Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 103: Toma Agola Naigoikitai

Aitetemet 103: Toma Agola Naigoikitai

KENYOUTU Petero ka Yokana kates ne ajai akuan naka Yesu, kosalak Mariam bon ngina. Kogeu aimony. Kanen kokukum, kireik toma ates, kwape kianyunitor kaput nasek. Kangina koany ngesi imalaikan iarei! Kingita kesi nges: ‘Imonyi inyo?’

Kobongok Mariam: ‘Ayangar Ekajakait, ido mam ajeni ne apikakisi kesi ngesi.’ Kibelokin Mariam koany etunganan. Kingit je nges: ‘Ingai bo imoi ijo?’

Keomit Mariam etunganan araut ekeswaman emanikor, ido ebe nges caat elemarit akuan naka Yesu. Aso kotema: ‘Arai ilemarit ijo nges, kolimokinai neibwaikinit.’ Konye, cut, etunganan lo erai Yesu. Anapaki ngesi akuan namam Mariam ejeni. Konye kenyarau nesi itosomai ekekiror, kojenu Mariam ebe erai lo Yesu. Koker kolimok ikesisiak: ‘Aanyu eong Ejakait!’

Kaparan kangin napelosete ikesisiak iarei ocalo loko Emao, koupakinos etunganan kakes. Itururuete ikesisiak noi naarai aari Yesu. Konye napelosete kesi, kitemitem etunganan iboro luipu ko Baibuli kisinapik kes. Kawasia, epaikisi kesi kanu ainyam, kojenutu ikesisiak ebe etunganan lo erai Yesu. Kanen kooliori Yesu, atipet kobongosi ikesisiak luare Yerusalem kolimokis ikiyakia nuke.

Nape iswamaas ngun, kitakanikin Yesu Petero da. Kolelata luce apupun nu. Kanen koloto ikesisiak luare Yerusalem kodumutu ikiyakia. Kolimokis kes epone loatakanikinia Yesu kesi da korot. Naperinga kesi ineras nu, ijeni ijo nuapotu kotakanut?

Koany aput. Atakanu Yesu kotoma agola, karaida egolol ekek. Epone loiyalamatar ikesisiak do! Mam ngin erai aparan nakailel? Ipedori ijo kwana aimar irwan nuatakanakinia Yesu ikekesiak? Imar ijo irwan akany?

Ketakanikini Yesu ikeyakiak

Mam ekiyakia Tomas ejaas kakes nakebunio Yesu. Aso kolimokis ikesisiak nges ebe: ‘Kianyu Ejakait!’ Konye kotema Tomas ebe erai ber eong elopet aanyun Yesu eringa kiyuuna. Ketuboros aparasia akanykauni, kojaas bobo ikesisiak nepepe a gola naigoikitai, kojai Tomas da nepepe kakes. Kobu Yesu toma agola. Kiiyu Tomas kwana do.

Yokana 20:11-29; Luka 24:13-43.



Angiseta

  • Anyoika abu Mariam olimok etunganan lo aomit ngesi ebe arai akorion, konye inyo abu koinak ngesi amisikin ebe arai ngol cut Yesu?
  • Inyo abu kotakanik isisiak iarei lu ajaas alosit ocalo loka Emao?
  • Inyoin ibore yeni aumokin yen abu kotakan elimokisi isisiak lu iarei iyakia ebe aanyutu kesi Yesu?
  • Irwan adi kwana atakanikina Yesu atupitok ke?
  • Anyoika nu abu Tomas kolimu ne apupuna ngesi ebe aanyutu isisiak Ejakait, konye inyo abu kiswamaun akaulo na apaarasia akanyauni?

Angiseta nuiyatakina

  • Kosiom Yokana 20:11-29.

    Enera do Yesu kotoma Yokana 20:23 ebe icorakinitai itunga aisioni adiakanareta? Itetem. (Sab. 49:2, 7; Isa. 55:7; 1 Tim. 2:5, 6; 1 Yok. 2:1, 2)

  • Kosiom Luka 24:13-43.

    Epone ani itemonokina oni etau wok tetere ijauni abeit naka Ebaibuli? (Luka 24:32, 33; Esr. 7:10; Mat. 5:3; Asw. 16:14; Bur. 5:11-14)