Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika Bo Cut Nuisisianakini Ebaibuli?

NUIYATAKINITAI

Konye Ejaatar Kereka Itunga Ibore Yen Mam Etakani Ido Komam Etwani?

Konye Ejaatar Kereka Itunga Ibore Yen Mam Etakani Ido Komam Etwani?

ITUNGA luipu iyunitos ebe ejaatar ibore yen mam etakani ido komam etwani. Eomitos ebe katwanare, ibore yen mam etakani, inyeikini akuan kosodi alosit aijar nenice. Kwape ejenar aiyuun na noi, luipu aumokisi aisisaun ebe mam cut eraasi nuisisianakini Ebaibuli. Aso anyoika bodo ebala Akirot naka Edeke etakanikinete oni neitwania?

AKIRO NE’PHESH KA PSY.KHE’ KWAPE ITOSOMATER KOTOMA EBAIBULI

Ipedori ijo aticepak aitun ebe ewadikaitai Ebaibuli kageunet Kaburanian kede Kayonanin. Akirot ne’phesh naka Aburanian ka psy.khe’ naka Ayonanin nuitosomatai Obaibuli, kesi ijulitai Obaibuli loka Ateso kwape etau. Mam na erai aijul na abeit. Akiro ne’phesh ka psy.khe’ ejaasi toma Obaibuli adepar irwan 800 ido apolou kec nges (1) itunga, (2) itiang, araibo (3) aijar na ejaatar ituŋanan araibo etiang. Aso kaanyutu ber oni awadikaeta nuka Ebaibuli ace nuitodunitos akiro nu auni.

Itunga. “Apaarasia nuka Noa,…kama etajarere ituŋa idis, kotoma akipi, kes ituŋa ikanykauni [psykhe′].” (1 Petero 3:20) Kane akirot naka Ayonanin psy.khe’ ijulakinitai kwape ituŋa—ido itodunit Noa, aberuke, odweke iuni, kaŋorokec. Elimunit Anyoun 16:16 aicoreta nuejaikinitai itunga luka Isirael nuekamunitos atukonokonio naka emanu. Ecorakinitai kesi ebe: “Kotukonok ŋinituŋanan…kwape ejaar etiai loka ituŋakus [Kaburanian, ne’phesh] ŋinituŋanan einari lukowemake.” Atukokino emanun kotupitete etiai loka ne’phesh araibo itunga luka ekale.

Itiang. Kakiro nuka Ebaibuli nuka asubio, kisiomi oni ebe: “Kobala Edeke ebe: ‘Kilweka akip lueliatos luipu luejaas aijar,ido koporitos akweny kokuju kakwap toma apak naka akuj…ibaren [Kaburanian, ne’phesh], ka yeneliat, etiaŋ loka akwap koponeke.’ Kojau kwaŋin.” (Ageun 1:20, 24) Kakiro kanu, enyaritai lukecor, ibaren ka itiaŋ luka ais kere kakirot adiopet ne′phesh.

Aijar kwape etunganan. Ne′phesh Kaburanian ka psy·khe′ Kayonanin acepakio erai apolou kec aijar na ejaar itunganan. Ne ajaar Rakel aidoun ikekoku Bejamin, ebala Ebaibuli ebe: “Kosodi kanen, keapu akeijar [ne’phesh] adaun (naarai abu kotwana).” Kapak kangin, kotwania Rakel akeijar. (Ageun 35:16-19) Koany boboda akiro nuka Yesu: “Arai eoŋ ekecokon lokajokan. Einakini ekecokon lokajokan akeijar [Kayonanin, psy·khe′] kanuka amerekekin.” (Yokana 10:11) Kakiro nuka Ebaibuli nu, akirot ne’phesh naka Aburanian ka psy.khe’ naka Ayonanin itodunitos cut aijar kwape ituŋanan. Aiyatakin aisisia Ebaibuli ebuni aitodikin ijo ebe emamei cut kotoma Obaibuli kere ne erucokinitere akirot ne’phesh naka Aburanian ka psy.khe’ naka Ayonanin kede ibore yen mam etwani.

AJENUN EMOYO

Kaanyutu do ber oni epone loitosomator Ebaibuli akirot “emoyo.” Eomitos ice itunga ebe erai emoyo ibore yen ejai akuan yen mam etwani. Konye, mam ngun eraas nuabeit.

Etosomatos ewadikak Ebaibuli akirot naka Aburanian ru′ach ka akirot naka Ayonanin pneu′ma newadikata kesi nuikamunitos “emoyo.” Itodunitos awadikaeta nuka Ebaibuli apolou naka akiro kanu. Kwape aayunet ebalasi Isabulin 104:29 ebe: “Idemari [Yawe] eiyeŋanekec [ru′ach], etwakete, Eboŋorete da apuakec.” Ido ebala Yakob 2:26 ebe: “Kwape etwania akuan emamei emoyo [pneu′ma].” Itodunitos ikokoron lu ebe emoyo ijaikinit akuan aijar. Emamei emoyo, etwani akuan. Kanuka ngun, akirot ru′ach ijulakinitai mere kwape emoyo bon konye kwape eiyeŋane loka aijar araibo agogong naka aijar. Kwape aayunet, nuekamunitos akalele kapaasia nuka Noa, ebala Ageun 6:17 ebe: “Koany, ayauni eoŋ da akalele naka akipi toma akwap, amudiar akuan kere naejai eiyeŋane [ru′ach] loka aijar toma, kwap kakuj.” (Ageun 7:15, 22) Kanukangun, erai “emoyo” agogong naka aijar naeinakin iboro kere aijar.

Eredio

Kwape ekotor eredio akim naka epiei kanu aswam, kwapekwangin ekoto akuan emoyo kanu aijar. Aiyatakin aituput nu komoom nuikamunitos eredio loamakaran. Arai kibwaik ijo amakaran oredio kosodi ijo agwetakin, agogong naka amakaran einakinete eredio lo aswam. Konye, arai emameete amakaran, mam eredio epedori aswam. Kwapekwangin, emoyo nges agogong naeinakini akuan ejari.

Kwape ejaar akim naepiei, emameotor emoyo kede aijen kairaida aomisio. Erai agogong namam etakani. Konye arai emamei emoyo, araibo eiyeŋane loka aijar, “etwakete, eboŋorete da apuakec,” kwape abalar ewadikan Isabulin.

Enera nuekamunitos atwanare naka ituŋanan, ebala Ekalimonokinan 12:7 ebe: “Koboŋerete apua toma alup kwape kejaatar, koboŋori da emoyo [ru′ach] mama ejai Edeke lokekorakini.” Ne ejalakina emoyo araibo agogong naka aijar akuan, etwani akuan koboŋori alupok. Kwapekwangin, ebongori agogong naka aijar nejai Edeke. (Yob 34:14, 15; Isabulin 36:9) Mam na erai ebe elosi emoyo cut kuju. Konye, erai akepolou ebe, idioitunganan yen etwani kere, esalakini akemuno nadumun aijar bobo koingaren kede Edeke Yawe. Esalakini aijarake akanin nuka Edeke. Kotoma apedor naka Edeke bon, inyakakinere bobo itunganan aijar.

Erai teni nukalakara ejenun ebeit ebe eraas nu cut nuebuni Edeke aiswamaikin “ituŋa kere luejaasi toma atesin”! (Yokana 5:28, 29) Kapak na ajarun, ijaikin Edeke Yawe ngul luejotoete katwanare awate nuitetiak, kosodi ainyakin kesi emoyo. Eraun cut na apaaran naka alakara noi!

← Koan nuu kosula aloitetemitai ane