Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 102: Ejari Yesu

Aitetemet 102: Ejari Yesu

IJENI ijo ingai bo aberu ka ikiliok iarei? Aberu erai Mariam Magadalene, apaperoke Yesu. Kosodi ikiliok luenapito igoen luakwangak eraas imalaikan. Agola na naedit naireikit Mariam tomake erai aiboisit naebikakitai akwan naka Yesu akaulo natwania. Enyaritai ates. Konye akuan emamei akwan! Ingaibo ayanga? Aanyutu ber oni.

Inerasi imalaikan keda Mariam Magadalene

Kedau Yesu atwanare, kotemasi isasedotin Pilato ebe: ‘Naarokor Yesu ejari abala ebe, akaulo naapaarasia auni, itajarunio nges. Kanukangun kicorak kidarai ates. Tetere ikekesisiak mam epedorete akokwar akekuan kosodete atemar ebe ajaru ngesi kotoma okatwak!’ Kolimok Pilato isasedotin aijukar isirikalei aidar ates.

Konye, tupuruc sek apaaran naiuniet okaulo, natwania Yesu, atipet kobuni emalaika loka Yawe. Kikokoro amoru awai kotoma ates. Kokuriakaros isirikalei noi mam epedorete aikunyakin. Kawasia, kireikisi kesi toma ates, amamei akuan! Kolomasi isirikalei ice ore, kolimokis isasedotin. Ijeni ijo nuapotu isasedotin luarokok kiswamata? Kotacata iserikalei tetere esabunete. ‘Kotemasi ebe apotu ikesisiak kopotu kware, kokokwasi akuan kijotoi isio,’ elimokinete isasedotin isirikalei.

Koloto angor apapero nuka Yesu aipejokin ates. Koumokis noi adumun eorori! Atipet kotakanut imalaikan iarei enapito inapen luimilias. ‘Kanukinyo imoototor yesi Yesu kane?’ Ingesete kesi. ‘Etajarun nges. Koloto atipet kolimokis ikesisiak.’ Kokerata angor kaisunyit noi! Konye korot kitapaik etunganan kes. Ijeni ijo ingai ngesi? Erai Yesu! ‘Koloto kolimokis ikakesisiak,’ ebala ngesi.

Kelimokisi angor ikesisiak ebe ejari Yesu ido aanyutu kesi ngesi, kotionik ikesisiak aiyuun nu. Kokerata Petero ka Yokana ates konye eorori! Kenyoutu Petero ka Yokana, kosalak Mariam Magadalene. Nen ngesi ereikina ates koany imalaikan iarei.

Ijeni ijo nunyoika eswamaikin akuan naka Yesu? Edeke etolio. Mam Edeke kitajarut Yesu kakwan natwania ngesi. Koinak ngesi Yesu akuan na moyo naitetet, kwape ejaatar imalaikan kokuju. Konye kanu aitodikin ikesisiak ebe ejari ngesi, apedori Yesu anapakin akuan naepedorete itunga aanyun, kwape kilosio aisisiaun.

Matayo 27:62-66; 28:1-15; Luka 24:1-12; Yokana 20:1-12.



Angiseta

  • Ingai bo aberu naejai toma aputo, luangai ikiliok iarei lu, ido aibo ejaasi kesi?
  • Kanukinyo alimokina Pilato Isasedotin aijukar isilikaalei aidar ates na edaikinitai Yesu?
  • Anyoika abu emalaika iswama tupuruc sek apaaran nauniet akaulo natwania Yesu, konye anyoika apotu isasedotin iswamata?
  • Kanukinyo abuonokinotor ace angor ne adolotor kesi ates naka Yesu?
  • Kanukinyo akeriaratar Petero ka Yokana aanyun ates naka Yesu, ido inyo apotu kesi kodumtu?
  • Inyo abu kotakanik akuan naka Yesu, konye inyo abu ngesi kiswama kanu aitodikin ikesisiak ebe ajari ngesi?

Angiseta nuiyatakina

  • Kosiom Matayo 27:62-66 ka 28:1-15.

    Kapak na ajaruna Yesu, epone ani apotu isasedotin lukapolok, Iparisayon, ka imakio kodiakaratar asurokin emogo lokalaunan? (Mat. 12:24, 31, 32; 28:11-15)

  • Kosiom Luka 24:1-12.

    Epone ani itodunitotor nuiwadikatai kanu ajarun naka Yesu ebe eseseni Yawe angor kwape ajenak numunon? (Luka 24:4, 9, 10; Mat. 28:1-7)

  • Kosiom Yokana 20:1-12.

    Epone ani ingarakinitor oni Yokana 20:8, 9 anyun eipud lo atitinyikinit arai mam oni imisikinit ejok epone lo ejaar adwarasit nako Baibuli ailelebun? (Awa. 4:18; Mat. 17:22, 23; Luka 24:5-8; Yok. 16:12)