MAM Ebaibuli erai alibunet naka apaarasia nukapolok nuinuminumio kodiinin ka apunganisinei kotoma aibosio nuipu kakwap lolo. Ani bodo alibunet naka ainumunumeta kanu? Arai kilot ijo aingadis naka itabon, ibuni ijo aduman nuipu nuineritos itabon nuikamunitos apaarasia nukapolok nuejenara kakwap. Kaanyutu ber oni aanyuneta adis.

Epasika. Ebala eitabo The Encyclopædia Britannica ebe, “Emamete nu itodunitos ainumunumio naka Epasika Aitutuket Nakitetet.” Epone bodo ani ageunia Epasika? Elibunit kaima naka ikapirin. Karaida abeit Epasika araun apaaran naiyiitunere ti ajarun naka Yesu, inonosio luewupanara kanges mam eraasi luka Ikrisitayon. Kwape aanyunet, ebala eitabo, The Catholic Encyclopedia ebe: “Erai ipoo ajenunet naka ikapirin ido korai duc aanyunet naka auri.”

Ainumunum Ekaru Loitetet. Apaarasia ka inonosio nuikamunitos Ekaru Loitetet egitigita kakwapisinei. Nuikamunitos alibunet naka ainumunum na, inerit eitabo The World Book Encyclopedia ebe: “Abu epugan loka Iromayon, Julius Caesar kitigogong Januari 1 kwape Ekaru Loitetet kokaru 46 E.K.Y. Ejaikinitos Iromayan apaaran na, nejai Janus, edeke loka irutei, ikekia, ka ageuneta. Emaikitai elap lo Januari akaulo naka Janus, loajatotor ireeta iaarei—ediopet etei ngaren ido ece kitei kau.” Kanukangun, ainumunumeta nuka Ekaru Loitetet eraasi nuelibunitos ononosio luka ikapirin.

Halloween. Ebala eitabo The Encyclopedia Americana ebe: “Iboro nuitosomao koinonosio luka Halloween, epedorio aibwapar kitoni apaarasia nuka Druid [isaserodotin lukolo sek] kopucito luajaas erika apaarasia nuka Ikristayon. Ajatotor itunga lu ipucito luka idekesio iaarei luapolok—edeke loka akolong ka edeke loka lukatwak…, loajanakin ekepucit olap loka Nofemba 1, ageunet naka Ekaru loitetet loka itunga kalu. Aponi do kitolomunai motimoti epucit loka alukatwak toma oinonosio luka Ikrisitayon.”

Apaarasia Ace Nukapolok. Mam ipedor aitetem nuikamunitos aiitununeta kere nuka apaarasia nukapolok kakwap kere. Konye, apaarasia nuitopoloritos itunga araibo atukono nuka itunga, mam isialamikitos Edeke Yawe. (Yeremia 17:5-7; Aswamisio 10:25, 26) Ido boboda kiitu ebe, alibuneta nuka apaarasia nukaplok luka idiinin, ingarakinete oni ajenun arai isialamikitos kesi Edeke araibo mam. (Isaia 52:11; Apukokinio 18:4) Akiro nuka Ebaibuli nuitetemitai Kosula lo 16 koitabo kalo, ingarakinete ijo ajenun epone loesesenia Edeke aimor ainumunum apaarasia nukapolok.

← Koan nuu kosula aloitetemitai ane