Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika Bo Cut Nuisisianakini Ebaibuli?

NUIYATAKINITAI

Inyoin bo Apaaran Naka Etube?

Inyoin bo Apaaran Naka Etube?

EPONE bani isesenia ijo Apaaran naka Etube? Eomoomitos luipu ebe ibilionin luka itunga ebunio isibwo idiopediopen koingaren loka eicolong loka Edeke. Kanen, ebunio atubokin nginitunganan. Ice ijaikinio aijar naka ikaru kere ka ice etubokino aisiriebio naka ikaru kere. Konye, ijakit Ebaibuli akiro nuegitakina nuikamunitos apak na. Itodunit Akirot naka Edeke ngesi, mere kwape apak naitukuriani, konye kwape apak naka amuno ka aitajario.

Kotoma Apukokinio 20:11,12, kisiomi oni nuitetemit ekiyakia Yokana nuikamutos Apaaran naka Etube, “Kasodi kaany eicoloŋ loepol loekwaŋ, ka ŋol da lokiboie kotoma; kokera akuj ka akwap kakonyeneke, mam bobo kes edumuna aibois. Kaany da lukatwak, lukapolok ka ludidik da, ebwoete koiŋaren keicoloŋ, kopukoroi iitabon. Kopukoroi eceitabo da, loerai loka aijar. Kotubokinai lukatwak kotoma ŋun kanuewadikatai oitabon kwape kejaatar aswamisiokec.” Ingai bodo ekatubon lo itetemitai kane?

Edeke Yawe nges arai Ekatubon Lokapolon loka itunga kere. Konye, ainak nges ecetunganan aswam naka aitub. Kotoma Aswamisio 17:31, ebala Ekeyakia Paul ebe, abu Edeke “kibwaik apaaran naebunio atubokin akwapin kadolit, kotuŋanan loaseunit.” Ekatubon lo loeseunitai nges Yesu Kristo loitajarutai. (Yokana 5:22) Iwori bodo egeunor Apaaran naka Etube? Ido eyangaikin apak naetia bai?

Itodunit eitabo loka Apukokinio ebe egeuni Apaaran naka Etube akaulo naka ejie loenyaritai Arumagedon, nemudairere aswamisio nuka Satan.* (Apukokinio 16:14, 16; 19:19-20:3) Akaulo naka Arumagedon, ecakakinio Satan ka akejokin toma aidaris adaun ikaru elukumit. Kapak kangin, epungak 144,000 lukokuju eraunos ikatubok ido ebunet aipunga kwape ‘ikabakan ka Yesu Kristo adaun ikaru elukumit.’ (Apukokinio 14:1-3; 20:1-4; Iromayon 8:17) Apaaran naka Etube mam erai apaaran naisunyit naeyangaikin isawan 24. Eyangaikin ikaru elukumit.

Kotoma apak kangin naka ikaru elukumit, ebuni Yesu Kristo ‘airabakin ikajarak ka ikatwak da.’ (2 Timoteo 4:1) “Ikajarak” kesi erasi “ekodet loepol noi” luepote aiku Arumagedon. (Apukokinio 7:9-17) Abu ekiyakia Yokana da koany “ikatwak…ebwoete koiŋaren keicoloŋ” loka Etube. Kwape esumunitor Yesu, ‘ŋun luejaasi toma atesin iirarete eporoto ke, elomunete’ kotoma ajarun. (Yokana 5:28, 29; Aswamisio 24:15) Konye, inyoin bo etupio kanu atubokinia kere?

Kotoma aitapoet naka Yokana, “kopukoroi iitabon, kotubokinai lukatwak kotoma ŋun kanuewadikatai kwape kejaar aswamisiokec.” Eraasi kereka iitabon lu, luitodunitos nuiswamatos itunga kokau? Mam, etube mam ebuni aitup nueswamatos itunga erika etwak. Epone ani ijenun oni ngun? Ebala Ebaibuli ebe: “Naarai yenatwana eosikinitai anyoun kadiakar.” (Iromayon 6:7) Ngul luitajarunio, elomunete toma aijar emamete kede adiakar. Ibusakinit do iitabon lu kitodunitos alosikineta ace nuka Edeke. Kanu aijar ikaru kere, ngul luekuete Arumagedon nepepe ka ngul luitajaruno, ejaun airimar ikisila luka Edeke, aimoriarite ikisila luitetiak luaticepak itolomuni Yawe apak kangin naka ikaru elukumit. Kwangin do, ebunio atubokin nginitunganan kotupitete nuiswamaete kesi kotoma Apak kangin naka Etube.

Ebuni Apaaran naka Etube ainakin ibilionin luka itunga arereng nasodit kanu asisia akote naka Edeke ka atupakin da ngun. Apolou ke ebe ejaun aswam naepol noi naka aisisianakin itunga nuekot Edeke. Kabeit, “isisiaunete luiboiete kakwap adolit.” (Isaia 26:9) Konye, mam kere epote akapakin atupakin akote naka Edeke. Ebala Isaia 26:10 ebe: “Karaida kitodikin yenikaronon asianut, mam cut isisiauni adolit; kakwap naka atenit iswamai nukaronok, eŋeri asesen apolou naka Ejakait.” Ebunio amudiar itunga lukaronok cut kotoma Apak naka Etube.—Isaia 65:20.

Kosange loka Apaaran naka Etube, epote itunga luejarete ‘adumun aijar’ kaileleba kwape itunga luedolitos. (Apukokinio 20:5) Ebuni do Apaaran naka Etube ainyakakin itunga ojautene losodit loadolit. (1 Ikorinton 15:24-28) Ejaikin do aitemio nakawasia. Elacakinio Satan kaidarisike kosodete acamakin ngesi bobo aitam aingalingala itunga nawasia. (Apukokinio 20:3, 7-10) Ngul lu itepegete ngesi epote ailel kaileleba aisumunet naka Ebaibuli naebala ebe: “Irumete ikadolitok akwap, ebusete kotoma ikar kere.” (Isabulin 37:29) Eebo, erauni Apaaran naka Etube naka arereng mama ejaasi itunga kere lumunon!


*  Kanu ajenun nuipu nuikamunitos Arumagedon, koany eitabo Insight on the Scriptures, Volume 1, apapulai 594-5, 1037-8, ka esula 20 loka etabo Worship the Only True God, luinomitos Ajenak luka Yawe.

← Koan nuu kosula aloitetemitai ane