Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 114: Awasia Naka Aronis Kere

Aitetemet 114: Awasia Naka Aronis Kere

INYO ianyut ijo kane? Eebo, ajore kibwanenito ibalasin lukakwangak. Konye koany aibo eponitotor. Ejesunos ibalasin kotoma akuj kodouon! Ejaas cut ibalasin kuju?

Yesu kwape Ekabaka kokuju

Mam, mam eraas ibalasin ikulepek. Kijeni oni nu naarai mam ibalasin epedorete akerit kodouon, epedorete kereka? Konye inera Ebaibuli nu ibalasin kokuju. Ijeni ijo kanukinyo inerar?

Erai naarai sek etwasamao ibalasin noi kojisio. Aso inera Ebaibul nuka itunga ibwanenito ibalasin kijesunos kokuju nu aitodun ebe ejai Edeke kojie nepepe kitunga kokwap. Ijeni ijo epone lo enyaritere aibois naka ejie kalo? Arumagedon. Ejie ngolerai kanu a amudiar aronis kere kakwap.

Yesu ngesi Lo ingarenikini ejie lo kotoma Arumagedon. Kiit, Yesu erai eseuna loka Yawe kanu araun ekabaka loka apuganike. Ngupengun enapitor Yesu akopira naka ajakanut. Ido itodunit ekileng ebe ebuni ngesi aiar luasurup kere luka Edeke. Ibusakinit oni aumokin ebe emudiari Edeke itunga luarokok kere?

Koany kau Aitetemet 10. Inyobo iany ijo kangina? Eebo, Amudia akalele naepol itunga luarokok. Ingai ayauni akalele ngin? Edeke Yawe. Kwana koany Aitetemet 15. Nunyoika iswamas kangina? Ejai akim naejukini Yawe amudia Sodom ka Gomora.

Opuko Aitetemet 33. Koany nueswamaikinos ibalasin ka agalin nuka ejie nuka Imisirian. Ingai einakini akipi erapakinete kes? Yawe. Eswamauni ngesi kwangin kanu ayuar iketunga. Koany Aitetemet 76. Ianyuni kangina ebe abu Yawe kocamak iketunga da, Iyudayan, amudiaro kanu akecemengeranut.

Aso do, mam ibusakinit oni aumokin na ijukuna Yawe akejore kokuju aitanang aronis kere kotoma akwap. Konye ber koomoom inyo a polou kanu! Opuko apapula kanyutu.

Apukokinio 16:16; 19:11-16.



Angiseta

  • Kanukinyo inerar Ebaibuli nuka abalasin kokuju?
  • Ekiror ani emaikinitai ejie loka Edeke nepepe ka itunga luarokok kotoma akwap, ido anyoin alosikinet naka ejie kalo?
  • Kotoma aputo kana, ingai ingarekinit kotoma ojie, kanukinyo enapitor nges aboko, ido anyoin apolou na ekileng ke?
  • Kanu aitun aitetemeta 10, 15 kanukinyo mam oni iumokina ebe epedori Edeke amudiar itunga luarokok?
  • Epone ani itodikinitotor oni aitetemeta nu 33, 36 ka 76 ebe ebuni Edeke amudiar itunga luarokok karaida ebalasi kesi ebe emaete ngesi?

Angiseta nuiyatakina

  • Kosiom Apukokinio 19:11-16.

    Epone ani itacaunitotor aiwadikaeta cut ebe Yesu Kristo ngesi lo ibwanenit abalasit nakwangan? (Apu. 1:5; 3:14; 19:11; Isa. 11:4)

    Epone ani itogogongoritotor aokot nuebwasitai anapito naka Yesu ebe akeipikor erai nacut, ido ileleba? (Apu. 14:18-20; 19:13; Isa. 63:1-6)

    Lungai ecepak ejaas toma ajoresio nu etupakinitos Yesu kotoma abalasin nukakwangak? (Apu. 12:7; 19:14; Mat. 25:31, 32)