Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 106: Koosikinai Kotoma Aidaris

Aitetemet 106: Koosikinai Kotoma Aidaris

KOANYA emalaika kane engarit ekeki loka aidaris. Itunga luelacakini ngesi eraas ikiyakia luka Yesu. Angicutu ber oni inyobo ainakini kes ibwaikinio aidaris.

Ejai emalaika alacakin ikeyakiak

Erai apak naedit noi anyoun neabukokinere ikesisiak luka Yesu emoyo lokalaunan. Nu kes eswamaunos: Alosete Petero ka Yokana alomar oyekalu ko Yerusalem osawan luka paran adiope apaaran. Ejai etunganan eiduny kekek loengwalit aparasia kere nukaijar ke. Edakununo nges nee nginiparan tetere ilipitoi isirigin kama ejaas ngul luelomanarete toma oyekalu. Keanyu nges Petero ka Yokana, kilip kes ainakin nges idisibore. Inyo iswamaunete ikiyakia?

Kopaikis, kosesenata etunganan ngol loicana. ‘Emamete eong isirigin,’ ebala Petero, ‘konye kainakini ibore yenejai keong. Kokiror loka Yesu, itenar kolot!’ Kiting Petero akekan nakoteten, atipet kodetun kogeu alosit. Keanyutu itunga nu, koumokis ido kiyalamikinos noi kanu aumokinet kana.

‘Erai kanuka agogong naka Edeke, loetajaruni Yesu kotoma okatwak, kiswamaunia sio aumokinet na,’ ebala Petero. Napineras ngesi ka Yokana, kopotu icie kalu epolokinitos ediini. Ekadakinito naarai elimonokinete Petero ka Yokana itunga ajarun naka Yesu kotoma okatwak. Aso kikamut kes kogolokis toma aidaris.

Apaaran natupakini kotukonokinos ikayaitok luka ediini. Koyaunai Petero ka Yokana nepepe ketunganan loetangaleunete kesi. ‘Kanuka apedor anyoin iswamata yesi aumokinet na?’ ingisete ikayaitok luka ediini.

Kolimok Petero kes ebe erai kanuka agogong naka Edeke, lokitajaruni Yesu kotoma okatwak. Mam isasedotin ajenete nuiswama, kanu mam kes epedoriata aipeg ebe iswamauna teni aumokinet ma. Aso kicorakis ikiyakia mam bobo cut einer nuka Yesu kosodete ajalakin kes alosit.

Kwape atubonorotor apaarasia kiyatakis ikiyakia alimonokin nuka Yesu kaitangaleun luadekak. Kisiarakinos akiro nuka aumonokineta kanu. Aso koyaut ikodeta kotoma oreria luedunyas ka Yerusalem luadekak kanu ikiyakia aitangaleun. Koinak na, ikayaitok luka ediini ekolo tape ikamunete ikiyakia kogolokis kes toma aidaris. Konye mam apotu kodaut apak naeoja kangina.

Kware kongaa emalaika loka Edeke ekek, kwape isesnia ijo kane. Kotema emalaika: ‘Koloto kobwaata koyekalu kiyatakis einer kitunga.’ Tupuruc, kiyakiasi ikayaitok luka ediini itunga aidaris ayaun ikiyakia, kodumut ebe aekasi. Ekaulo kodumut itunga kes isisianakinete koyekalu kosodete ayaun Aurianet.

‘Apotu kecorakis yes kagogong ebe sirikisisianakis nuka Yesu bobo,’ ebalasi ikayaitok luka ediini. ‘Konye ilelebata Yerusalem kaisisianakinikus.’ Kosodete ikiyakia abongokin: ‘Kibusakinit arimarit Edeke aitelekarit itunga.’ Aso kiyatakis aisisanakin “akiro nukajokak.” Mam ngin erai aanyunet naejok atupakin?

Aswamisio isulai 3 kiton 5.



Angiseta

  • Inyo abu kotakanik Petero ka Yokana osawan lukapaaran adiopepaaran elosete kesi oyekalu?
  • Anyoika abu Petero kolimok etunganan lo agwalit, ido inyo abu Petero koinak ngesi yen apol etiai aitelekar isirigin?
  • Kanukinyo anyunyuratar engarenok luka ediini, ido inyo apotu kesi iswamaikisi Petero ka Yokana?
  • Anyoika abu Petero Kolimok engarenok luka ediini, ido aitukurianet anyoin apotu iyakia kodumutu?
  • Kanukinyo ajaatar engarenok luka ediini kede ekokote, konye inyo abu kotakan ipikakin iyakia aidaris irwan nakiaret?
  • Epone ani apotu iyakia obongokinatar keyaun kesi Aurianet?

Angiseta nuiyatakina

  • Kosiom Aswamisio 3:1-10.

    Karaida mam oni Ipedori aswam aumonokineta lolo, epone ani ingarakinatar oni akiro nuka Petero nuiwadikatai Aswamisio 3:6 aitojok Akiro nuka Ajakanut? (Yok. 17:3; 2 Kor. 5:18-20; Pil. 3:8)

  • Kosiom Aswamisio 4:1-31.

    Ne itepegere oni kotoma alimonokin, opone ani ibusakinitor oni aputoor Ikristayon lusodit kolo? (Asw. 4:29, 31; Pes. 6:18-20; 1 Ses. 2:2)

  • Kosiom Aswamisio 5:17-42.

    Epone ani etodunatar itunga lumam eraasi Ajenak aiwomisionut kanu aswam na alimonokin ageun kolo kiton kwana? (Asw. 5:34-39)