Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Anyoika Bo Cut Nuisisianakini Ebaibuli?

NUIYATAKINITAI

Akiro Numam Ikrisitayon Lukabeit Itosomata Emusalaba Kotoma Aima

Akiro Numam Ikrisitayon Lukabeit Itosomata Emusalaba Kotoma Aima

IMILIONIN luka itunga, itosomaete emusalaba kotoma aima kec ido kijaikitos ngesi aibuses. Eitabo Encyclopaedia Britannica enyarit emusalaba “ajenunet naepol noi naka idiinin luka Ikristayon.” Konye, Ikristayon lukabeit mam itasomaete emusalaba kotoma aima kec. Kanukinyo?

Aomisiot naepol nasodit nes na ebe, mam Yesu Kristo etwanikit omusalaba. Akirot naka Ayonanin naijulakitai “emusalaba” nges stau·ros′. Erai akepolou “akitoi naitenara.” Ebala eitabo The Companion Bible ebe: “[Stau·ros′] man akepolou erai abawoi aarei nuerucokitai. Emamei cut Kayonanin [Aitutuket Nakitetet] nueneritere akiro nuka abawoi aarei.”

Kaiwadikaeta nuipu, itosomatos ewadikak luka Ebaibuli acekirot kanu ibore yen etosamao ayaria Yesu. Erai akirot ngin xy′lon Kayonanin. (Aswamisio 5:30; 10:39; 13:29; Igalatian 3:13; 1 Petero 2:24) Apolou akirot kana kaurianut erai “abawo,” “ebela,” araibo “ekitoi.”

Itetemi nuatapitor aitosoma akitoi kanu ayariana itunga, ebala eitabo “The Cross and Crucification,” leowadikat Hermann Fulda, ebe: “Mam ikito ajaasi aiboisio kere nu aseunitai ayaranakin itunga lu atubokinitai atwanare. Kwangin, adupakino akitoi nabeit ayairia itunganan kwap. Kanen luabibilak ikisila, ekajanakino araibo ebubunokino kikiaritete akanin kec kuju ido kotapite ayenite akeje kec da.”

Konye abeit naecai, elomunit kakirot naka Edeke. Ebala ekiyakia Paul ebe: “Abu Kristo kolaku oni kama kekenit loka ikisila, nakeraunia ekenit kanuwok, naarai iwadikatai ebe, ‘Kikenoi ŋin kere yenikajakinitai okitoi.’ ” (Igalatian 3:13) Kane, inyogokit Paul Ikisila 21:22, 23, nuitodunitos kaidelel ekitoi konye mere emusalaba. Kwape ayaunia eyare loka epone kalo “ekenit,” mam do cut ibusakinit Ikristayon aikajanakin aputosia nuayaritere Kristo otogoi kec.

Emamete nuitodunitos ebe kotoma okaru 300 lusodit akaulo naka atwanare ka Kristo, mam Ikrisitayon lukabeit etosomaete emusalaba kaima kec. Konye kokaru 400, abu Ekabaka Kositatin loka Iromayon, loarai ekapirit kijulakin araun ediopet ko Kristyon luetepegak ido kitopolorite emusalaba kwape ajenunet naka odiini kec. Kejaasi nualosikinit Kositatin aswam da, amamaete nuabeit emusalaba aswam kede Yesu Kristo. Kabeit cut, erai emusalaba loageunit kokapirin. Ecamunit eitabo New Catholic Encyclopedia ebe: “Etosomaonono emusalaba koinonosio erika apaarasia nuka Ikristayon ka apaarasia da nuka ngul lumam araasi Ikristayon.” Apedorosio nuegelegela ace arucokitos emusalaba kede aima naka isuban ka inonosio luka ikapirin luikamunitos ayelo.

Kanukinyo bodo etopoloritere ajenunet na, naka ikapirin? Etakani bala, tetere epatanikini ikapirin acamun “Ekristayone.” Konye itoronit Ebaibuli kaidelel ayongite adioputo naka ikapirin kere. (2 Korinton 6:14-18) Isimikit bobo da Ebaibuli aima aputosia nuediopone kere. (Anyoun 20:4, 5; 1 Ikorinton 10:14) Kanuka akiro nuejokuka, mam Ikrisitaayon lukabeit itosomaete emusalaba kotoma aima kec.*


*  Kanuka ajenun nuipu nuikamunitos emusalaba koany eitabo Reasoning From the Scriptures apapulai 89-93 loitolomunitos Ajenak luka Yawe.

← Koan nuu kosula aloitetemitai ane