“Konapenenete . . . asianut, aitasono, aiyapepera, keda atitingikin.”—Ikolosain 3:12

Esubi edukone ekale loitetet. Karaida duc imina ijo ido koyongite iuriak kon, aberu kon kwana nges erai ibore yen epol noi akwap kaneijai ijo. Epedorete nu araun ibore yen etionikinit ipajan kon acamun. Konye epedorete ipiteno luka Obaibuli aingarakin ijo adumun eipone loitiriana akiro ngun, tetere ijo ipedori aidar aipuc kanejaas ipajan kon ido kicasite kagogong adukun eidicane okale kon loitetet.

 1 KOMINA IPAJAN KON

NUEBALA EBAIBULI: “Koyoŋite papakon ka totokon.” (Ipeson 6:2) Karaida ipol ijo arai mam, ibusakinit ijo ayoŋite ka arimarit iuriak kon. Koany ebe yenowaikon da, kwape eraar nges esapat araibo apese, edolit do nges da ayongite iuriak ke. “Amin mam ikokoteono” aso mam idumuni aitukuriano kede eipone loeminar yenowaikon kesi.—1 Ikorinton 13:4; Igalatian 5:26.

NUIPEDORI IJO ASWAM:

  • Kinac einer akiro, kwape nat “Lukokale kon duc ereunitos eong” araibo “Totokon da mam emina nueswamai eong”

  • Kotam ber ijo asesen iboro kwape esesenio yenowaikon

 2 KORAI LOIGOGONG

NUEBALA EBAIBULI: “Ŋes inyeinia ekiliokit papake ka totoke, kiketakin neejai akeberu: koraut adiopekuan.” (Ageun 2:24) Ne idukokinor ijo, epedorete iuriak kon aomite ebe kesi erokosi itanete ijo, aso eminasi okotokinos ayaite nukokale kon.

Ijo keda nowaikon ibusakinit ainerun nebeit iuriak kus ainang kotoma apedorosio kec kosodete yesi aitosom amina aitijenikin kesi. Ipedorite yesi alimokin kesi abeit nuikamunitos nu, komam idedeng. (Awaragasia 15:1) Aiyapepera, asianut, keda atiting nesi epedorete aingarakin ijo adukun eidicane keda ikon ipajan ka ainyikokin “aŋirionokin kotoma amin.”—Ipeson 4:2.

NUIPEDORI IJO ASWAM:

  • Arai iwomit ijo ebe itokokolete ipajan aijar kus nakokale, komorutu nu kotoma apak naibusakinit

  • Komorutu aomisiot nairiamara koipone loebeitor yesi aitolot akiro ngun