Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika Bo Cut Nuisisianakini Ebaibuli?

ESULE LOITOMONET KADIOP

Kanukinyo Ecamakinitor Edeke Aiticanitoi Ajaun?

Kanukinyo Ecamakinitor Edeke Aiticanitoi Ajaun?

Erai kereka Edeke eyaunit aticanitoi toma akwap?

Anyoin akirot naepol naponi kikeunai komanikor loka Eden?

Eipone bani ebunio Edeke alemar iboro luenakinitos itunga aiticanitoi?

AKAULO naka ejie loarono noi kotoma akwap adiope najai ejie, aponi kidaikinai ilukumin luka angor ka idwe luaritai ates adiopet kibwaikitete ajenununeta. Kangin jenununete ajai awadikaet nabala ebe: “Kanukinyo?” Aticepak erai ngin aingiset naetiono noi kanejai oni kere. Ingisete itunga nges kaiturur nejaar ejie, ationis, adeka, araibo neyaarere iminatakec atitai, amudiar erekec, araibo nedumuniata kesi aiticanitoi naepol. Ekotosi kesi ajenun kanukinyo etakanakinata kesi atiokisio kwangun.

2 Kanukinyo ecamakinitor Edeke aiticanitoi ajaun? Arai erai Edeke Yawe lokapedor kere, loemina, loeco, ido loka etube, kanukinyo epolor angolopa ka amamus etube toma akwap? Biai, iwomomotor ijo nukamunitos iboro lu?

3 Erono kereka aingitun nu ecamakinitor Edeke aiticanitoi ajaun? Iyalongongoete ice ebe, aingit aingiset kwape kangin, itoduni bala emameotor kesi kede aiyuun naedolit araibo ebe, mam eyongitos Edeke. Ne isiomia ijo Ebaibuli, idumuni ijo ebe, itunga luayongito Edeke ajaatar kede aingiseta nuaputos kwape kangun. Kwape aanyunet, abu enabi Kabakuk ingit Yawe ebe: “Kanukinyo kitodikinia eoŋ numam adolit, asesen ameŋeranut? Naarai ejai amudiar ka akaje kakonyeneka, ejai da epeget, elomuni do angolopa?”—Kabakuk 1:3.

Ebuni Yawe aisinang aiticanitoi kere

Aidao

4 Biai, abu kereka Yawe kitoron enabi Kabakuk lomunot kanu aingit aingiseta kwape kangun? Mam. Konye abu Edeke kimorikik akiro nuka Kabakuk nuka otau toma awadikaeta nuiyengakinit ngesi Obaibuli. Abu bobo Edeke kingarak ngesi amisikin akiro ngun ejok ka adumun aiyuun naeyatakina. Ekoto Yawe aingarakin ijo da kwape kwangin. Kiitu, isisianakini Ebaibuli ebe “epod ŋesi yes.” (1 Petero 5:7) Elait Edeke aronis ka aiticanitoi nalomu, adepar idiotunganan kere. (Isaia 55:8, 9) Kanukinyo do, ejaar aiticanitoi naepol toma akwap?

KANUKINYO EJAAR AITICANITOI NAEPOL?

5 Engitigitata itunga luka idiinin luegelegela engarenok ka esisianakinak kec luka idiinin akiro nuepolor aiticanitoi kakwap. Etapit kesi abongonokin ebe, aticanitoi erai akote naka Edeke ido edaunit ngesi kolosek aitemokin nginibore kere yen iswamaun, aimoriarit nukaiturur. Luipu kesi elimokino ebe irotin luka Edeke eraasi lumam epatana ajenun, ido ebe eyauni ngesi atwanare otunga—kidwe da—tetere ngesi ejaunos kakesi kuju. Kwape idauna ijo aisisia, mam Edeke Yawe eyauni nueroko. Ebala Ebaibuli ebe: “Madi Edeke, aswam nueroko; madi Lokapedor kere, aswam numam edolito.”—Yob 34:10.

6 Ijeni ijo nu einakinitos itunga ibucaritos aitironit Edeke kanu aiticanitoi kere naejai toma akwap? Irwanipu, itoronitos kesi Edeke Lokapedor kere naarai eomitos kesi ebe Edeke ngesi epugan obe loka akwap kana. Mam kesi ejenete abeit naisisianakini Ebaibuli naepatana konye orai naepol noi. Isisiaunit ijo abeit ngin kosula 3 koitabo kalo. Epugan obe loka akwap kana ngesi Satan Ekejodijodon.

7 Ebala Ebaibuli kaidelel ebe: “Iboiete da akwapin kere kotoma lokaronon.” (1 Yokana 5:19) Iwomoom ijo ngun, mam kereka eraas nukabeit? Itodunit akwap na iponesio luka emalaika lomam etakani “Ekeŋalaran loka akwapin kere.” (Apukokinio 12:9) Erai Satan loengara, engalan, ka aaran. Ngun nges ilelebar angolopa, aingal, ka aaranakin toma akwap naingarenikit ngesi. Erai ngin akirot adiopet naejaar aiticanitoi naepol noi.

8 Akirot nakiaret naejaar aiticanitoi nges, kwape itetemitere Kosula 3, eraasi itunga lumam edolito ka adiakanarak ageun ne ajaunor abenyanut omanikor loka Eden. Itunga luediakanarete etapit amaria ayait luce, ido eyauni na ijiisio, aridakina, ka aiticanitoi. (Ekalimonokinan 4:1; 8:9) Akirot nauniet naejaar aiticanitoi ngesi ‘apak ka nuengesunos.’ (Ekalimonokinan 9:11) Kotoma akwap naemameor Yawe kwape Epugan loeyuarit, aticepak edumunete itunga ationis naarai ejaunos kesi aiboisit nakaronon kotoma apak nakaronon.

9 Eraasi nuka aitalakar ajenun ebe mam erai Edeke eyaunit aiticanitoi. Mam erai ngesi eyangaunit ijiisio, amengeranut, aridakina, ka atiokisio nu ainakis itunga aiticanitoi. Konye, ibusakinit oni ajenun, nu ecamakinitor Yawe aiticanitoi na kere? Arai erai ngesi Lokapedor kere, ejaatar ngesi kede apedor naitanang ngun. Kanukinyo do iteikinitor ngesi aiticatoi? Ibusakinit kojaatar Edeke lominat loidau oni ajenun akirot naejok.—1 Yokana 4:8.

ITOLOMUNITAI AKIROT NAEPOL

10 Kanu ajenun nu ecamakinitor Edeke aiticanitoi, ibusakinit oni aomoom nuapotu kotakanut kokau ne ageunor aiticanitoi. Ne engarenikina Satan Adam ka Keba toma aipalikin Yawe, aponi kitolomunai aingiset napol noi. Mam Satan abu kitepeg apedor naka Yawe. Ejeni Satan ejok ebe apedor naka Yawe emamei ne esangit. Konye abu Satan kijaik abuonokin arai erai teni Yawe loibusakinit aipuga. Kanu anyara Edeke engalan loibwait nuejokak kanejaasi lueyait ngesi, abu Satan kitoron Yawe kwape epugan lokaronon. (Ageun 3:2-5) Abala do Satan ebe epedorete itunga aswam ejok komamei apugan naka Edeke. Arai na asurokinet nejai epugae loka Yawe, arai teni ibusakinit ngesi aipuga.

11 Apotu Adam ka Keba komengerikis Yawe. Asubit bala abalasi kesi ebe: ‘Mam isio ikoto Yawe kwape epugan kosi. Ipedori isio bon aseun nuejokak ka nueroko.’ Epone ani abeitor Yawe aitemokin akirot ngin? Epone ani ti apedora ngesi aisisianakin isuban kere luacoak ebe mam ikamengerak lu adolitos ido eipugae ke arai cut loajok? Epedori ice alimun ebe ti Edeke emudia ikamengerak lu kosodi bobo abongokin aisub. Konye adaunit Yawe alimun akelosikinet na aileleb akwap kede aur naka Adam ka Keba, ido akoto ngesi kesi aiboi koparadais akwap. (Ageun 1:28) Itodolinikini Yawe duc akelosikineta. (Isaia 55:10, 11) Karaida eja ngun, amudiar ikamengerak komanikor loka Eden, mam ti ebongok aingiset naetolomunitai, arai ibusakinit teni Yawe aipuga.

Ekesisianakinan ka ikesisiak

Eco kereka esisian adepar ekesisianakinan?

12 Kaanyutu ber aitupuset. Koany bala ejai esisianakinan aitodikin esisiak eipone loiswamaet aimar naetiono. Ebala esisian loepali loeco konye kipaliono ebe, eipone loiswama esisianakinan mam erai loabeit. Kanu aitoduun ebe mam esisianakinan lo epedorit, ebala esisian loepali ebe ejeni ngesi eipone loajokan loebeitor aiswama aimar ngin. Icedwe da eomitos ebe edolit ngesi, kosodete kesi da aipalikin. Anyoika nuibusakinit esisianakinan aswam? Arai irengia ngesi esisian loepali kinga, anyoika nuepedorete lucedwe aomoom? Mam kereka kesi epedorete acamun ebe, esiometait kec ka luapotu kimorikikinos kanges eraasi luadolitos? Icedwe lukatukot epedorete ainger aijaikin esisianakinan ngol ayongit, komitos ebe ekuriana ngesi aitoduno ebe mam ejeni aimar. Dobodo, arai ecamaki esisianakinan esisian loepali aitodikin atukot epone loebeitor aswam aimar ngin.

13 Kwape kwangin, eswama Yawe ibore yen eputosi kede nuabu esisianakinan loitupuset wok kiswama. Kiitu ebe mam arai ikamengerak bon luajaasi Eden ekamunitos ngun. Imilionin luka imalaikan kesi asesenete. (Yob 38:7; Daniel 7:10) Epone lo abeitor Yawe aitemokin emwangit ngol nges abeit atiror imalaikan ngul kere ido akaulo itunga da. Aso, anyoika nu eswama Yawe? Acamaki ngesi Satan aitodun epone lo ipuga ngesi itunga. Acamaki bobo Edeke itunga aipugaikin bonik, ingarenikite Satan kesi.

14 Ejeni esisianakinan lo aitupuset wok ebe esisian loepali ka esisiak luigangito ngesi mam edolitos. Konye, ejeni bobo ngesi ebe ainakin kesi apak naitodun akirotokec nges ebuni aimeda atukot kere. Neipikoria esisian loepali aimar ngin, emisikinete do esisiak lumunon kere ebe, esisianakinan bon ngesi itutuoritai aisisianakin atukot. Epedorete do kesi amisikin nuinakinete esisianakinan airengeriar ediosisian loepali kere kotoma atukot. Kwapekwangin, ejeni Yawe ebe itunga kere lumunon ka imalaikan epote aimeda kotoma aanyun ebe epiko Satan kede egangitok ke, ido da mam itunga epedorete aipugaikin bonik. Kwape abu enabi Yeremia kisisiauna, epote kesi da aisisiaun abeit na: “Wu Ejakait, ajeni ebe erot loka ituŋanan emamei kotomake ilopet: Emamei kotoma otuŋanan yenelosi aitetenar akekeje.”—Yeremia 10:23.

KANUKINYO ACAMAKINA YAWE AITICANITOI ADAUN APAK NAEPOL?

15 Konye kanukinyo acamakina Yawe aiticanitoi adaun apak naepol? Ido kanukinyo mam ngesi itikokina iboro luarokok aiswamaunun? Koany iboro iarei numam esisianakinan lo aitupuset wok ebuni aswam. Nasodit, mam ngesi isimiki esisian loepali aitodun akeswam. Nakiaret, mam esisianakinan ingarakini esisian loepali aitodun akeswam. Kwape kwangin, koany iboro iarei lu adau Yawe aitogogong mam aswam. Nasodit, mam ngesi isimikit Satan kangul luigangito ngesi aitam aitodun ebe edolitos kesi. Acamakin apak naepol atubor nges cut ebusakinit. Kotoma okar luipu luatuboros, apedosi itunga atamanar ediopone kere loka ayaikina bon, araibo apugae loka itunga. Karaida apedosi itunga apolo kotoma otatai ka adoketa ace, amamus etube, ican, amengeranut ka ijiisio kes eyatakinos. Itodunitos do nu kwana ebe mam itunga epedorete aipuga.

16 Nakiaret, mam Yawe ingarakinit Satan aipuga akwap na. Arai Edeke aitikokin atiokisio, mam ti kereka ngesi ejai aingarakin ikamengerak ngul? Mam ti kereka Edeke einakin itunga aomoom ebe, aticepak epedorete kesi aipugaikin bon komameete nueroko nuetakanunete. Arai Yawe aswam koipone kangol, ti ngesi da eraun loigangit aingal. Konye “mam epedori Edeke aiŋal.”—Iburanian 6:18.

Ingarakini ijo Edeke atitingikin atiokisio kere

Aberu italakari Akirot Naka Edeke

17 Dobodo, atiokisio kere nueswamaunos kotoma apak na amengerikinitere Edeke? Ejok oni aiitun ebe erai Yawe lokapedor kere. Aso, epedori ngesi alemar nu ayau aiticanitoi otunga. Kwape idaunitor oni aisisiaun, ebunio aitemokin akwap namunaun koipone lo aitaraun aparadais. Ebuni ngesi alemar nuayau adiakar kitosomai alucet naka Yesu, ido alemar nuayau atwanare, kitosomai ajarun. Ebuni Edeke aitosom Yesu ‘amudiara aswamisio nuka Satan.’ (1 Yokana 3:8) Ebuni Yawe ayaun nu kotoma apak alopet. Ipedori oni aiyalamikin ebe mam ngesi abu kiswamau nu katipet, naarai ainaki aketitingikin oni arereng na aisisaun abeit ka aijanakin ngesi. (2 Petero 3:9, 10) Konye ejai ber Edeke emoi amaak lukabeit ka angaranakin kesi atitingikin adio aiticanitoi kere na ebunokin kesi kotoma akwap kana naileleba atiokisio.—Yokana 4:23; 1 Ikorinton 10:13.

18 Epedorete ice abuonokin ebe, Aiticanitoi na kere ti emamei arai Edeke kosubite Adam ka Keba komam epedorete adiakar? Kanu abongokin aingiset ngin, ibusakinit ijo aitun ainakinet naetiai naenakinit Yawe ijo.

EPONE ANI IBUNIA IJO AITOSOM AINAKINET NAKA EDEKE?

19 Kwape kisisiator oni Kosula 5, asubitai itunga kede apedor naka aseun nuiswama. Ijeni ijo ebe erai ngin ainakinet naetiai? Esubit Edeke itiang luipu noi, ido itosomaete kesi acoa naurunet. (Awaragasia 30:24) Itunga da eswamata acuman numam epedorete aseun nuebeit aswam bonik. Tikereka oni iyalama karai kosubite Edeke oni koipone kangol? Mam cut. Iyalama oni naarai kijaar ailajara naka aseun aswam nuikoto oni, aijar naikoto oni atupakin, ipapero luikoto oni ajaar, ka ace da. Imina oni ajaut ka ailajara, ido ngupengun ekoto Edeke oni alelakin.

20 Mam Yawe emina itunga aijanakin ngesi kaitingaikinio. (2 Ikorinton 9:7) Kwape aanyunet: inyoin bo isialamikini aurian noi—ikoku alimun ebe “amina eong ijo” naarai elimokinitai ngesi alimun kwangin, araibo ngesi ilopet alimun kotauke? Konye erai do aingiset ebe, eipone ani ibunio ijo aitosom apedor naka aseun naeyinakinit Yawe ijo? Apotu Satan, Adam, ka Keba itosomata apedor naseun erono cut. Apotu kongeroto Edeke Yawe. Anyoika nu ibuni ijo aswam?

21 Ijaatar ijo kede arereng na aitosom ainakinet naumokin naseun aswam nuejokuka. Ipedori ijo aimorikikin kede imilionin luaseutu aibwo kowai loka Yawe. Einakinitos Edeke alakara naarai iswamaete kesi nuepedorete kere aitodun ebe erai Satan ekengalan ido loepiko cut aipuga. (Awaragasia 27:11) Ipedori ijo da aswam ngun koipone loaseun erot loka aijar loajokan. Ebunio aitetem nu kosula loetupakini.

NUISISIANAKINI EBAIBULI

  • Mam erai Edeke eyaunit ejautene lokaronon loejai toma akwap.—Yob 34:10.
  • Kanu anyara Edeke engalan ido da ebe ejaasi iboro luejokak luemikit ngesi itunga luipugat, abu Satan kijaik abuonokin arai ibusakinit teni Yawe aipuga.—Ageun 3:2-5.
  • Ebuni Yawe aitosom okokuke, Epugan loka Ajakanut, alemara aiticanitoi kere ka aijulakin nu ayangautu ngun.—1 Yokana 3:8.

Aigiseta

1, 2. Anyoin aiticanitoi na itereikina itunga lolo, ido anyoika aingiseta nu einakin nu luipu aingit?

3, 4. (a) Inyo itodunit ebe mam erono aingit nu ecamakinitor Edeke aiticanitoi? (b) Epone ani epupio Yawe nuikamunitos aronis ka aiticanitoi?

5. Anyoika akiro nu etapit ainanakin kanu aitetem aiticanitoi naka itunga, konye anyoika nuisisianakini Ebaibuli?

6. Inyo einakinit itunga luipu ibucaritos aitoronit Edeke kanu aiticanitoi kere naejai toma akwap?

7, 8. (a) Epone ani itodunitor akwap iponesio luka epuganike? (b) Epone ani ayauna adiakanar naka itunga kede ‘apak ka nuengesunos’ aiticanitoi?

9. Kanukinyo ipedoria oni amunokin cut ebe ejaatar Yawe kede akirot naejok naecamakinitor ngesi aiticanitoi aiyatakin?

10. Anyoin aingiset nabu Satan kitolomu, ido kopone ani?

11. Kanukinyo mam Yawe abu komudiara ikamengerak kotoma Eden?

12, 13. Kituput nu ainakis Yawe ecamakin Satan araun epugan loka akwap kana ido akiro nu ainakis Edeke ecamakini itunga aipugaikin bonik.

14. Anyoin ameda naebuni kanu Yawe acamakin itunga aipugaikin bonik?

15, 16. (a) Kanukinyo acamakina Yawe aiticanitoi adaun apak naepol? (b) Kanukinyo mam Yawe itikokina atiokisio?

17, 18. Anyoika nu ebuni Yawe aswam nuikamunitos atiokisio nu alomutu kere kotoma opugae loka itunga ka aingarenikinio naka Satan?

19. Anyoin ainakinet naetiai na einakinit Yawe oni, ido kanukinyo ibusakinitor oni aitopolorit nges?

20, 21. Epone ani ipedoria oni aitosom ainakinet naseun aswam nuejokuka, ido kanukinyo ibusakinitor oni aswam kwangin?

KISISIA ACE

Kingit Aisisia Ebaibuli atitai

Kanukinyo Kisisia Ebaibuli?

Kijaikinit Ebaibuli abongonokineta nuka aingiseta nuapolok kotoma aijar nejaas imilionin luka itunga kotoma akwap kere. Ikoto kereka ijo araun ediopet kotoma kesi?