Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika Bo Cut Nuisisianakini Ebaibuli?

ESULA LOIKANYETE KAONGON

Kijai Kereka oni Cut ‘Apaarasia Nukawasia’?

Kijai Kereka oni Cut ‘Apaarasia Nukawasia’?

Inyoika bo iboro luiswamasi kapaarasia wok luabu Ebaibuli kodwarite?

Anyoika nuebala Akirot naka Edeke nuikamunitos eipone loejaunotor itunga “kapaarasia nukawasia”?

Kanukamunitos ‘apaarasia nukawasia,’ anibo iboro luedwarit Ebaibuli luejokuka luiswamasi kwana?

BIAI, iteitor ijo iyemuto kotelebision araibo ipupitor ijo iyemuto koredio kosodi aumokin, ‘inyoin bo elosi atakanikin akwap na?’ Engesununos iboro luarokok, ido emamei itunganan yen epedori aijen nuetakanunete moi. (Yakob 4:14) Konye ejeni Yawe nuebeit atakanun koingaren. (Isaia 46:10) Kolosek abu Akekirot, Ebaibuli kodwarite iboro luarokok luepote aiswamaun kapaarasia wok kede lukaumokin luepote aiswamaun koingaren.

2 Abu Yesu Kristo kinerite nuikamunitos Ajakanut naka Edeke naebuni alemar aronis kosodi aitaraun akwap eparadais. (Luka 4:43) Akotosi itunga ajenun apak naebunio Ajakanut. Kabeit, apotu esisiak luka Yesu kingitata ngesi: “Anyoin da aanyunet naka abunorekon, ka naka esaŋe loka akwapin?” (Matayo 24:3) Kabongokineteke, abu Yesu kolimok kesi ebe, Edeke Yawe bon ejeni cut apaaran naebunio awasia naka akwapin. (Matayo 24:36) Karaida mam Yesu abu kolimok kesi apak alopet naibunio awasia, abu kolimok kesi iboro luepote aiswamaun kakwap eroko Ajakanut eyangauna ainapakin ka ayuara nabeit mama ejaasi itunga. Nuadwarit ngesi iswamasi kwana!

3 Eroko oni kengica iboro luitodunitos ebe ijai teni oni “osaŋe loka akwapin,” kaanyutu ber oni kaurianut ejie loajaikina lomam idiotunganan abu koanyunite. Abu ejie lo kojaikina kuju, ido nuapotu kotakanutu kikamunitos oni.

EJIE LOABU KOJAIKINA KUJU

4 Etetemit esula loatubor koitabo kalo ebe abu Yesu Kristo koraun Ekabaka kokuju okaru 1914. (Daniel 7:13, 14) Katipet, akaulo na adumunia ngesi apedor naka Ajakanut, abu Yesu kogeu aswam. Ebala Ebaibuli ebe: “Kojau ejie toma akuj, kitiji Mikael [ekiror loka Yesu ece] ka ikemalaikan apiu [Satan Ekejodijodon], koji apiu ka ikemalaikan.”* Aponi kipikoria Satan ka ikemalaikan luarokok luenyaritai ajokin kojie kangol ido kocakunai kesi kokuju kiton akwap. Apotu imalaikan lumunon luka Edeke koleleta naarai acakun Satan ka ajokinike. Konye mam itunga apotu kodumun ailel ngin. Dimarai, edwarit Ebaibuli ebe: “Itukwi akwap…naarai ejesun ekejodijodon mamakus, ejai kanyunyura naepol, naarai ejeni ebe edit akepak!”—Apukokinio 12:7, 9, 12.

5 Aso koany nuapotu kotakanutu kotoma ojie loajai toma akuj. Kotoma anyunyurake, abu Satan koyau atiokisio nejaasi luiboiete kakwap. Kwape ibunio ijo aanyun, iboie oni kwana kapak kangin naka atiokisio. Konye ebuni araun apak naesupana—‘apak naedit.’ Karaida Satan ejeni ebe edit apak naka aiticanitoi. Enyarit Ebaibuli apak na kwape “apaarasia nukawasia.” (2 Timoteo 3:1) Epol teni oni alakara ajenun ebe ebuni Edeke amudiar Satan ka akeswamisio kotoma akwap! Kaanyutu ber oni iboro ice luadwarit Ebaibuli luiswamasi kwana. Itigogongitos nu ebe iboie oni kotoma apaarasia nukawasia ido edodor Ajakanut naka Edeke ayaun arerengusio numam edaunos nejaasi ngul lu eminas Yawe. Nasodit, kangicata ber oni iboro iwongon kotoma aanyuneta nuabala Yesu ebe epote aitodun apaarasia wok nukawasia.

IBORO LUEPOLOK LUISWAMASI KAPAARASIA NUKAWASIA

Aputosia nuka ijisio, etenge, ka akangasa nuakwap

6‘Enyoikini ateker asurokin ateker, ajakanut da asurokin ajakanut.’ (Matayo 24:7) Aponi koaria imilionin luka itunga kojiisinei kotoma okar akwatat luatuboros. Esisian ediopet loka akiro nukolosek loko Bulaya abu kiwadikate ebe: “Keraasi ikaru 1900 kiton 1999, ikaru luapolor noi abukor naka aokot adepari ikaru kere lukokau…. Kerai apak namam ejie kepalara, kejaananas ijisio duc aiboisio nuegelegela kikidioko apakio nuamameor ijie.” Ebala aitejenaret naelomunit kotoma atukot naengici akiro nuka akwap kere ebe: “Itunga luapotu kotwakata kokaru 1900 kiton 1999, adeparitos itunga luatwakitos kojisinei kere kokaru lukokau irwanauni.” Itunga luedeparito imilionin 100 kesi atwakata kanuka ijisinei ageun okaru 1914. Karaida imisikinit oni ationis natwaniar iminat wok kotoma ojie, mam oni ipedori amisikin apipil na adumutu imilionin luka itunga luatwakiasi luminan kec.

7‘Ejaunun ebel.’ (Matayo 24:7) Angicak akiro kesi ebalasi ebe eyatakin amio naka inyamat noi kotoma apak naka ikar 30 luatuboros kokau. Karaida ejaasi ngun, iyata ebeli naarai mam itunga luipu ejaasi kaisirigin luedolitos lugwelisi inyamat araibo alupok nukorikino iraan. Kotoma akwapin nueringa epoloete, itunga luedeparitos ebilion, icanasi noi. Luipu kotunga kalu itingit etenge loipol noi. Atukot naeyait akiro nuka angaleu kakwap kere nges ebala ebe akadit naka inyamat nges eyari idwe luedeparitos imilionin ikany kangolikaru.

8‘Ejaununete amaraneta nuepolok nuka akwap.’ (Luka 21:11) Esisiak luka asayanis luka Amerika luengicete akiro nuka alupok akwap kesi ebalasi ebe, ageun kokaru 1990, ajaununos amaraneta 17 nuka akwap nuegogong noi nuapedos abilibil aduketa ka acilicil akwap kangolikaru. Ido aimorikikin nepepe, ajaununos amararaneta nuka akwap nuegogong noi nuepedorete abilibil aduketa kangolikaru. Ebalas bobo aiwadikaeta ace ebe: “Amaraneta nuka akwap kesi aarata itunga luedeparito ilukumin akwatat kotoma okar 100 luatuboros ido aiyatakin naka acoa naka esayanis engarak mot aitidisiar atwanare naka itunga.”

9‘Ejaunun . . . atular.’ (Luka 21:11) Karaida iyata aijen naka amukian, eroko adekasinei nukolosek ka nuitetiak iticanete itunga. Ebala alimunet naka aripota adiopet ebe, adekasinei 20 nuejenara imoriaritos elweera, eimidi, ka ekolera ediluutu kokar idis luatuboros ido ace kotoma adekasinei kanu etiono aimuke noi. Kabeit, atakanutu adekasinei nuitetiak nuedolitos 30. Ace kakesi emameete ikee luimukeet ido koyarete itunga noi.

ITUNGA LUKA APAARASIA NUKAWASIA

Luipu itapalautos acoreta nuacoa nuelomuntos Akirot ka Edeke

10 Alemar einer iboro nuepolok luiswamasi kakwap, edwarit bobo Ebaibuli ebe ejenunos apaarasia nukawasia kaijulakin naka iponesio luka itunga. Abu ekiyakia Paul kitetemite epone loejaunotor itunga kapaarasia nukawasia. Kotoma 2 Timoteo 3:1-5 esioma ebe: “Kapaarasia nukawasia epote apakio nuetioko.” Abala Paul ebe eraunos itunga

  • Lueminas bonik
  • Lueminas apesan
  • Luiulakinito ikauriakec
  • Luemamei alaunit
  • Lumam eminanara
  • Lumam itikokinos
  • Ikadedeŋak
  • Lueminas aitelelio itia amin Edeke
  • Ejaas kaput naka ayoŋit Edeke, konye koŋeritos apedorike

11 Araasi kereka itunga luikote nen katutubet kon? Kabeit araasi kwape kwangin. Kaiboisio kere kakwap, ejaas itunga luejaasi ka iponesio lueroko. Itodunit na ebe ejaasi nueyapie Edeke aswam, naarai ebala Ebaibuli ebe: “Naelibuniata ikaronok bala inya, naekeriakarotor lukeswamak numam adolit kere, iswamaete kwaŋin tetere emudiaro ikar kere.”—Isabulin 92:7.

IBORO LUEJOKUKA LUISWAMASI KWANA!

12 Epol aiticanitoi kaparasia nukawasia kwape adwaritor Ebaibuli. Konye kakwap na, naileleba atiokisio, ejaasi aswamisio nuejokuka nuiswamasi kama ejaasi ejanakinak luka Yawe.

“Elimonokinio Akiro nu Nukajokak nuka ajakanut anatar akwapin kere.”—Matayo 24:14

Ajenak Luka Yawe elimonokinete akiro nuka jokak

13“Iyatakin da aijen,” adwarit eitabo lo Obaibuli loka Daniel. Iwori bo abeitor ngun atakanun? Kotoma “apak nakawasia.” (Daniel 12:4) Engaraki Yawe ngul luipudasi cut aijanakin ngesi aiyatakin apolor kotoma amisikin naka Ebaibuli kanonoi ageun kokaru 1914. Amisikis kesi abeit naikamunit ekiror loka Edeke ka alosikineteke, alucet naka Yesu Kristo, ejautene kalukatwak, ka ajarun. Ido bobo da, esisiautu amaak luka Yawe epone loebeitor aijar loejaikin kesi ameda kaibuses nejai Edeke. Amisikisi bobo kesi ejok nuebeit Ajakanut naka Edeke aswam kede epone loebunio aitemokin akiro nuiswamaasi kwana kotoma akwap. Inyoin bo iswamaete kesi kede aijen na? Eyauni aingiset ngin oni nejai adwarasit ace naejai aitodilikinio kotoma apaarasia nukawasia nu.

14“Elimonokinio Akiro nu nuka Nukajokak nuka ajakanut anatar akwapin kere,” abala Yesu Kristo kotoma adwarasit naekamunit “esaŋe loka akwapin.” (Matayo 24:3, 14) Kotoma akwap kere, akiro nukajokak nuka Ajakanut—apolou naka Ajakanut, nuebuni Ajakanut aswam, ka epone loipedoria oni adumun arerengesio ke—kesi elimonokinio anatar akwapin nuedeparitos 230 kangajepa nuedeparitos 400. Imilion Kajenak luka Yawe kesi elimonokinete kakukuranut akiro nukajokak nuka Ajakanut. Elomunitos kesi kotoma “ŋinijena, ka luka atekerin, ka ituŋa, ka aŋajepa.” (Apukokinio 7:9) Isisiaete Ajenak Ebaibuli kede imilionin luka itunga luekotos ajenun nuisisianakini cut Ebaibuli koreriakec atitai. Erai na teni aitodolikinet naka adwarasit naeumokina, kanonoi kwape adwaritor Yesu ebe eraunos Ikristayon lukabeit ‘luengarunete itunga kere’!—Luka 21:17.

ANYOIKA BO NUIBUSAKINIT IJO ASWAM?

15 Kwape ejaatar adwareta nuipu nuka Ebaibuli aitodolinikin kwana, mam kereka ijo icamunit ebe iboie oni kotoma apaarasia nukawasia? Akaulo naelimonokinere akiro nukajokak kwape ekotor Yawe, edoluni do cut “awasia.” (Matayo 24:14) Apolou na “awasia” ngesi apak naelemara Edeke aronis kotoma akwap. Kanu amudiar ngul kere luepeleikinitos aitepeg ngesi, ebuni Yawe aitwaswam Yesu ka ikemalaikan lukagogong. (2 Isesalonikan 1:6-9) Mam bobo Satan ka akejokin epote aingalingal atekerin. Akaulo kangun, eyauni do Ajakanut naka Edeke arerengesio nejaasi ngul kere luenonokinitos epugaeke loedolit.—Apukokinio 20:1-3; 21:3-5.

16 Kwape eyapiar esange loka aswamisio nuka Satan, ekot do oni engitakin bonik, ‘anyoika nuibusakinit eong aiswamaenen?’ Eraasi nuka acoa ainyikokin aisisiaenen ajenun nuipu nuikamunitos Yawe ka nuekoto ngesi kane ijai oni. (Yokana 17:3) Ekot ijo akukurikinit aisisia Ebaibuli. Kojanakin duc airiamununeta nepepe kangul luiswamaete akote naka Yawe. (Iburanian 10:24, 25) Kiyatak aisisia ngun kere nuijakinit Edeke Yawe itunga kakwap kere, ido ijulak aijar kon teretere ijo idumun epaperone nepepe ka Edeke.—Yakob 4:8.

17 Abu Yesu kodwarite ebe epote itunga luipu aitapalaun aanyuneta nuitodunitos ebe kijai oni toma apaarasia nukawasia. Amudiario naka ikaronok ebuni aturiaun ido komam eomitai. Kwape ebunio ekokolan kuare, engesakin apak ngin itunga luipu mam ekapakina. (1 Isesalonikan 5:2) Abu Yesu kikwenyarit ebe: “Naarai kwape kejaatar apaarasia nuka Nao, ikonakini nen abunore naka Okoku loka etuŋanan. Naarai kwape kejaatar toma apaarasia nukegeikinete akalele, anyamete, amasete, amanyasi, amanyio da, kiton apaaran nakelomaria Nao toma ataker, komam ejenete kiton neadolunio akalele kolelea kere, ikonakini nen abunore naka Okoku loka etuŋanan.”—Matayo 24:37-39.

18 Kanukangun, abu Yesu kolimok apupok ke ebe: “Konye kocoito yesi kinyek airaŋanut ka emeret ka aiyaloŋoŋ da naka aijar kana aisilaŋirir ikusitauon, koŋesakin apaaran ŋin kwape ipokia akuluma. Naarai edolokin ituŋa kere luejaas akwapin kere. Konye kokwenya apakio kere, kiŋaiŋaata tetere idumunete agogoŋ aiku kakiro ŋun kere nuedolokinete, ka aibwo da kakonyen nuka Okoku loka etuŋanan.” (Luka 21:34-36) Ibusakinit oni ayangarit akiro nuka Yesu kwape nuepolok noi. Kanukinyo? Naarai ngul luejaatar kede eidicane nepepe ka Edeke Yawe ka “Okoku loka etuŋanan,” Yesu Kristo, ejaatar amuno naka aiku amudiaro naka ejautene lokaronon loka Satan kadumun aijar naka ikaru kere kakwap nakitetet naeumokina naeyapiei noi kwana!—Yokana 3:16; 2 Petero 3:13.

NUISISIANAKINI EBAIBULI

  • Ijiisinei, ebeli, amaraneta nuka akwap, ka atular itodunitos ebe kijaa oni apaarasia nukawasia.—Matayo 24:7; Luka 21:11.
  • Kapaarasia nukawasia, itunga luipu eraas lueminas bonik, lueminas apesan, lueminas aitelelio itia amin Edeke.—2 Timoteo 3:1-5.
  • Kapaarasia nukawasia, akiro nukajokak nuka Ajakanut kesi elimonokinio anatar akwapin kere.—Matayo 24:14.

*  Kanuka ajenun ace nuipu nuitodunitos ebe Mikael ngesi ekiror loka Yesu Kristo ece, koany Nuiyatakinitai.


Aigiseta

1. Aibo ipedoria oni aisisiaun nuikamunitos nukoingaren?

2, 3. Anyoin bo aingiset napotu esisiak kingitata Yesu, ido epone ani abu ngesi kobongokina?

4, 5. (a) Anyoika nuapotu kiswamaunos kokuju akaulo nadakinere Yesu araun Ekabaka? (b) Kwape itodunitor Apukokinio 12:12, anyoika nuapotu kotakanutu kotoma ojie loajaikina kuju?

6, 7. Epone ani ejaatar akiro nuka Yesu nuikamunitos ijiisio, ka ebeli aitodolikin lolo?

8, 9. Inyo itodunit ebe etodolikinos adwareta nuka Yesu nuikamunitos amaraneta nuka akwap ka atular?

10. Inyoika iponesio luadwaritai kotoma 2 Timoteo 3:1-5, luitei ijo kotunga lolo?

11. Epone ani itetemitotor Isabulin 92:7 nuebeit atakanikin ikaronok?

12, 13. Epone ani eyatakinor ‘aijen nakabeit’ kotoma “apak nakawasia” na?

14. Aswam naka alimonokin akiro nukajokak nuka Ajakanut adol bo lolo akwapin amwasai, ido lubo angai elimonokinete?

15. (a) Icamunit kereka ijo ebe kiboie oni kapaarasia nukawasia, ido kanukinyo? (b) Inyo eyauni “awasia” nejaasi ngul luitepegete Yawe, kaluenonokinitos epugae loka Ajakanut naka Edeke?

16. Anyoika nukacoa nuibusakinit ijo aswam?

17. Kanukinyo ebunio amudiaro naka ikaronok aturiakin itunga luipu komam ejenete?

18. Anyoin akiro nuka Yesu nuibusakinit oni ayangair kwape nuepolok?