Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Epedori Ekale Kon Araun Loiyalama

 ATUTUBET 6

Eipone Loijulakinatar Idwe Edukone

Eipone Loijulakinatar Idwe Edukone

“Idwe kes airumet naka Ejakait.”—Isabulin 127:3

Aurunio na ikoku epedori araun naiyalama ka ailel kanejaas luedukokina. Kwape iuriak luitetiak, ibuni ijo aumokin ebe apak ka agogong kon naepol ebuni alosit aidar ikokukon. Aijulujuleta nuka ejautene kede amamus ajotoenen ebuni ayangaun akudian toma odukone. Ijo keda nowaikon ekoto yesi adumun eipone loiswamatar aijulujuleta nuepedorete aingarakin yesi aidar ikoku tetere edukone kus eyuar. Eipone bo ani epedoriata aicoreta nuka Ebaibuli aingarakin ijo atitingikin ainingosia?

 1 KOMISIK EIPONE LOIJULAKINIA IKOKU AIJAR KUS

NUEBALA EBAIBULI: “Eŋirikinit amin, esiana amin.” Bobo da, “mam amin emoot nuke bon, mam itunyunyurikinio.” (1 Ikorinton 13:4, 5) Kwape toto naitetet, imina duc aibuaikin aomisio kon kere nejai ikonikoku. Araida ejaas ngun, emina ekiliokit kon agear awomite ebe mam ijo kwana ipodokinit nges, aso mam imurokini ijo ebe nges da ekoto apak kon. Arai itosom ijo atiting keda asianut, ipedori ijo aingarakin nges ajenun ebe ipodokinit ijo nges ido ikotosi yesi kere aitopoloun ikoku.

“Yes da ikiliok . . . kiboienenete kakusiŋor koomito nukec.” (1 Petero 3:7) Kojenu ebe ebuni aberukon adaikin agogong ke naepol aidar ikoku kon. Ejaas nges keda aswamusinei nuelangirikitos ka aomisio da nuipu. Ice sawan, emina akadakin konye kotamak asalakin irai loititing, naarai “ŋol loiyap anyunyurikin ejok aitelekarit ikagogoŋok.” (Awaragasia 16:32) Kitodu acobeu, ido kijaik nowaikon agangat naibusakinit nges.—Awaragasia 14:29.

NUIPEDORI IJO ASWAM:

  • Lukapapa: Kingarakitos angor kus aidar ikoku, araida kuare. Kitidisia apak kon naidaikinit aswamusinei ace tetere idumuni apak naiboio ka aberu kon keda aidar ikoku

  • Lukatoto: Ne ekotor okilenikon aingarakin ijo aidar ikoku, kocam aingarakinio ke. Arai mam epedori aswam ejok, mam kitoroni nges, konye kotoma asianut kitodik nges eipone loiswamaere

 2 KITOGOGONG EDICANE KON

NUEBALA EBAIBULI: “Koraut adiopekuan.” (Ageun 2:24) Karaida ejai itunganan yenitetet okale kus, kiitutu ebe ijo keda nowaikon irokosi yesi iraas “adiopekuan.” Kiswamata nuipedorete kere aanyun ebe esalakini edicane kus erai loegogong.

Angor, kiyalamasi kanu aingaranakinio naka ikiliok kus. Aitodun aiyalama kus epedori araun “naitaŋaleuni.” (Awaragasia 12:18) Ikiliok, kolimonokisi angor kus eipone loiminatar yesi kapodokinite kesi. Kisialamik nges kanu aidar ekale.—Awaragasia 31:10, 28.

“Sirikemo ituŋanan akejokis bon, konye naka lucekeŋ.” (1 Ikorinton 10:24) Kiswamaenenei nuisialamikinete nowaikon. Kwape luedukokina, koyangainikinete apak kinerasi, aisialamikin, keda apupokin yenice inera. Kopodokinite ejautene kayenowaikon nedolunia eipud lokayelo. Bobo da kopodokinite akote kayenowaikon. Ebala Ebaibuli ebe: “Sirimikanaros bonik, alemar diat icamanaros adaun apak.” (1 Ikorinton 7:3-5) Aso iboikinos komorutu akiro kus yesi iarei bon. Amisikin ka atitingikin ebuni aitigogong edukone kus.

NUIPEDORI IJO ASWAM:

  • Mam kimurokinete adumun apak kanu yesi iarei

  • Kiswamaenen iboro karaida eraas ludidik luitodunitos ebe imina ijo nowaikon, kwape nat aijukar akiro kosimukon, araibo aijaikin ainakinet adio kere

 3 KISISIANAK IKONIKOKU

NUEBALA EBAIBULI: ‘Ameun kaiditeu ibu kojen nuiwadikatai nukalaunak, nuepedorete aitocoun jo kiton aitajario.’ (2 Timoteo 3:15) Kitemonok sek nuikoto ijo aisisianakin ikoku kon. Ejaas nges kede apedor naejok kanu aisisia, araida eroko euruna. Karaida eroko ejai akoik, epedori ikokukon amisikin eporoto ka eipud kon. Kosiomanak nges eroko erai imukeru. Arai da mam epedori amisikin nuisiomi ijo, epedorete ngun aingarakin nges aisiom epolor.

Mam ikoku kon karaida edit ekurokini aipup ijo kinera nuikamunitos Edeke. Kojalak nges kopup ijo kilipi nejai Yawe. (Ikisila 11:19) Karaida neiboliatar yesi nepepe, kinerata nuikamunitos iboro luesubit Edeke. (Isabulin 78:3, 4) Kepolou ikon ikoku, ebuni aanyun eipone loiminar ijo Yawe kosodi nges da aswam kwapekwangin.

NUIPEDORI IJO ASWAM:

  • Kilip acoa kanu aitutuor ikon koku

  • Kinyogoinikini aomisio kakiro nuepolok tetere ingarakinete nges aisisia eroko edit