ንስኻን መጻምድትኻን ሓዳር ክትጅምሩ ኸለኹም፡ ብዙሕ ጸገማት የጋጥመኩም ይኸውን። እዚ ኸኣ፡ ኣተሓሳስባኹምን ስምዒታትኩምን ኣተዓባብያኹምን እተፈላለየ ስለ ዝዀነ ኪኸውን ይኽእል እዩ። ወይ ከኣ፡ ካብ ሓዳርኩም ወጻእን ብሰንኪ ሃንደበታዊ ፍጻመን ጸገም ኬጋጥም ይኽእል እዩ።

ጸገም ኬጋጥመካ ኸሎ፡ ካብኡ ኽትሃድም ትፍተን ትኸውን፣ ግናኸ መጽሓፍ ቅዱስ ነቲ ጸገም ክትፈትሖ እዩ ዚመኽረካ። (ማቴዎስ 5:23, 24) ንስርዓታት መጽሓፍ ቅዱስ ብምትግባር፡ ንጸገማትካ ዝበለጸ መፍትሒ ኽትረኽበሉ ትኽእል ኢኻ።

መጽሓፍ ቅዱስ እንታይ ይብል፧ “ንምዝራብ . . . ግዜ ኣለዎ።” (መክብብ 3:7) ንመጻምድትኻ፡ ግዜ ወሲድካ ብዛዕባ እቲ ጸገም ኣዘራርቦ። ብዛዕባ ስምዒትካን ርእይቶኻን ድማ ብቕንዕና ንገሮ። ኵሉ ሳዕ ‘ሓቂ ተዛረብ።’ (ኤፌሶን 4:25) ሕማቕ እኳ እንተ ተሰምዓካ፡ ከይትቋየቝ ተጠንቀቕ። ህዱእ ምላሽ፡ ምይይጥኩም ናብ ባእሲ ምእንቲ ኸይልወጥ ይሕግዝ እዩ።—ምሳሌ 15:4፣ 26:20።

ዋላ እውን እንተ ዘይተሰማማዕኩም፡ ንመጻምድትኻ ፍቕርን ኣኽብሮትን ከተርእዮ ኸም ዘሎካ ኣይትረስዕ፣ ዘረባኻ ድማ ጥዑም ይኹን። (ቈሎሴ 4:6) ውዓል ሕደር ከይበልካ ነቲ ጕዳይ ክትፈትሖ ጽዓር፣ ምስ መጻምድትኻ እሂን ምሂን ካብ ምብህሃል ድማ ዓዲ ኣይትውዓል።—ኤፌሶን 4:26።

እንታይ ክትገብር ትኽእል፧

• ምስ መጻምድትኻ ብዛዕባ ዘጋጠመኩም ጸገም እትዘራረቡሉ ግዜ መድብ

• ክትሰምዕ ተራኻ እንተ ዀይኑ፡ ንመጻምድትኻ ኸይተቋርጾ ተጠንቀቕ። ተራኻ ምስ ኣኸለ ተዛረብ

መጽሓፍ ቅዱስ እንታይ ይብል፧ “ንሓድሕድኩም ካብ ልቢ ተፋቐሩ። ንሓድሕድኩም ኣብ ምክብባር ቀዳሞት ኩኑ።” (ሮሜ 12:10) እትሰምዓሉ መገዲ ኣዝዩ ኣገዳሲ እዩ። ንኣረኣእያ መጻምድትኻ ‘ብድንጋጽን ብትሕትናን’ ክትርድኦ ፈትን። (1 ጴጥሮስ 3:8፣ ያእቆብ 1:19) ዘይትሰምዕ ክነስኻ፡ ትሰምዕ ከም ዘለኻ ኣይተምስል። ዚከኣል እንተ ዀይኑ፡ ነቲ እትገብሮ ዝነበርካ ዕዮ ኣቋሪጽካ፡ ምሉእ ኣቓልቦኻ ኣብ መጻምድትኻ ግበር፣ ወይ ከኣ፡ ንመጻምድትኻ፡ ነቲ ጕዳይ ጸኒሕኩም ክትዘራረቡሉ ትኽእሉ እንተ ዄንኩም ሕተቶ። ንመጻምድትኻ ኸም ተጻራሪኻ ዘይኰነስ፡ ከም ብጻይካ ጌርካ ትርእዮ እንተ ዄንካ፡ ‘ንዅራ ኣይክትህወኽን’ ኢኻ።—መክብብ 7:9።

እንታይ ክትገብር ትኽእል፧

• ዋላ እውን እቲ እትሰምዖ ዘለኻ ነገር ባህ እንተ ዘይበለካ፡ ጽን ኢልካ ብኽፉት ኣእምሮ ስማዕ

• መጻምድትኻ ንዚዛረቦ ቓላት ጥራይ ዘይኰነስ፡ ኬመሓላልፎ ንዝደለዮ መልእኽቲ እውን ኣስተብህለሉ። ንኣካላዊ ምንቅስቓሱን ንቓና ድምጹን እውን ኣቕልበሉ

መጽሓፍ ቅዱስ እንታይ ይብል፧ “ኣብ ኵሉ ዓይነት ከቢድ ዕዮ ጥቕሚ ኣሎ፣ ዘረባ ጥራይ ግና ናብ ስእነት ይመርሕ።” (ምሳሌ 14:23) ጽቡቕ መፍትሒ ምርካብ ጥራይ እኹል ኣይኰነን። ነቲ ኽልቴኹም ዝወሰንኩምዎ ኽትትግብርዎ ኣሎኩም። እዚ ኸኣ ከቢድ ዕዮን ጻዕርን ዚሓትት እኳ እንተ ዀነ፡ ጻማ ኣለዎ። (ምሳሌ 10:4) ምስ መጻምድትኻ ብሓባር ኴንኩም ትዓይዩ እንተ ዄንኩም፡ ካብ ጻዕርኹም “ጽቡቕ ጻማ” ኽትረኽቡ ኢኹም።—መክብብ 4:9።

እንታይ ክትገብር ትኽእል፧

• ነፍሲ ወከፍኩም ነቲ ጸገም ንምፍታሕ እንታይ ተግባራዊ ስጕምቲ ኸም እትወስዱ ወስኑ

• ሓሓሊፍኩም ነቲ ዝገበርኩምዎ ምምሕያሽ ገምግምዎ