Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika Bo Cut Nuisisianakini Ebaibuli?

ESULA LOITOMONET AKANY ANGON

Kidarakin Kotoma Amina Naka Edeke

Kidarakin Kotoma Amina Naka Edeke

Anyoin bo apolou naka amina Edeke?

Epone bani ipedoria oni aidarakin kotoma amina naka Edeke?

Epone bani ebunia Yawe aisirereng ngul luidarakinos kotoma aminake?

KINOMA ber ijo aputo bala ilosi ijo korot, kokusi ekwam noi. Ido kisunyite akwap amutonor. Katipet kogeun edou eimilia, twaratwara, kireta, kirurumai akuj, kobukun do akiru noi. Igeun ijo akerit komoote nemecat noi. Kosiep loka erot, koanyun ijo etog lomecat. Egogong, elai ido komam eisi da!

Etunganen emoi nemeci okwam alegongo

Ibuni ijo ataraun Yawe nekerianara kon kapaarasia kanu nukarokok?

2 Ijai oni apaarasia nueroko noi. Ejai ejautene loka akwap iyata amunar. Konye ejai nemecet neipedor oni aimec kede adumun ayuara kanejai adio ationis kere. Nges bo ai? Koany nuisisanakin Ebaibuli: “Alimuni nuka Ejakait ebe, ‘Ŋes neekerianaraka ka abwasika; Ekadeke, loamuno.’”—Isabulin 91:2.

3 Komoom ber ijo ngun! Yawe Lokasuban, ka Lokepungan iboro kere, epedori araun amecet wok. Epedori ayuar oni, naarai egogong ngesi adepar idiotunganan araibo idiobore kere yen etami ayaun oni adiotionis. Karaida ejaasi nueroko nuetakanikinete oni, epedori Yawe alemar kesi kere. Epone ani ipedoria oni aitaraun Yawe neekerianara wok? Ibusakinit oni amunokin ngesi. Kaiyatakinit, isinyikokit oni Akirot naka Edeke ebe: “Kidaras bonik toma amin naka Edeke.” (Yuda 21) Eebo, ibusakinit oni aidarakin toma amin naka Edeke, ketogogongitos amin naijar oni ka Papawok lokokuj. Ipedori do oni amunokina ngesi kwape neekerianara wok. Konye epone ani ipedoria oni aidukun eidicane nepepe ka Edeke?

KOJEN IDO KISIALAMIK AMINA NAKA EDEKE

4 Kanu asalakin toma amina naka Edeke ibusakinit oni aimisikin epone loabu Yawe kitoduna akemina kanu wok. Komoom ber ijo aisisianakineta ace nuka Ebaibuli nuidua ijo aisisiaun kingarakinite eitabo lo. Kwape Lokasuban wok, ijaikinit oni Yawe akwap kwape orewok loejok. Ibwakinit ngesi toma akwap inyamat luipu noi, akipi, iboro luka abar luka alup, itiang luitelelete kede akwap naibus noi asesen. Kwape ekewandikan loka Ebaibuli, itejenikit Edeke oni ekekiror kede ikeponesio. Ido bobo da, itodunit Akirot ke ebe, abu kijuk Okokuke lominat toma akwap, acamakin Yesu aiticanio kede atwanere kanuwok. (Yokana 3:16) Ido inyoin bo ameda naka ainakinet kangin mama ijai oni? Ijaikinit oni amuno naeumokina nakoingaren.

5 Amuno wok nakoingaren, imoriarit bobo icebore yen edaunit Edeke aswam. Adau Yawe asipokin apugan naka okuj, Ajakanut naka Mesia. Eyapie Ajakanut ngin aitanang aiticanitoi ka aijulakin akwap kere araun eparadais. Komoom! Ibuni do oni aijar kotoma paradais kainapakina ka ainyalama ikaru kere. (Isabulin 37:29) Konye kiringa idarit ngun, ijaikinit oni Edeke aicoreta tetere ipedori aijar koipone loejokuna. Ijaikinit bobo ngesi oni arereng nakailip, koipone kangon, ipedori do oni einer ka ngesi kailajar. Eraasi lu idis kowaitin luetodikina Yawe itunga kere amina, ka ijo kwape itunganan.

6 Aingiset naepol naibusakinit ijo aingitakin bon ngesi na ebe: Eipone ani apedoria eong aisialamikin Yawe kanu akemina kanuka? Luipu epedorete atemari ebe, “Ekoto eong da aitodikin Yawe amina.” Ijo da ipupi kwape kwangin? Abu Yesu kobala ebe, aicorakinet naepol kakere ngesi na: “Komina Ejakait Ekonideke kekonitau kere, ka akonijar kere, ka akonicoa da kere.” (Matayo 22:37) Kabeit, ejaasi akiro nuipu nuibusakinitor ijo amina Edeke Yawe. Konye epedori aipup bon ebe imina ijo Yawe aitodun ebe, emina teni ijo ngesi ka ekonitau kere, ka akonicoa kere, ka aijarakon kere?

Ecokat ekitoi

7 Kwape itetemitere kotoma Obaibuli, amina Edeke edeparit aipup bon. Kabeit, ejok itunganan aipup ebe emina ngesi Yawe, konye erai ngin ageunet bon naka amina alopet. Kanu ekitoi alomun, ekot ojai ecokat. Konye arai ikoto ijo araito nuka ekitoi, ipedori kereka ijo aiyalamikin arai kijaik ijo icetunganan ecokat? Mam cut! Kwape kwangin, aipup ebe imina ijo Edeke Yawe, erai ageunet bon. Isisianakin Ebaibuli ebe: “Naarai na ŋesi amina naka Edeke, ebe kiricit aicorakinetake. Ido mam aicorakinetake elaŋir.” (1 Yokana 5:3) Itunganan yen emina Edeke, ekot aira araito nuejokuka. Ibusakinit aitodun amina ngin kotoma aswamisio.—Matayo 7:16-20.

8 Itodun oni ebe imina Edeke neiricia katupitos da ikisila ka aicorakineta ke. Mam etiono aswam ngun. Mam ikisila luka Yawe elangir kama ijai oni, konye kingarakinete oni adumun aijar naejok, naejai aiyalama ka ailel. (Isaia 48:17, 18) Ipedori oni aitodun ebe isialamikinit oni Yawe kanu iboro kere lueswamaik ngesi oni arai kirici oni ikisilake. Konye nukaiturur, ikidiok itunga luitodunitos aiyalama kec. Mam oni ikoto araut itunga lumam isialamikinitos, kwape icetunga luajaasi apaarasia nuajaar Yesu toma akwap. Abu Yesu kitangaleu itunga itomon luadekasi atapon, konye ediopet bon abu kobongo aisialamikin ngesi. (Luka 17:12-17) Kabeit cut, ekoto oni aijaut kwape ediopet loabu kitodu aiyalamake mere ikanyangon lumam apotu kitodut aiyalamakec!

9 Inyoika bodo ikisila luka Yawe, luibusakinit oni aricit? Kidau oni aisisia luipu koitabo kalo, konye kenyongosi ber oni ace kakesi. Aricit ikisila luka Edeke ebuni aingarakin oni aidarakin toma amina naka Edeke.

KIYATAK AIKUYAKIN NEJAI YAWE

10 Aisisia nuikamunitos Yawe erai ibore yen epol kanu aikunyakin nejai ngesi. Mam erai ibore yen ebeit anangakin. Arai ipieri ijo akim nelilimori akwap noi, ipedori kereka ijo ajalakin akim ngin edunyor? Mam. Ibuni ijo aiyatanakin akito tetere akim iyatakinit ainok. Kedunyo akim ngin, epedori akon kuan ageun amaran araibo ijo adumun adeka. Kwape epedorata akito aiyatakin akim ainok, kwape kwangin epedoria ‘aijen naka Edeke’ ainakin amina wok kanukaYawe aiyatakin agogongor.—Awaragasia 2:1-5.

Kwape ekotor aiyatanakin akito akim tetere iyatakit ainok, aminakon da kanuka Yawe ekoto kiyata

Etunganen ipieri akim

11 Akoto Yesu atupitok ke aiyatakinit amina Yawe kede Akekirot nakabeit. Akaulo naka ajarunuke, abu Yesu kisisianak atupitok ke iarei nuikamunitos adwareta ace luejaasi Aiwadikaeta nuka Aburanian. Apotu bo kesi kopuputu biai? Kakaulo aputu kotemasi ebe: “Mam tope amulaete iwokotauon nenerar kaoni korot, ka aikujonokin oni nukiwadikatai?”—Luka 24:32.

12 Mam kereka ijo abu kiyalamikin noi, ido kipuda da aitodikin Edeke amina, nepe igeuna ijo ajenun nuisisianakin Ebaibuli? Komam abuonokin, abu ijo kiswam kwangin. Luipu da ekonakis kwape kwangin. Konye ibore yen etiono, ngesi ijo aanyun ebe esalakinit amina kon egogong ido kopoloi da. Mam ibusakinit oni atupit iponesio luka kwap. Abu Yesu kodwarit ebe: “Ejoniari amin naka luipu.” (Matayo 24:12) Epone ani ipedoria ijo aanyun ebe mam amina kon kanuka Yawe kabeit naka Ebaibuli ejoniari?

13 Kiyatak adumun aijen naka Edeke Yawe kede Yesu Kristo. (Yokana 17:3) Ibusakinit ijo Aomoom kaidules akiro nuidau ijo aisisiaun kotoma Akirot naka Edeke, ido kingitanakin bonik: ‘Anyoika nuisisianakinete nu eong kanu ikamunitos Edeke Yawe? Epone ani apedoria eong aitosom nu kanu aiyatakin amina nges kede ekatau kere, akaijen ka akaijar kere?’ (1 Timoteo 4: 15) Aomoom kopone kangon, einakin aminakon kanuka Yawe egogongor noi.

14 Epone ice loipedoria ijo aiyatakin amina kon kanuka Yawe ngesi ijo ailipenen duc. (1 Isesalonika 5:17) Kosula 17 loka eitabo kalo, apotu oni kesisiaut ebe, erai ailip ainakinet naepol kama ejai Edeke. Kwape epoloror eidicane loka itunga nepe inerananatar duc, kwape kwangin egogongor eidicane wok ka Yawe nepe ilipianana oni nejai ngesi duc. Konye mam ekot oni ainyogonyog ailipasinenei wok—abogobogo akiro nuemamei apoloukec. Ekoto oni einer ka Yawe kwape ineratar ikoku ka papake lominat. Ibusakinit oni einer kede kayongit, kamunosi ido kotoma otaunowok. (Isabulin 62:8) Eebo, aisisianenei Ebaibuli kede ailipenen, erai iboro luepolok noi kotoma aimawok, ido ingarakinete oni aidara amina wok naka Edeke.

KODUM AIYALAMA KOTOMA AIMA KON

15 Aisisianenei Ebaibuli kede ailipenen eraasi iboro luka aima lu ipedori oni iswam bon. Konye kaanyutu ber oni ibore ice yen aima yenimoriarit itunga ice: alimonokin luce akiro nuikamunitos aiyuun wok. Biai, igeu ijo alimonokin lucetunga abeit naka Ebaibuli naisisiau ijo? Arai erai kwangin, ijaatar ijo kede arereng naeumokina. (Luka 1:74) Neilimonokina oni abeit naisisiat oni naikamunit Edeke Yawe, iswamai oni aswam naepol noi naijaikinitai Ikristayon kere lukabeit—naka alimonokin akiro nukajokak nuka Ajakanut naka Edeke.—Matayo 24:14; 28:19, 20.

16 Aseseni ekiyakiya Paul aswam ke naka alimonokin kwape ibore yen etiai, konyarite ngesi abara. (2 Ikorinton 4:7) Alimonokin itunga akiro nuikamunitos Edeke Yawe kede alosikinetake, erai aswam naejok naitelekarit naibusakinit ijo aswam. Erai aswam naka aijanakin Ejakait naejok noi, ido eyauni arerengesio nuitelekaritos. Nepe ilomaria ijo toma aswam na nakalimonokin, ibuni ijo aingarakin itunga lumunon kotauon, aidukun eidicane nepepe ka Papawok lokokuju kede ageun alosit korot loka aijar naka ikaru kere! Konye ejai kereka aceswam nailetekarit alimonokin? Kaiyatakin, alimonokin nuikamunitos Yawe ka Akirot ke, ebuni aiyatakin aiyuun kon kede aitigogong amina kon kanukeng. Ido isialamikinit Yawe noi nuiswamai ijo kere kanu aijanakin ngesi. (Iburanian 6:10) Ayatakinit aswam ngin kakukuranut, kingarakin ijo aidarakin kotoma amina naka Edeke.—1 Ikorinton 15:58.

17 Ibusakinit oni aiitun ebe alimonikin akiro nuka Ajakanut erai aswam naka atipet. Ebala Ebaibuli ebe: ‘Kolimonok akirot, katipet.’ (2 Timoteo 4:2) Kanukinyo ekotor oni aswam nu katipet? Elimokinit oni Akirot naka Edeke ebe: “Eapie apaaran nakapolon naka Ejakait, eapie, iwonyunit noi.” (Sepania 1:14) Eebo, ebunit apak katipet naebeitor Yawe amudiar aswamisio nukarokok nuka akwap kana. Ekoto aikwenyar itunga! Ekoto kesi kojenutu ebe, na nges apak naebeitor aseun Yawe kwape Epugan kec. ‘Mam awasia cut iyapi.’—Kabakuk 2:3.

18 Ekoto Yawe oni aima ngesi nepepe kaluce Ikristayon lukabeit. Ngun nges ebalar Akirot ke ebe: “Kaomoomas aisinyikokin bonik ka bonik amin ka aswam nuejokuka, kenyeis apalun atukonokin nepepe, kwape iswamaata ice, konye kecoras; ido keyatanakinito ŋun kwape ianyuniata apaaran ŋin eyapuunit adolun.” (Iburanian 10:24, 25) Neiriamununor oni kede Ikristayon wok luce toma aurianeta, ijaatar oni kede arereng naka aiturit ka aima Edeke wok lominat. Ibuni bobo oni da aiduk kede aisinyikokin nginidiopet.

19 Nepe itukonokinor oni kangul luemaet Yawe, ipedori oni aitogogong ilomor luka amina ka epaperone kotoma atukot. Ekot oni asesen nuejokuka kanejaasi luce kwape esesenia Yawe da nuejokuka kama wok. Sirimunokina adolit kanejaasi luce Kristayon. Kiitu ebe mam oni kere kipoloi kediopepone kakiro nuka omoyo ido da ebe kibucanari oni kere. (Ikolosian 3:13) Aiduk eidicane loejok kangul lueminasi Yawe, ebuni aingarakin ijo apolor kotoma akiro nuka omoyo. Eebo, aima Yawe nepepe ka inacan ka ainacan kon lukomoyo, kingarakin ijo aidarakin kotoma amina naka Edeke. Epone ani isirerengio Yawe ngul luemaete nges kamunonut ido kidarakina kotoma aminake?

KIWOPE AIJAR NAERAI “AIJAR OBE”

20 Isirerengei Yawe ejanakinak ke lumunon kede aijar, konye aijar bo naepone kani? Komoom, ijaatar ijo aijar cut kwana? Luipu kaoni ipedori atemar ebe, eebo. Naarai iyenga oni, inyami, ido kimasi da. Kabeit, kijari oni. Ido apakio nuiyalamar oni, aticepak kipedori atemar ebe, “aijar teni na alopet.” Konye itijenunit Ebaibuli koipone loecai ebe, emamei itunganan yen ejaatar teni kaijar alopet.

Ekale elelakinit ejautene loka paradais

Ekoto Yawe ijo adumun “aijar naerai aijar obe.” Ibuni kereka ijo adumun?

21 isinyikokinit akirot naka Edeke oni ‘aitiŋ aijar naerai aijar obe.’ (1 Timoteo 6:19) Akiro nu itodunitos ebe “aijar obe” erai ibore yen kimuno oni adumun koingaren. Eebo, neiraunor oni luidolit, ibuni do oni adumun aijar alopet, kwape alosikinitor Edeke kotoma ageunet. Koingaren, neidumunia oni aijar kotoma paradais kakwap kangalete ejok, kajaatar kainapakin kede aiyalama, ibuni do oni cut ailel “aijar obe”—aijar naka ikaru kere. (1 Timoteo 6:12) Mam kereka ngin erai amuno naeumokina cut?

22 Epone ani ipedoria oni ‘aiting aijar naerai aijar obe’? Kosula kangope kangon, abu Paul kisinyikok Ikristayon ebe “kiswamata nuejok kobarata kotoma aswamisio nuejok.” (1 Timoteo 6:18) Kaica, nuipu elomunete koipone loitosoma oni abeit naisisiaun oni kotoma Obaibuli. Konye biai, abala Paul ebe, ipedori oni adumun “aijar obe” naarai iswamai oni iboro luejokuka? Mam, naarai ererengesio nuewumokina kwangun, kidumun oni kanuka “asianut naka Edeke.” (Iromayon 5:15) Konye, elelakinit Yawe aiserereng ngul luijanakinite nges kamunonut. Ekoto ngesi ijo adumun “aijar naerai aijar obe.” Aijar kwape kangin naka aiyalama, ainapakina, kana ikaru kere, ejai kingaren kangul luidarakinos kotoma amina naka Edeke.

23 Ekoto nginidiopet kaoni aingitakin bon, Konye amai kereka eong Edeke koipone kalo ebalar ngesi kotoma Obaibuli? Arai ingicakin oni bonik kanginiparaan, aanyun ebe kimai teni Edeke kwape ekotor ngesi, apolouke ebe ijai oni orot lokabeit. Ipedori do oni amuno ebe erai Yawe amecet wok. Ebuni ngesi aidara, kayuar iketunga lumunon kotoma atiokisio nuka apaarasia nukawasia. Ebuni bobo Yawe alakun, kaingarakin oni alomar toma ojautene lokitetet loeumokina lokwana eyapie. Eraunos teni apaarasia ngun nuka aumokin! Ido ibuni oni aiyalamikin ajenun ebe apotu oni kaseutu aswam nuka acoa kapaarasia nukawasia! Arai kiseu ijo aswam nuka acoa kopukwana, ibuni ijo ailel “aijar naerai aijar obe” kwape alosikinitor Edeke Yawe, aijar naka ikaru kere!

NUISISIANAKINI EBAIBULI

  • Ipedori oni aitodun ebe imina teni oni Yawe arai kiricit ikisila ka acorakinetake.—1 Yokana 5:3.
  • Aisisiaenen Akirot naka Edeke, ailipenen nejai Yawe, aisisianakin lucetunga nuikamunitos ngesi, kaima ngesi kotoma airiamununeta nuka Ikristayon, kingarakinete oni aidarakin kotoma amina naka Edeke.—Matayo 24:14; 28:19, 20; Yokana 17:3; 1 Isesalonikan 5:17; Iburanian 10:24, 25.
  • Ngul luidarakinos toma amina naka Edeke, ejaasi kede amuno naka adumun “aijar obe.”—1 Timoteo 6:12, 19; Yuda 21.

Aigiseta

1, 2. Aibo neipedori oni adumakin neiyuaror lolo?

3. Epone ani ipedoria oni aitaraun Yawe neekerianara wok?

4, 5. Ani bo ice kowaitin luetodunikina oni Yawe aminake?

6. Eipone ani ipedoria ijo aisialamikin Yawe kanu akemina kanukon?

7. Ejaasi kereka ace nuibusakinit itunganan aswam adepar aipup bon ebe emina ngesi Edeke? Kitetem.

8, 9. Epone ani ipedoria oni aitodun ebe imina ido isialamikinit oni Edeke?

10. Kitetem ajokis naeyatakin adumun aijen naka Yawe.

11. Epone ani apotu nuisisanakin Yesu kotiroriata atupitok ke?

12, 13. (a) Kanejaasi itunga luipu, inyoin bo atakanik aminakec kanuka Edeke kede Ebaibuli? (b)  Nunyoika ebeit oni aswam tetere amina wok mam ejoniari?

14. Epone ani epedoria ailip aingarakin aitigogong amina wok kanuka Yawe?

15, 16. Kanukinyo ibusakinitor oni ayangarit aswam naka alimonokin kwape arereng araibo abara?

17. Kanukinyo ekotor ayangarit aswam naka alimonokin kwape naka atipet lolo?

18. Kanukinyo ibusakinitor oni aima Yawe nepepe kaluce Ikristayon lukabeit.

19. Epone ani ipedoria oni aitigogong amina wok kotoma atukot naka Ikristayon?

20, 21. Inyoin bo “aijar obe” ido kanukinyo eraar amuno naeumokina noi?

22. Epone ani ipedoria ijo ‘aiting aijar naerai aijar obe’?

23. Kanukinyo ibusakinitor oni aidarakin kotoma amina naka Edeke?

KISISIA ACE

Kingit Aisisia Ebaibuli atitai

Kanukinyo Kisisia Ebaibuli?

Kijaikinit Ebaibuli abongonokineta nuka aingiseta nuapolok kotoma aijar nejaas imilionin luka itunga kotoma akwap kere. Ikoto kereka ijo araun ediopet kotoma kesi?