Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika Bo Cut Nuisisianakini Ebaibuli?

NUIYATAKINITAI

Inyamat Luka Ejakait Luka Abong—Aiitunet Naijaikini Edeke Angosibib

Inyamat Luka Ejakait Luka Abong—Aiitunet Naijaikini Edeke Angosibib

ECORAKINITAI Ikrisitayon aiitunun atwanere naka Kristo. Aiitunio na nges enyaritai “Inyamat luka Ejakait luka Abong” (1 Ikorinton 11:20) Ani nuepolok nuikamunitos ngesi? Iwori, ido epone ani ibusakinitor aiitununio atwanare naka Ejakait?

Abu Yesu Kristo kitegeik aiitunio naka atwanare ke kotoma akware naka Epasika loka Iyudayan kokaru 33 A.N.Y. Arai Epasika loeyiitununo irwan atipet bon kokaru, kapaaran na 14 kolap loka Nisan loka Iyudayan. Kanu ajenun apaaran na, apotu Iyudayan kidarenenete apak nakekaru naeriakatatar akware kede apaaran. Erai na apaaran naejatar isawan 12 luka aicaa kede isawan 12 luka akware. Aanyunet naka elap loitetet koyapiarite neariakatotor apaaran kakware nges etodunit ageunet naka Nisan. Enuminumio do epasika apaaran na 14, kedau akolong alomar.

Abu Yesu kinumunum Epasika ka ikesisiak, kotwara Yuda Isikariot, kosodi konyet aitegeikin Inyamat luka Ejakait luka Abong. Abu ainumunum na kojaikin aiboisit naka Epasika loka Iyudayan. Kanukangun, ebeit do aiitunun ngesi Irwan atipet bon kokaru.

Inerit Eijir loka Matayo ebe: “Kolem Yesu emugati, kisirereŋ, kobilibil, koinak ikesisiak, kobala ebe, Kolemutu, konyamata; lo ŋes akakuan. Kolem akoli da, kedau aimal, koinak kes, kobala ebe, Komata yesi kere lo: naarai nu kes akaokot nuka aitutuket, nuebukoros kanuka ikepuak alemar aronisio.”—Matayo 26:26-28.

Eomitos ice ebe abu Yesu kijulak emugati araun akekuan ka ebino da araun akeokot. Konye, kajai akuan naka Yesu kere. Konye biai, anyamete ikesisiak akuan naka Yesu ido komasete aokot ke da? Mam, tii ngin erai ainyam itunga kede aibil ekisil loka Edeke. (Ageun 9:3, 4; Ilebin 17:10) Kotoma Luka 22:20, abala Yesu: “Akoli na erai aitutuket nakitetet kotoma aokotoka, nuebukoros kanukus.” Konye, abu akoli na koraun “aitutuket naitetet”? Mam ngun ti epedoros, kwape eraar aitutuket aisumunet, mere ibore ilopet.

Emugati ka ebino

Kanuka ngun, emugati ka ebino kere araasi aanyuneta. Erai emugati aanyunet naka akuan naka Yesu naedolit cut. Abu Yesu kitosom emugati lo edeuna konyamat luka Epasika. Enomitai emugati komam itubunitai, araibo ibwaikitai ainyeles. (Anyoun 12:8) Itosomai Ebaibuli ainyeles kwape aitupuset naka adiakar araibo aronis. Ebwoikit do emugati akuan naka Yesu naedolit nabu nges koinak. Amamete kede karonis.—Matayo 16:11, 12; 1 Ikorinton 5:6, 7; 1 Petero 2:22; 1 Yokana 2:1, 2.

Ebino loka arengan ebwoikit aokot nuka Yesu. Itodolikinete aokot aitutuket nakitetet. Abala Yesu ebe ebukorio aokot ke kanu “alemar aronisio.” Epedorete do itunga araun luelaete kakonyen nuka Edeke ka alomar aitutuket nakitetet kede Yawe. (Iburanian 9:14; 10:16, 17) Aitutuket na, araibo aisumunet, einakini Ikristayon lumunon 144,000 alosit kuju. Kangina, ijanakinete kesi kwape ikabakan ka isaseredotin kanu arerengesio nuka itunga kere.—Ageun 22:18; Yeremia 31:31-33; 1 Petero 2:9; Apukokinio 5:9, 10; 14:1-3.

Ingai bo ebeit ainyam emungati ka aimat ebino luka aiitu net na? Kaijen, ngul bon luejaasi toma aitutuket nakitetet—nges atemar ngul bon luejaatotor amuno naka alosit kuju—kesi enyamate emungati ka aimat ebino. Emoyo lokalaunan loka Edeke nges itijenikini ngul ebe eseunitai kesi araun luebeit aipuga kokuju. (Iromayon 8:16) Ejaasi kesi bobo da aitutuket kede Yesu kanu Ajakanut.—Luka 22:29.

Dobodo ngul luejaatotor amuno naka aijar ikaru kere kotoma Paradais kakwap? Erimaritos kesi aicorakinet naka Yesu kosodete ajanakin aiitunet naka Inyamat Luka Ejakait Luka Abong, ido epote kesi kwape eyiitunok luenakinitos aibuses, konye mere ainyam ka aimat. Irwan tipet bon kokaru, kolap Nisan eraasi apaarasia 14 kedau akolong alomar, iiyutununete Ajenak luka Yawe Abong naka Ejakait. Karaida ikidioko ngul luejatotor amuno nakokuju, erai aiitunet na, naepol noi mama ejaasi Ikrisitayon kere. Erai na apak naibusakitor kere aomoom nuikamunitos amina naitelekarit kere naka Edeke Yawe ka Yesu Kristo.—Yokana 3:16.

← Koan nuu kosula aloitetemitai ane