Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika Bo Cut Nuisisianakini Ebaibuli?

ESULA LOITOMONET

Imalaikan—Nuiswamaikinete Kesi Oni

Imalaikan—Nuiswamaikinete Kesi Oni

Ingarakinitos kereka imalaikan itunga?

Inyoin bo iswamanakinete imalaikan lukarokok itunga?

Ibusakinit kereka oni akuriau imalaikan lukarokok?

AJENUN itunganan imoriarit duc aijen ace nuikamunitos ekaleke. Kwapekwangin, ajenun Edeke Yawe da, imoriarit ajenun ejok ekaleke loka imalaikan. Enyarit Ebaibuli imalaikan “Idwe…luka Edeke.” (Yob 38:7) Anyoin aswam kec kotoma alosikinet naka Edeke? Ejaasi kereka nuiswamatotor kesi kaijar naka itunga lukolosek? Ikamunitos kereka aswamisio nuka imalaikan aijarakon? Arai erai kwangin, koipone ani?

2 Inerit Ebaibuli akiro nuipu nuikamunitos imalaikan. Kaanyutu adis kotoma akiro nu tetere isisiauni nuipu nuikamunitos kesi. Aibo keponiata imalaikan? Ebalas Ikolosain 1:16 ebe: “Naarai kotomakeŋ [Yesu Kristo] ŋes kesubere iboro kere, luejaas toma akuj, ka luejaas toma akwap.” Kanukangun, isuban lumoyon kere luenyaritai imalaikan kesi kangindiopet esubit Edeke Yawe kitosomai Okokuke lokiyai. Eraasi bo imalaikan imwasai? Itodunit Ebaibuli ebe esubitai imilionin ka imilionin luka imalaikan, ido kesi kere egogong.—Isabulin 103:20.*

3 Elimokinit oni Ebaibuli, Akirot naka Edeke ebe nekesubure akwap, apotu “Idwe da luka Edeke kere kikareoto kanuka aiyalama.” (Yob 38:4-7) Idelelei do ebe kajaasi imalaikan sek eroko akwap ka itunga da kesubuna. Itodunit bobo aiwadikaet na naka Ebaibuli ebe, epedorete imalaikan da aitodun aiyalama, naarai inera ebe apotu kesi ‘kikareoto kanuka aiyalama.’ Koany ebe apotu ‘idwe da luka Edeke kere’ kikareoto nepepe. Kapak kangin, araasi imalaikan kere ekale ediopet luemorikikina aijanakin Edeke Yawe.

AINGARAKINIO KA AIDARIO NAIJAIKINITOS IMALAIKAN

Emalaika eyuari Daniel abua naka ingatunyo

“Abu Ekadeke kijuk ekemalaika, kitubuta aituke nuka iŋatunyo.”—Daniel 6:22

4 Ageun neanyunata imalaikan luemunoko asubio naka itunga lusodit, apotu kesi kitodutu amina naepol nejai ekale loka itunga ka aitodolikinio naka alosikinet naka Edeke. (Awaragasia 8:30, 31; 1 Petero 1:11, 12) Konye kakaulo, apotu imalaikan koanyutu ebe, apotu itunga luipu kinyeikis aijanakin Lokasuban kec loemina. Komam abuonokin, apotu nu kitakadikis imalaikan lumunon. Konye neibelokinor idiopet kotunga nejai Yawe, “Ejai alakara kakonyen nuka imalaikan.” (Luka 15:10) Kwape eminatar imalakan itunga luijanakinete Edeke, ipedori oni amisikin nuenakinitos Yawe itosomaenenei imalaikan aigangitor ka ayuaritor ikejanakinak lumunon kakwap. (Iburanian 1:7, 14) Esisiata ber ace kotoma aanyununeta kanu.

5 Apotu imalaikan iarei kingarakis Lot etunganan loadolit ka adweke aiku amudiaro naka ireria luka Sodom ka Gomora luaroko koipone lo aitolomun kesi kinga kaiboisit kangin. (Ageun 19:15, 16) Etuboros ikaru luepu, aponi kocakakinai enabi Daniel abua naka ingatunyo, konye mam kesi apotu kikangasata ngesi ido kobala ebe: “Abu Ekadeke kijuk ekemalaika, kitubuta aituke nuka iŋatunyo.” (Daniel 6:22) Kapaarasia nuka ikiyakia, abu emalaika kolacak ekiyakia Petero kotoma aidaris. (Aswamisio 12:6-11) Apotu bobo imalaikan kingarakinitos Yesu kotoma ageunet naka alimonokinike kakwap. (Marako 1:13) Ido nepe ayapior Yesu atwanare, kotakanik ngesi emalaika ido “kitogogoŋ ŋes.” (Luka 22:43) Ebusakinit kijaikinete aitalakario ngin Yesu aitigogongio noi kapak kangin napol kaijarake!

6 Mam bobo imalaikan kwana itanyanakinos itunga luka Edeke kakwap. Konye karaida mam oni ipedori aanyun kesi, imalaikan luka Edeke luegogong eroko eyuaritos iketunga, kanoinoi, kanejai adiotionis kere naepedori adoikin kesi kakiro nuka omoyo. Ebala Ebaibuli ebe: “Idukuri emalaika loka Ejakait alukun ŋul lueyoŋito ŋes, eyuuni da kes.” (Isabulin 34:7) Kanukinyo ibusakinitor akiro ngun aijaikin oni agogong? Naarai ejaas imalaikan lueroko noi luekotosi aimusung oni! Luangai bo kesi? Aibo eponiata kesi? Epone bo ani etamitotor kesi aimusung oni? Kanu adumun abongokineta nuka aingiseta kanu, kaanyutu ber oni nuapotu kotakanutu kotoma ageunet naka itunga.

IMALAIKAN LUERAAS LUKASURUP WOK

7 Kwape isisiator oni kosula lokiuniet koitabo kalo, abu ediopet komalaikan kojaikinos kede eipud loka aipuga luce kosodi amengerikin Edeke. Kakaulo, abu emalaika lo kojenun kwape Satan Ekejodijodon. (Apukokinio 12:9) Ketuboros ikaru luyapikitos 1,600 akaulo naengalingala ngesi Keba, abu Satan kopedo aibelokin itunga ti kere kanejai Edeke dimarai idis bon luamunoko, kwape nat Abel, Enok, ka Noa.—Iburanian 11:4, 5, 7.

8 Kapaarasia nuka Noa, apotu ice komalaikan komengerikis Yawe. Apotu kojalakis aboisiokec kokale loka Edeke kokuju, kopotu kwap, kosodete anapakin awate nuka itunga. Kanukinyo? Kisiomi oni kotoma Ageun 6:2 ebe: “Koanyut odwe luka Edeke adwe nuka ituŋa ebe ejokuka; komanyata aŋor kotoma kaŋun kere nuaseununete kesi.” Konye mam Edeke Yawe abu ocamak aswamisio nuka imalaikan kalu kede aswamisio nukaroko nuka itunga aiyatakin alosit ingaren. Abu ngesi koyau akalele toma akwap nabu kolelea itunga kere luaroko. Konye abu koyua ikejanakinak lumunon bon. (Ageun 7:17, 23) Kwape kwangin, apotu imalaikan luaronok, araibo ajokin, kolacasi awatekec nutunga kosodete abongor kuju kwape isuban lumoyon. Apotu do kesi kimorikikinos kede Ekejodijodon loabu koraun “Lokapolon loka ajokin.”—Matayo 9:34.

9 Neabongoriata imalaikan luamengerikitos Edeke kuju, mam aponi kocamakinai kesi nepepe ka Satan lokapolonikec aimorikikin kede imalaikan lukajokak. (2 Petero 2:4) Karaida mam kesi bobo epedorete ainap awate nuka itunga, erokosi kesi ingalingalete itunga aswam iboro lukaronok. Kabeit, ‘iŋaliŋali Satan akwapin kere kingarakinitos ajokin nu.’ (Apukokinio 12:9, 1 Yokana 5:19) Koipone ani? Itosomaete ajokin iwaitin luegelegela kanu aingalingala itunga. (2 Ikorinton 2:11) Aso kaanyutu ber oni ice kowaitin kalu.

EPONE LO INGALINGALATA AJOKIN ITUNGA

10 Kanu aingalingal itunga, itosomaete ajokin ecudet. Ecudet nges itunganan ilopet einer kede ajokin, karaibo einer kakesi kitosomai emuron. Itoronit Ebaibuli ecudet ido ikwenyarit oni ainac idiobore kere yeni iswamanara kede nges. (Igalatian 5:19-21) Itosomaete ajokin ecudet kwape itosoma alokan agaria iritan. Itosomai alokan agaria iboro luegelegela kanu aikamia agaria. Kwape kwangin, itosomaete ajokin da iwaitin luka ecudet luegelegela kanu aingalingala itunga.

1. Aigic aicer; 2. Airere akanin; 3. Aroanar amour; 4. Etungenen esiomi akadin

Itosomaete ajokin iwaitin luegelegela kanu aingalingala itunga

11 Ediopet kowaitin luitosomaete ajokin ngesi aidwar. Inyoin bo aidwar? Ngesi aitam ajenun akiro nukoingaren araibo icebore yen mam nuke ejenaasi. Ice kowaitin luedwarere kesi aigic aicer, aitosom akaadin, aroanar amoru arai acupai, airere akanin, ka aimo aanyununeta nukaumokin kotoma airujasia. Karaida eomitos itunga luipu ebe mam erono aidwar, itodunit Ebaibuli ebe iswamanara adwarak nepepe kajokin. Kwape aanyunet, elimunitos Aswamisio 16:16-18 nuikamunitos “ajokit naka aidwar” nainakit apese epedorit “aidwar.” Konye abu apese na kotwania apedor ke nerengiarere ajokit ngin kaneajai ngesi.

12 Epone ece loingalingaliata ajokin itunga nges aisinyokikin kesi aingitunun akiro nuikamunitos lukatwak. Itunga luekudianete kanuka atwanare naka luminan kec, etapit duc aingalingalio kede aomisio numam edolitos nuikamunitos ngul luatwakata. Epedori emuron ainakin akiro nuitegelikina araibo einer kede eporoto loeputos kaloka itunganan yen etwanit. Kanukangun, ecamunete do itunga luipu ebe, ejarete cut lukatwak ido aingitun kesi epedori aingarakin luejarete atitingikin aiticanitoi. Konye “aitalakario” adio naedumun, nges erai naka aingal ka naeyauni ationis. Kanukinyo? Naarai epedorete ajokin aisisia eporoto loka itunganan yen etwanit ka ainakin emuron akiro nuikamunitos yen atwan. (1 Samuel 28:3-19) Ido, kwape isisiaunitor oni Kosula 6, mam bobo lukatwak ejaasi. (Isabulin 115:17) Aso, “yenikeŋitan lukatwak” ngesi engalasi ajokin ido iswamai aitepeg akote naka Edeke. (Ikisila 18:10, 11; Isaia 8:19) Kanukangun, kocoite eipone lo loerono, loitosomaete ajokin.

13 Mam ajokin esangakinitos aingalingala bon itunga, konye itukurianete da. Lolo, ejenete Satan ka ekejokin ebe ‘edit apakec’ naideuna eroko emudiara kesi, ido eyatakis adedengar noi adepar lem sek. (Apukokinio 12:12, 17) Karaida, ilukumin luka itunga lueboenenete kotoma akuriau naka ajokin alacakinos. Epone ani atakanunata nu? Anyoika nuepedori itunganan aswam karaida elomarit ngesi toma aswamisio nuka ecudet?

EIPONE LOITEPEGET IMALAIKAN LUKAROKOK

14 Elimokinit oni Ebaibuli eipone loitepeget ajokin ka eipone loilacunor kamakec. Koany aanyunet naka Ikristayon lukolosek lueboiete kore loka Epeso. Ice kakesi eswamaete nuka ecudet eroko erauna Ikristayon. Neaseunata kesi alacun kotoma ocudet, anyoika nu apotu kesi kiswamaata? Ebala Ebaibuli ebe: “Ituŋa luipu kaŋul lukiswamaete nukamurwonut, kotukonokis ikeceitabon, kicweata kakonyen nuka ituŋa kere.” (Aswamisio 19:19) Necwearata ikeceitabon nukamurwonut, apotu Ikristayon ngul luetetiak kitodutu aanyunet najokan naekot ngul luekotosi aitepeg ajokin lolo aitup. Itunga luekotosi aijaanakin Yawe ibusakinit alemar idiobore kere yeniswamanara kede ecudet. Imoriaritos lu itabon, apapulai, aputosia nuka esineman, apositan, atepun nuka ikososinei nuisinyokinitos aswamisio nuka ecudet kosubitos bala ejokuka ido kitelelete. Imoriaritos bobo lu iboro kwape nat, imukisai, ilitia araibo iboro ice luenapitio kanu ebe ayuaror.—1 Ikorinton 10:21.

EIPONE LOITEPEGET IMALAIKAN LUKAROKOK

  • Kolema iboro kere luka ecudet
  • Kisisiaenenei Ebaibuli
  • Kilipenenei nejai Edeke
Etungenen iswamai nuibusakinitos kanu ayuar kotoma kocudet

15 Ketuboros ikaru ice akaulo naecwearatar Ikristayon luko Epeso ikeceitabon nukamurwonut, abu ekiyakia Paul kiwadikak kesi ebe: “Kiwuta…ka ajoresio nuka imoyon nuka aronis.” (Ipeson 6:12) Mam ajokin apotu kopalasi. Arokosi kesi itijiete Ikristayon. Inyo do icebore ebusakinit Ikristayon ngul aswam? Abala Paul ebe “Aitelekarit kere, kolemutu ebuku loka aiyuun, loipedoriata aitudeŋ imalia kere luenokete luka lokaronon [Satan].” (Ipeson 6:16) Negogongoror ebuku loka aiyuun wok, nepepen egogongoror aisipeg wok da ajokin.—Matayo 17:20.

16 Epone ani ipedoria oni aitogogong aiyuun wok? Koipone lo aisisia Ebaibuli. Agogong naka arwatat elomun koipone loejaar agogong naka apetetaitike. Kwape kwangin da, agogong naka aiyuun wok, elomuni koipone loejaar akepetetait, ngesi adumun aijen nakabeit naka Ebaibuli. Arai kisiomi oni ka aisisia Ebaibuli kanginipaaran, egogongor aiyuun wok. Kwape arwatat naegogong, igaliori oni aiyuun kwangin kama ejai aiticanitoi naka ajokin.—1 Yokana 5:5.

17 Inyo bobo icebore ebusakinit Ikristayon ngul luko Epeso aswam? Akoto kesi aiyatakin adumun ayuara ace naarai eboiete kesi kore loapol ecudet. Aso abu Paul kolimok kesi ebe: “Kilipenenete apakio kere k[o]moyo, kailip kere ka aiŋaiŋa.” (Ipeson 6:18) Kwape kiboio oni da kakwap naepol ecudet, ailip naingainga Yawe kingarakin oni da aitepeg ajokin. Eebo, ibusakinit oni aitosom ekiror loka Yawe kotoma alipasinei wok. (Awaragasia 18:10) Ibusakinit oni aiducokin ailipenen nejai Edeke kanu ‘ayuun oni kama ejai lokaronon,’ Satan Ekejodijodon. (Matayo 6:13) Ebongokini Yawe alipasinei kwangun.—Isabulin 145:19.

18 Ededeng imalaikan lukarokok, konye karai itepegi oni Ekejodijodon ido kekunyakinitos nejai Edeke koipone loaswam akote ke, mam ibusakinit oni akuriau kesi. (Yakob 4:7, 8) Ejai esange loka apedor naka imalaikan lukarokok. Aponi kitisilarai kesi apakio nuka Noa, ido ebeit kesi adumun atubokiniokec nakawasia koingaren. (Yuda 6) Konye kiitu ebe kiyuaritos oni imalaikan luegogong luka Yawe. (2 Ikabakan 6:15-17) Epodokinitos imalaikan ngul cut aanyun ebe ipedori oni aitepeg imalaikan lukarokok. Ejaas imalaikan luedolito aisinyikokin oni. Aso keyatakis adukun edicane kede Yawe ka ekaleke loka imalaikan lumunon. Kenacata ediopone kere loka ecudet ido ketosomaete duc aicoreta nuka Akirot naka Edeke. (1 Petero 5:6, 7; 2 Petero 2:9) Ipedori do oni amunokin aipikor imalaikan lukarokok kotoma ojie wok.

19 Konye, kanukinyo ejalakitor Edeke imalaikan lukarokok ka aronis na einakinit itunga aiticanitoi naepol noi? Ebunio abongokin aingiset ngin kosula loetupakini.

NUISISIANAKINI EBAIBULI

  • Ingaranakinete imalaikan lumunon itunga luijanakinete Yawe.—Iburanian 1:7, 14.
  • Satan ka ekejokin ingalingalete itunga ka aitapaar kesi kanejai Edeke.—Apukokinio 12:9.
  • Arai kiswama ijo akote naka Edeke kosodi aitepeg Ekejodijodon, ebuni Satan akerit kanejai ijo.—Yakob 4:7, 8.

*  Nuikamunito imalaikan luedolitos, ebala Apukokinio 5:11 ebe: “Etiaikec keraasi ilukumin itomon irwan ilukumin itomon ka ilukumin irwan ilukumin.” Aso itodunit Ebaibuli ebe esubitai imiliion ka imilionin luka imalaikan.


Aigiseta

1. Kanukinyo ibusakinitor oni aisisia nuikamunitos imalaikan?

2. Aibo keponiata imalaikan, ido eraasi bo kesi imwasai?

3. Anyoika akiro nuikamunitos imalaikan nuelimokinit oni Yob 38:4-7?

4. Epone ani itodunitor Ebaibuli ebe epodokinitos imalaikan lumunon iboro luiswamaete itunga?

5. Anyoika aanyununeta nuka aingarakinio naka imalaikan nu idumakini oni Obaibuli?

6. (a) Epone ani eyuaritotor imalaikan itunga luka Edeke lolo? (b) Anyoika aingiseta nuebeit oni kwana aitetem?

7. Etiasi bo itunga ai luabu Satan kopedo aibelokin kanejai Edeke?

8. (a) Epone ani apotu imalaikan ice koraunotor ajokin? (b) Kanu aiku akalele naka kapaarasia nuka Noa, inyo apotu ajokin kiswamata?

9. (a) Inyoin bo abu kotanik ajokin neabongoriata kesi kuju? (b) Anyoika nuilosi oni aisisia nuikamunitos ajokin?

10. Inyoin bo ecudet?

11. Inyoin bo aidwar, ido kanukinyo ibusakinitor oni ainac nges?

12. Kanukinyo eronar aitam einer kede lukatwak?

13. Inyo apedosi luipu lulem akuriaka ajokin aswam?

14. Kwape Ikristayon lukolosek lueboiete kore loka Epeso, epone ani ilacakinor oni kanejaas ajokin?

15. Kanu aitepeg ajokin, inyo ibusakinit oni aswam?

16. Epone ani ipedoria oni aitogogong aiyuun wok?

17. Inyo bobo icebore yeni ekoto oni aswam kanu aitepeg ajokin?

18, 19. (a) Kanukinyo imunor oni aipikor imalaikan lukarokok kotoma ojie wok? (b) Anyoin aingiset naebunio abongokin kosula loetupakini?