Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 104: Abongo Yesu Kuju

Aitetemet 104: Abongo Yesu Kuju

KITODIKIN Yesu iketupitoka irwan ipu. Adiopepak koanyutu ikiesisiak bala 500 nges. Ketakanikin ngesi kes, ijeni ijo nunyoika inera Yesu kakes? Ajakanut naka Edeke. Ijukunit Yawe Yesu akwap asisianakin nuka Ajakanut. Iyatakit ngesi aswam nu akaulo da na ajarun.

Yesu ebongori ka kuju

Iitut ijo inyo ajakanut naka Edeke? Eebo, Ajakanut erai apugan naka Edeke kokuju, ido Yesu nges Lo eseunit Edeke araut ekabaka. Kwape kisiisiautor, abu Yesu kitodu ebe ebuni ngesi araun ekabaka loejok na etanyamia luetengei, eitangaleuna luadekasi, ka aitajarun ikatwak da!

Aso ne ipuga Yesu kokuju ikaru elukumit, ikwaikini bo ai akwap? Eebo, akwap kere ijulakinio araun paradais. Emameunos do ijisio erai epali, arai adekasinei karaida atwanare. Ijeni oni ebe erai na abeit naarai iswamat Edeke akwap araut aparadais kanu itunga ailel. Ngupengun eswamaunia ngesi emanikor loka Eden kageunet. Ido ebuni Yesu aanyun ebe nuekot Edeke itodolikinos.

Adolu do kwana apak Yesu abongor kuju. Adau Yesu apaarasia 40 itodinikin ikesisiak. Aso ejenete cut ebe ejari bobo ngesi. Konye eringa ejalakina ikesisiak kolimok kes: ‘Kosalakisi Yerusalem kiton naidumuniata emoyo lokalaunan.’ Emoyo lokalaunan nges agogongu naka Edeke, kwape ekwam loekusi, loingarakini iketupitok aswam akote naka Edeke. Kengetakini, ebala Yesu: ‘Kolimonokis nuikamunitos eong akwapin kere.’

Kedau Yesu einer nu, katakanu ibore yen eumokina. Kogeu ngesi alosit kuju kwape isesenia ijo kane. Kanen kiteribo edou nges kakonyenekec, mam bobo ikesisiak apotu koanyutu Yesu. Kolot Yesu kuju, kogeu aipuga iketupitok kakwap kangina.

Iteete ikesisiak kuju naka idoon

1 Ikorinton 15:3-8; Apukokinio 21:3, 4; Aswamisio 1:1-11.



Angiseta

  • Isisiak idi apotu koanyutu Yesu kotoma apak adiopet, ido anyoika abu ngesi kolimok kesi?
  • Inyoin bo Ajakanut naka Edeke, ido ikonakin bo aijar kakwap biai ne ipuga Yesu kwape Ekabaka adaun ikar elukumit?
  • Apaarasia adi adau Yesu itodinikin ikesisiak, ido erai kwana apak na ngesi aswam inyo?
  • Eroko Yesu enyouna ajalakin ikesisiak, inyo abu Yesu kolimok kesi aswam?
  • Inyo iswama kotoma aputo kana, ido epone ani araparor Yesu kane, ajaasi lu eteete?

Angiseta nuiyatakina

  • Kosiom 1 Ikorinton 15:3-8.

    Kanukinyo enerar eyakia Paul komamei abuonokin nuikamunit ajarun naka Yesu, ido inyoika ibore luebeit Ikristayon ainer lolo komamei abuonokin? (1 Kor. 15:4, 7, 8; Isa. 2:2, 3; Mat. 24:14; 2 Tim. 3:1-5)

  • Kosiom Aswamisio 1:1-11.

    Abu alimonokin konyanyar kiton ai kwape adwaritere kotoma Aswamisio 1:8? (Asw. 6:7; 9:31; 11:19-21; Kol. 1:23)