Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 111: Esapat Loabu Kojotoor

Aitetemet 111: Esapat Loabu Kojotoor

ITUKWII! Itukwii! Nunyoika iswama kane? Imusunguna noi esapat loperi kokwp? Koany! ediopet kotunga luelomunete kotogo erai Paul! Ipedori ijo aanyun Timoteo da kangina? Ibiruno esapat kadirisa?

Abuu Paul aitajarun Eutuko

Eebo, ngupengun eswamauna. Ejaikini Paul einer kane ko Tiroa. Ajeni nges ebe mam bobo eanyuni kes adaun apak naepol naarai ajai nges alosit kotoma ataker apaaran naetupakini. Aso kiner kiton kiding kware.

Aso, esapat lo ekekiror Eutuko eboie kadirisa, kilurutu ajo. Kibiror ngesi kadirisa nakiwuniet kokuju kiton kwap! Aso iwany ijo kanukinyo iyalongongotor noi itunga. Kedakutu ikiliok esapat, erai kwape akuriakatar kesi. Atwanit ngesi!

Keanyu Paul ebe atwana esapat, kobuburikin ngesi kujuke, kotun nges. Kosodi kotema ngesi: ‘Siri kiyalongongoto. Engalei ngesi!’ Cut engalei! Erai aumokinet! Enyaku Paul ngesi aijarake! Kiyalamikin ekodet.

Kodokasi bobo kere kuju, konyamata. Kiner Paul kiton akwap aiwalar. Konye ipedori ijo amisikin ebe mam Eutuko bobo ejotoor! Kanen kodokasi Paul, Timoteo ka ipaupakec ataker. Ijeni ijo aibo elosete kesi?

Ejai Paul angetakin ekelosit naiuniet nakalimonokin ido ejai kwana orot abongor ore. Korot kalo iboi Paul adaun ikar iuni ore Epeso. Aso erai na alosit naelwana adepar ekelosit naiareit.

Kenyou ko Tiroa, kobwou ataker ko Mileto. Kwape mam Epeso elwaniar, abu Paul kiyakia anyaraun imakio luka atukot abunere Mileto tetere inera kakes nawasia. Aso kedol apak ataker anyoun, kokadak kesi aanyun Paul elosi!

Awasia do, kobong ataker Kaisarea. Kikwenya enabi loenyaritai Agabo Paul ne arokor ngesi iboie kotogo loka ekesisian Pilipo. Ebala enabi ebe, eenio Paul kebuu Yerusalem. Abeit cut nuu apotu kiswamaunos. Kanen kedau ikar iarei aidaris ko Kaisarea, kijukarai Paul Rome aitosao nejai Kaisar ekayaiton loka Rome. Aanyutu nunyoika iswamaunos kotoma alosit Rome.

Aswamisio isulai 19 kiton 26.



Angiseta

  • Kotoma aputo kana, ingai bo esapat lo eperi kokwap, ido inyo atakanikit ngesi?
  • Anyoika abu Paul iswama eayu ngesi ebe atwana esapat?
  • Aibo alosete Paul, Timoteo ka ngul lu aupasi kakes, ido inyo abu iswamaun kepaikisi kesi Mileto?
  • Aikwenyaret anyoin abu enabi Agabo koinak Paul, ido epone ani eswamaunor kwape eneritor enabi?

Angiseta nuiyatakina

  • Kosiom Aswamisio 20:7-38.

    Epone ani ipedoria oni apaikin kilai kotoma aokot nuka itunga kere kwape abalar Paul kotoma Aswamisio 20:26, 27? (Esk. 33:8; Asw. 18:6, 7)

    Kanukinyo ibusakinitor imakio araut lu ‘ericitos akirot naka aiyuun kwape ejaar aisisianakin’ ne isisianakinatar kesi? (Asw. 20:17, 29, 30; Tito 1:7-9; 2 Tim. 1:13)

  • Kosiom Aswamisio 26:24-32.

    Epone ani abu Paul itosoma akeraut Eromayot aitodolikina akeswam na alimonokin naejaunit ngesi kanejai Yesu? (Asw. 9:15; 16:37, 38; 25:11, 12; 26:32; Luka 21:12, 13)