Kosomar nuejaas toma

Skip to table of contents

Ajenak Luka Yawe

Koseu Angajep Ateso

NUIYATAKINITAI

Abeit Naikamunit Papa, Okoku, ka Emoyo Lokalaunan

Abeit Naikamunit Papa, Okoku, ka Emoyo Lokalaunan

ITUNGA luiyuunitos aisisianakin naka Tirinit ebalasi ebe erai Edeke itunga iuni—Papa, Okoku, ka Emoyo Lokalaunan. Ngin diopet kotunga kalu, ebakai ebe eriakasi, lukapedor kere, ido komamei ageunet. Kotoma aisisianakin naka Tirinit, ebe erai Papa Edeke, Okoku da Edeke, ka Emoyo Lokalaunan da Edeke, konye ejai Edeke ediopet bon.

Luipu luiyuunitos Tirinit ecamunitos ebe mam kesi epedorote eitetem asisianakinet na. Keja ngun da, eomitos kesi ebe isisianakinio ngesi kotoma Obaibuli. Ejok ajenun ebe akirot “Tirinit” mam cut ejai Obaibuli. Konye biai, ejai teni aisisianakinet naka Tirinit toma Obaibuli? Kanu abongokin aingiset na, kaanyutu ber oni nuiwadikatai Obaibuli luetapit luigangitos Tirinit aidodunun.

“KORAI AKIROT EDEKE”

Ebala Yokana 1:1 ebe: “Kageunet ajai Akirot, ajai Akirot mama ejai Edeke, korai Akirot Edeke.” Akaulo kosula kalopekalo, itodunit ekiyakia Yokana kaidelel ebe “Akirot” nges Yesu. (Yokana 1:14) Kwape anyaritere Akirot Edeke, eomitos do ice ebe ibusakinit Okoku ka Papa koraasi ediope Edeke.

Konye kojen ebe atutubet na, naka Ebaibuli ewadikaitai Kayonanin. Kokau, apotu ejulak luka Ebaibuli kijulakisi aiwadikaita nu nuka Ayonanin angajepa ace. Luipu koijulak mam apotu kitosomatos akirot na “arai Akirot Edeke.” Kanukinyo? Koipone lo aijen kec na Ayonanin nuka Ebaibuli, apotu ejulak koanyutu ebe alimunet na “korai Akirot Edeke” ibusakinit aijul ecepone. Opone ani? Aayuneta adis kesi nu: “Arai Logos (Akirot) bala edeke.” (A New Translation of the Bible) “Korai Akirot edeke.” (The New Testament in an Improved Version) “Kojaasi Akirot nepepe ka Edeke ido komorite ekejautene.” (The Translator’s New Testament) Kanejaasi aijuleta nu, mam Akirot erai Edeke elope.* Kidimarai, kanu adoketait ke, naepol kane ejaasi isuban luka Yawe, enyaritai Akirot kwape “edeke.” Kane akirot “edeke,” apolou ke “lokapedor.”

KOJEN ACE NUIPU

Itunga luipu mam ejenete Ayonanin nuewadikaere Ebaibuli. Epone bodo ani ipedoria ijo ajenun nu cut alosikinit Yokana? Komoom ber ijo aanyunet na: Itetemi eisisianakinan loka esomero akiro nejaasi esisiak. Akaulo, egitigitun epone lo emisikinata esisiak nuesisianakitai. Anyoika bodo ebeit ekesisiak aswam kanu ajenun nukabeit? Epedorete kesi ti aingit ekesisianakinan aiyatakin aitetem nuipu. Komam abuonokin, aiyatakin aisisia nuipu, epedor aingarakin kesi amisikin jokan nuesisianakinio. Kwape kwangin, kanu amisikin apolou naka Yokana 1:1, ipedor ijo aingic Eijiri loka Yokana kanu adumun nuipu nuikamunitos adoketait naka Yesu. Aisisiaun nuipu nuikamutos nu ingarakinete ijo ajenun abeit.

Kwape aayunet, komoom nuiyatakit Yokana aiwadik osula 1, ikokoron 18: “Emamei ituŋanan yeneanyunit Edeke [Lokapedori Kere] kapakio kere.” Konye, eanyunitotor itunga Yesu, Okoku, naarai ebala Yokana ebe: “Koraun Akirot [Yesu] akuan, kiboiororoi kamawok, kaanyut oni da akeibuses.” (Yokana 1:14) Epone bodo ani, eraunor Okoku atutubet naka Edeke? Ebala bobo Yokana ebe ajai Akirot “mama Edeke.” Opone bani epedoria etunganan ajaut ka icetunganan, ido bobo da korai etunganan ngopongol? Konye, kwape iwadikatere Yokana 17:3, itodunit Yesu kaicaa atiaketait naejai kiding ke, ka Papake lokuju. Enyarit nges Papake “Edeke ediopet lokabeit.” Ido ayapiari awasia na Ejiri ke, engetakit Yokana akiro kobala ebe: “Iwadikatai nu tetere iyuunete yesi ebe Yesu ŋes Kristo, Okoku loka Edeke.” (Yokana 20:31) Koany ebe mam Yesu enyaritai Edeke, konye Okoku loka Edeke. Akiro nuiyatakitai kotoma Oijiri lokaYokana itodunitos epone lo ibusakinitor amisikin Yokana 1:1. Yesu, Akirot erai “edeke” koipone kangol ebe, ejaatar ngesi ka adoketait naepol konye mam eriakasi kede Edeke Lokapedor kere.

KITOGOGONG ABEIT

Komoom ber bobo ijo aanyunet naka esisianakinan ka eisisiak. Komoom ber ijo ebe, erokos ice kakesi ejaatar abuonokin, akaulo naka aisisia ace nueyatakit esisianakinan aitetem. Inyoin bodo ibusakin kesi aswam? Epedorete kesi ti aingit ece eisisianakinan ayatakin aitetem ace nuikamunitos ngun. Arai kitogogong eisisianakinan loiyaareit nuetetemit losodit, abuonokin naka ikesisiak luipu edaun. Kwape kwangin, arai mam ijo imisikinit nuka ewadikan Ebaibuli Yokana, nu inerit ngesi nuikamunitos ejautene loka Yesu ka Edeke Lokapedor kere, ipedori ijo aisiom aiwadikaeta ace nuka Ebaibuli tetere ipedori ajenun nuipu. Kwape nat, koany nuewadikat Matayo. Nuikamunitos awasia naka akwap kana, inyogokinit ngesi nuabu Yesu kinerite ebe: “Konye akiro nuka apaaran kaya ka esawa da emamei yenejeni, karaida imalaikan luejaas toma akuj, karaida Okoku, dimikito Papa bon.” (Matayo 24:36) Epone bodo ani itigogongitotor akiro nu ebe mam Yesu erai Edeke Lokapedor kere?

Ebala Yesu ebe ejeni Papa nuipu adepar Okoku. Konye arai korai Yesu atutubet naka Edeke Lokapedor Kere, ti nges ejeni kere nu ejeni Papake. Kanukangun, mam Okoku ka Papa epedorete ariakun. Kejaasi ngun da, epote ice atemari ebe: ‘Kejai Yesu irwan aarei. Inera nges kane kwape etunganan.’ Arai da ti korai kwangin, dobodo emoyo lokalaunan? Arai korai emoyo lokalaunan da atutubet naka Edeke Papa, inyo mam Yesu ebalar ebe ejeni nuejeni Papa?

Neiyatakina ijo aisisia Ebaibuli, ibuni ijo ajenun awadikaeta nuka Ebaibuli nuipu nuineritos akiro nu. Itogogongitos abeit naka Papa, Okoku, ka emoyo lokalaunan.—Isabulin 90:2; Aswamisio 7:55; Ikolosain 1:15.


*  Kanu ajenun ikisila luka angajep naka Ayonanin nuikamunitos Yokana 1:1, koany eitabo Should You Believe in the Trinity? Apapula 26-9 loinomitos Ajenak luka Yawe.

← Koan nuu kosula aloitetemitai ane