Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika Bo Cut Nuisisianakini Ebaibuli?

NUIYATAKINITAI

Inyoin bo Okatwak (Sheol ka Hades)?

Inyoin bo Okatwak (Sheol ka Hades)?

ITOSOMAT Ebaibuli akirot naka Aburanian sheʼohl′ kana eputosi kangesi naka Ayonanin hai′des adepar irwana 70 kotoma angajepake nusodit. Akiro nu aarei kere eraasi nuikamunitos atwanare. Aijuleta ace nuka Ibaibulin, ijulakitos akiro nu kwape “okatwak,” “hell,” araibo “aipany.” Konye, angajepa nuipu emamete akiro nu ebecokina apolou kec kede akiro nu nuka Aburanian kede Ayonanin. Inyoin bodo apolou cut akiro kanu? Kaanyutu ber oni epone loitosomatere kesi kaiwadikaeta nuegelegela nuka Ebaibuli.

Ebala Ekalimonokinan 9:10 ebe: “naarai emamei aswam, karaida ainerun, karaida aijen, karaida acoa, kokatwak, kama ilosi.” Erai do kereka apolou ke ebe, okatwak (sheol) ngesi aboisit alopet neidaikitai luminan wok? Mam. Nelimunitor Ebaibuli aiboisit alopet neidaio lukatwak, araibo ates, itosomai akiro ace nuka Aburanian ka Ayonanin mere sheʼohl′ ka hai′des. (Ageun 23:7-9; Matayo 28:1) Ido da, mam Ebaibuli itosomai akirot “Sheol” kanu ates neidaikitai itunga luipu, kwape nat neidanakino lukatwak luka okale.—Ageun 49:30, 31.

Erai bodo “Shoel” aiboisit nakepone kani? Itodunit akirot naka Edeke ebe “Sheol,” araibo “Hades,” erai ibore yen edeparit ates naidaikitai itunga luipu. Kwape aanyunet, Ebala Isaia 5:14 ebe: “italalai Okatwak aiŋobeleke, aooŋa da ekeituk namam itemio.” Karaida edaunit okatwak ailikor itunga luipu, esalit nges emiela bobo ice. (Awaragasia 30:15, 16) Konye mere kwape adioboisit neidanakinio itunga, naepedori ayangar enaba loedit kalukatwak, ‘mam okatwak imonikin.’ (Awaragasia 27:20) Mam Sheol cut ilelebunun. Emamete kede esange. Sheol, araibo Hades, mam do erai aiboisit alopet naejai nenice. Dimarai, erai okatwak (sheol) aiboisit na itupusit naejototor luipu lukatwak.

Aisisianakin naka Ebaibuli naikamunit ajarun ingarakin oni apirikin apolou naka “Sheol” kede “Hades.” Itodunit Akirot naka Edeke ebe ngul luelosete Sheol ka Hades epote ajarun.* (Yob 14:13; Aswamisio 2:31; Apukokinio 20:13) Itodunit bodo Akirot naka Edeke ebe ngul luejaasi Sheol, araibo Hades, imoriaritos mere ngul bon luejanakitos Yawe konye luipu da lumam ijanakitos nges. (Aguen 37:35; Isabulin 55:15) Kanuka ngun isisianakin Ebaibuli ebe, “ejaun ajarun naka luedolito ka lumam edolito da.”—Aswamisio 24:15.


*  Koipone kalo egitakina, lukatwak lumam itajaruno, itetemitai ebe mam ejaasi toma Sheol, araibo Hades, konye ejaasi toma ‘Ogeena.’ (Matayo 5:30; 10:28; 23:33) Kwape Sheol ka Hades, mam Geena arai aiboisit alopet.

← Koan nuu kosula aloitetemitai ane