“Aitelekarit kere kodunyakis noi aminanara, naraai erapari amina adiakanareta nukepuak.”—1 Petero 4:8

Neigeunia ijo ka nowaikon aijar kus nepepe, epote atiokisio nuegelegela atakanun. Epedorete ngun atakanun naarai mam aomisio, eipud, keda eipone lokaijar eputosi. Arai bonat epedorete atiokisio ngun abunere okinga naka ekalekus keda nuengesununos kotoma aijar.

Epedorete nu ainakin ijo ainac ationis ngin, konye kotoma Obaibuli kisinyikokinitai oni atereikin kede atiokisio wok. (Matayo 5:23, 24) Arai kitosom ijo ipiteno luka Ebaibuli ibuni ijo adumun aicoreta nuepedorete aingarakin ijo aipikor atiokisio kon.

 1 KOMORUTU ATIONIS

NUEBALA EBAIBULI: “Ejai . . . apak naka einer.” (Ekalimonokinan 3:1, 7) Ekoto ijo aanyun ebe kiyangaikini apak einer nuikamunitos ationis. Kotoma abeit ekoto yenowaikon kojeni eipone loipupio ka nuiwoomomoi ijo kanu ikamunitos atiokisio kus. ‘Kinerenenas’ abeit keda yenowaikon. (Ipeson 4:25) Arai da epol anyunyura, kitikok etau loekoto ejie. Abongokinet kon naejok, etikokini ecelet loepedori ayaun ejie.—Awaragasia 15:4; 26:20.

Karaid da ipegakinos yes, kosalakisi imorikikina, mam ijalakinete aminanar ka ayonganar kokale. (Ikolosain 4:6) Kitemokisi atiokisio kus katipet, mam ipalarete einer.—Ipeson 4:26.

NUIPEDORI IJO ASWAM:

  • Kodumutu apak aimor aitiokisio kus

  • Ne eraar akon apak aipup, koany ebe mam kitolitoli yenice. Idumuni ijo da apak na einer

 2 KOPUPOK KOSODI AMISIKIN

NUEBALA EBAIBULI: “Kotoma amin naka einacane, kominanaros bonik ka bonik. Kotoma aibuses kitopoloorite ŋinituŋanan aupake.” (Iromayon 12:10) Eipone loipupio ijo erai ibore yen epol noi. Kotamak amisikin akiro ayenowaikon keda “asianut . . . ka aitasono da.” (1 Petero 3:8; Yakob 1:19) Mam irai loisidiki aipup. Arai ejai ibore yen kiswamai ijo, kinyeik ber kosodi aijaikin yenowaikon apak, arai mam kingitu yenowaikon arai ipedorete amorun ngun ekaulo. Arai kisesen ijo yenowaikon kwape yen kiswamatar ijo nepepe mere yen asurup, mam ijo ibuni “aisunyakin anyunyurikin.”—Ekalimonokinan 7:9.

NUIPEDORI IJO ASWAM:

  • Kinyikok apupenen kede etau loejok, araida mam nuipupi ijo eraas nuitalakarete

  • Kopupok akiro nuinerai. Kosesen eipone loinerar yenowaikon

3 KOTUPITE

NUEBALA EBAIBULI: “Ejai ameda toma aitaaritoi kere: Konye ailabilabanut eyauni aibabanitoi.” (Awaragasia 14:23) Acamanar kotoma aomisio nuejokuka mam erai ibore yen edolit bon. Ibusakinit yes atupakin nuidautu acamanar. Epote nu aimoriarit aswam kagogong, konye eraunete nu ameda. (Awaragasia 10:4) Karai iswamata yesi nepepe, “kijaas  keropit loejok” kanu akus aswam.—Ekalimonokinan 4:9.

NUIPEDORI IJO ASWAM:

  • Koseutu nuinyoika ipedorete yesi aitup kanu aitemokin atiokisio

  • Kangin paran, koany ebe ejai ibore yen ejok yen atakanu