Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 110: Timoteo—ekengarakinan Loitet Loka Paul

Aitetemet 110: Timoteo—ekengarakinan Loitet Loka Paul

EKATUMUNAN loiseseni ijo kane nepepe ka Paul erai Timoteo. Iboie Timoteo kekaleke ko Lusitura. Emaikinitai totoke Eunike kosodi tataake Lois.

Erai na naiuniet Paul aipejokin Lusitura. Bala ekaru kwana kau, apotu Paul ka Baranaba kapotu nee nasodit alimonokin. Do kwana abongu Paul bobo nepepe ka opaperoke Sila.

Timoteo ka Paul

Ijeni ijo nu ejai Paul alimokin Timoteo? ‘Ikoto ijo aupakin ka Sila ka eong?’ ingisi ngesi. ‘Ti kipedo aitwasam akonigangat kanu alimonokin itunga luelwaka.’

Kobongok Timoteo: ‘Eebo, akoto eong alosit.’ Aso atipet kinyek Timoteo ekaleke kosodi alosit nepepe ka Paul ka Sila. Konye eringa oni kisisiaunia nuka erotokec, angicutu ber nunyoika eswamanakinos Paul. Erai kwana bala ikar 17 anyoun naetodikinor Yesu nges korot elosi Damasiko.

Kiit, abuni Paul Damasiko kanu aisirieb ikesisiak luka Yesu, konye do kwana erai ngesi da ekesisian! Ekaulo kinerut luasurup aiar Paul naarai mam kes ekotos asisianakinike naikamonit Yesu. Konye kingarakis ikesisiak Paul aiku. Kibwaikis nges adita, kijesut nges kwap kinga karwatat naka ere.

Kolosi do Paul Antiokia alimonokin. Nee nges ageunere anyara itupitok luka Yesu Ikrisitaon. Kijukarai Paul ka Baranaba anyoun ko Antiokia alimonokin akwapin nuelwaka. Ediopet koreria luepejoikinete kesi erai Lusitura, orekec Timoteo.

Kwana, atubor bala ekaru, abongu bobo Paul Lusitura korot ke loiareikini. Kenyoutu Timoteo nepepe ka Paul ka Sila, ijeni ijo aibo apotu koloto? Koany amap kasodete aisisia aiboisio adis.

Nasodit, koloto neapie, Ikonium, kanen koloto ore loiareit loemaikitai Antiokia. Koloto Tiroa, kosodi Pilipi, Sesalonika ka Berea. Iany ijo Asene kotoma amapu? Kolimonok Paul kangina. Akaulo kangun kodaut ekaru katutubet elimonokinete ko Korinto. Kawasia do kopaikis Epeso apak naedit. Kanen, kodokata ataker abongun Kaisarea kosodete alosit Antioka, neiboio Paul.

Aso kolot Timoteo akwat ka akwat nuka amairon aingarakin Paul alimonokin “akiro nukajokak” ka ageunun atukono nuipu nu Ikrisitaion. Kipolor ijo, iraun ijo ebulesit lomunot loka Edeke kwape Timoteo?

Aswamisio 9:19-30; 11:19-26; isulai 13 kiton 17; 18:1-22.

Amaapu

1. Rome; 2. Melita; 3. Berea; 4. Sesalonika; 5. Korinto; 6. Pilipi; 7. Asene; 8. Kurete; 9. Tiroa; 10. Epeso; 11. Mileto; 12. Kolosai; 13. Antiokia; 14. Ikonium; 15. Lusitura; 16. Kupuro; 17. Antiokia; 18. Kaisarea; 19. Yopa; 20. Damasiko; 21. Yerusalem; 22. Angolol Nati (Mediterranea)



Angiseta

  • Ingai bo atumunan lo ejai aputo na, aibo iboio nges, ido ingai ekiror atotoke ka atataake?
  • Anyoika abu Timoteo kolim ne engisia Paul ngesi arai akoto ngesi aupakin kede Sila ka Paul alosit alimonokin itunga lu alwaka?
  • Aibo ne ageunere anyara atupitok luka Yesu Ikristayon?
  • Akaulo na Paul, Sila ka Timoteo anyoun kotoma Antioka, oreria luapolok anu apotu kesi kipejonokisi?
  • Epone ani abu Timoteo kingarakina Paul, ido anyoika angiseta nuibusakinit atumunak aingitakin bonik?

Angiseta nuiyatakina

  • Kosiom Aswamisio 9:19-30.

    Epone ani abu Paul itoduna acobeu ne etepegere ngesi kanu akiro nukajokak? (Asw. 9:22-25, 29, 30; Mat. 10:16)

  • Kosiom Aswamisio 11:19-26.

    Epone ani itodunitotor akiro nuiwadikatai Aswamisio 11:19-21, 26 ebe emoyo loka Yawe nges iteteni aswam na alimonikin?

  • Kosiom Aswamisio 13:13-16, 42-52.

    Epone ani itodunitotor Aswamisio 13:51, 52 ebe mam isisiak apotu ocamakis aitepegio aitonokok kesi? (Mat. 10:14; Asw. 18:6; 1 Pet. 4:14)

  • Kosiom Aswamisio 14:1-6, 19-28.

    Epone ani ingarakina oni akirot na ebe, ‘kibwaikis kesi akanin nuka Yawe lokiyuunito’ alemar adio aiyalongongo ne ijaar oni aingarakin nuitetiak? (Asw. 14:21-23; 20:32; Yok. 6:44)

  • Kosiom Aswamisio 16:1-5.

    Epone ani ikeunitor acamunio na Timoteo akepio, ajokis na ‘aswam iboro kere kanu akiro nuajokak’? (Asw. 16:3; 1 Kor. 9:23; 1 Ses. 2:8)

  • Kosiom Aswamisio 18:1-11, 18-22.

    Anyoika nu itodunit Aswamisio 18:9, 10 nukamunitos Yesu elopet kotoma aitete aswam na alimonokin, ido amunokina anyoin einakini na oni lolo? (Mat. 28:20)