጻዒኑ ይውሰድ፡ ንህንጸት መገዲ ኸኣ የገልግል።

ሓንቲ ኻብተን ኣሓት ሁልዳ ትብሃል። ሁልዳ፡ ኵነታታ የፍቅደላ ብምንባሩ፡ ካብተን ካልኦት ንዝነውሐ ሰዓታት ትሰርሕ ነበረት። ኣብ ካልእ ግዜያት በቲ ኻብኡ እትረኽቦ ኣታዊ፡ ንስድራ ቤታ ዜድሊ እያ እተማልእ ነይራ። ኣብቲ ኣጋጣሚ እቲ ግና፡ ተወሳኺ ሸቶ ነበራ። ኣፕሊኬሽን JW Library^® ንምጥቃም ዚሕግዝ ኤለክትሮኒክ ታብለት ኣድልይዋ ነበረ። እቲ ኣብቲ ኣፕሊኬሽን ዚርከብ ቪድዮታትን ካልእ ትሕዝቶን ንኣገልግሎታ ዀነ ነቲ ብዛዕባ መጽሓፍ ቅዱስ ዘለዋ ርድኢት ከም ዜስፍሓላ ትፈልጥ ነበረት።

ሁልዳ ንወርሕን ፈረቓን ንግሆ ንግሆ ኸክልተ ሰዓት ሰርሐት፣ በዚ ኸምዚ፡ ሓንቲ ንእሽቶ ናይ ጽዕነት ማኪና ዚመልእ ኣእማን ሰባበረት። ኣብ መወዳእታኡ፡ ታብለት ንምዕዳግ ዜኽእላ ገንዘብ ረኸበት።

ሁልዳ ኸምዚ ትብል፦ “ሰብነተይ ብሰንኪ እቲ ምስብባር ኣእማን እኳ እንተ ደኸመን እንተ ቘሰለን፡ እዛ ሓዳስ ታብለት ኣብ ጉባኤን ኣገልግሎትን ብዝያዳ ውጽኢታዊት ክኸውንን ንክርስትያናዊ ኣኼባታት ብቐሊሉ ኽዳሎን ምስ ኣኽኣለትኒ፡ ንዅሉ እቲ ስቓየይ ብቐሊሉ እየ ረሲዐዮ።” ብዘይካዚ፡ ኣብ መጀመርታ ኽፋል እቲ ለበዳ፡ እታ ታብለት ብዙሕ ከም ዝሓገዘታ ትገልጽ። ከመይሲ፡ ኵሉ ንጥፈታት ጉባኤ ብኢንተርነት እዩ ዚካየድ ነይሩ። ሁልዳ ሸቶኣ ምውቃዓ ኣዝዩ ዜሐጕስ እዩ።