Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 116: Epone Loipedoria Oni Aijar Ikar Kere

Aitetemet 116: Epone Loipedoria Oni Aijar Ikar Kere

IPEDORI ijo alimun inyo esiomete ipese yen ka apaperoke? Eebo, erai eitabo lopelo loisiomi ijo—Eitaboka Loka Akiro Nuitetemit Ebaibuli. Ido esiomete kesi aitetemet napana naisiomi ijo—“Epone Loipedoria Oni Aijar Ikar Kere.”

Isapat esiomi

Ijeni ijo inyo isisiaete kesi? Nasodit, ebe ibusakinit one ajenun nukamunitos Yawe ka Okokuke Yesu arai ikoto oni aijar ikar kere. Ebala Ebaibuli: ‘Lo nges erot lokaijar ikar kere. Isisiau nuka Edeke ediopet lokabeit, ka Okokuke loejukuni ngesi akwap, Yesu Kristo’

Biai ipedoria oni aisisiaun nukamunitos Edeke Yawe ka Okokuke Yesu? Erot edipoet erai aisiom Eitaboka Loka Akiro Nuitetemit Ebaibuli kageunet kiton angetakin. Inera nuipu nukamunitos Yawe ka Yesu, mam kereka? Ido inera nuipu nukamunitos iboro luiswamatos kesi ka iboro luebeit kes aswam. Konye ibusakinit one aswam nuedeparito aisiom eitabo lo.

Ebaibuli

Iany ijo eitabo ecie loejai kwap? Erai Ebaibuli. Koinak ice itunganan kosiomak ijo atutubeta ko Baibuli nuejaas aitetemeta nu oitabo kalo. Ijaikit Ebaibuli oni akiro nuipuda kaileleba tetere ipedori oni kere aijanakin Yawe korot loabeit ka adumun aijar namam edaun. Aso ibusakinit oni asiomenen Ebaibuli duc.

Konye mam edaunit aisisia bon nukamunitos Edeke Yawe ka Yesu Kristo. Ipedori oni ajaut kacoa naepol noi naikamunit kes ka aisisianakin kec, konye komam idumuni aijar namam edaun. Ijeni ijo inyo bobo ekotoi?

Ibusakinit bobo oni aiboi katupitos iboro luisisiat oni. Iitut ijo Yuda Isikariot? Arai ngesi ediopet ko 12 luaseunit Yesu araun ikeyakia. Ajaas Yuda kacoa naepol noi naikamunit Yawe ka Yesu. Konye inyo abu kiswamaikin nges? Kotoma apak naadit abu iranganar, kosodi abilakin Yesu abotet kanu atutubeta 30 nuka epuesa. Aso mam Yuda edumuni aijar namam edaun.

Iitut ijo Gekasi, etunganan loisisiat oni nuke kotoma Aitetemet 69? Akoto ngesi inapen ka isirigin lumam ebeitos nges. Aso kosab kanu adumuni iborolu. Konye kitisila Yawe nges. Ebuni aitisilar oni da arai mam iricit ikisilake.

Konye ejaas itunga luipu luduc ejaanakinete Yawe kamunonut. Ikoto oni da aikwaikin kwape kakesi, mam ti? Aanyunet naka Samuel neadisiar erai na ejok atupakinit. Kiitu kwape kianyunitor kotoma Aitetemet 55, arai ngesi ikar iwongon arai ikany bon luapolou egeuni aijanakin Yawe kowema ke. Aso arai idite ijo, mam ijo idite noi aijanakin Yawe.

Eebo, etunganan loikoto oni kere atupit erai Yesu Kristo. Nakeraar isapat, kwape itoduutere kotoma Aitetemet 87, ajai ngesi oyekalu ineras kaluce nuikamunitos Papake lokokuju. Katupakis akeanyunet. Alimokisi itunga luipu kwape ipedoria nuikamunitos Edeke wok Yawe loitegelikina ka Okoke, Yesu Kristo. Arai kiswama oni iboro lu, ipedori do oni aiboi ikar kere kotoma aparadais naka Edeke nakitetet kakwap.

Yokana 17:3; Isabulin 145:1-21.



Angiseta

  • Inyo ibusakinit oni aijen arai ikoto oni aijar ikar kere?
  • Epone ani ipedoria oni aisisiaun nuikamunitos Edeke Yawe ka Yesu kwape itodiaritere kede ipese yen ka apaperoke kotoma aputo kana?
  • Enyoin eitabo ece lo itei ijo kotoma aputo kana, ido kanukinyo ibusakinitor ijo asiomenen nges duc?
  • Aidokokin toma aisisia nuikamunitos Yawe ka Yesu, inyo bobo ekotoi kanu oni adumun aijar namam edaun?
  • Aisisianakinet anyoin isisiau oni kotoma aitetemet 69?
  • Anyoika itodiarit anyunet najokan naka Samuel kotoma aitetemet 55?
  • Epone ani itupakina oni anyunet naka Yesu Kristo, ido arai iswama oni ngun, inyo ipedori oni do aswam kongaren?

Angiseta nuiyatakina

  • Kosiom Yokana 17:3.

    Epone ani itodunitotor aiwadikaeta ebe adumunun aijen naikamunit Edeke Yawe ka Yesu Kristo edeparit aituunun akiro bon? (Mat. 7:21; Yak. 2:18-20; 1 Yok. 2:17)

  • Kosiom Isabulin 145:1-21.

    Anyoika ace kotoma akiro nuipu nuibusakinitor oni aiturenen Yawe? (Sab. 145:8-11; Apu. 4:11)

    Epone ani ejokar Yawe “nejaas itunga kere” ido epone ibusakinitor na aisukunyuun oni nejaai ngesi? (Sab. 145:9; Mat. 5:43-45)

    Arai emina etau wok Yawe, anyoika ebuni oni aswam? (Sab. 119:171, 172, 175; 145:11, 12, 21)