Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 98: Komoru Loka Iseitunin

Aitetemet 98: Komoru Loka Iseitunin

YESU lo Komoru loka Iseitunin. Ikiliok iwongon luejaas kanges eraas ike iyakia. Eraas kesi inacan Anderea ka Petero, ka bobo inacan Yakob ka Yokana. Erai ngol eyekalu loka Edeke ko Yerusalem loiseseni ijo kangina elwana.

Erai kwana aparasia aarei ageun nalosio Yesu Yerusalem ibwanenit asigiria nadidi. Erai Naiaraeit. Tupuruc ajai Yesu oyekalu. Kangina kotamata isasedotin aikamun Yesu aiyar. Konye kokuriakaros aswam nu naarai eminas itunga Yesu.

Yesu ka ikeyakiak

‘Yes imunuo ka idwe luka imunuo!’ Enyarai Yesu ngul ikayaitok luka ediini. Kosodi Yesu atemar ebe, itisilar Edeke kes kanu iboro kere lukarokok nuiswamatos. Akaulo kangun kobuni Yesu kiton Moru loka Iseitunin, kosodete ikiyakia lu iwongon ageun aingit nges aingiseta. Ijeni ijo inyo ingisitos kesi Yesu?

Ingisito ikiyakia nuka iboro luko ingaren. Ejenete kesi ebe ebuni Yesu aitanang nueroko kere kakwap. Konye ekotos kesi ajenun iwori bo ejaunotor nu. Iwori ebongunio Yesu aipuga kwape Ekabaka?

Ejeni Yesu ebe iketupitok kakwap mam epedorete aanyun nges kebongu bobo. Erai kwangin naarai ejaun ngesi kuju, mam kes epedorete aanyun nges kangina. Aso kolimok Yesu ike kiyakia idis koboro luepote ajaun kakwap neipuga ngesi kwape Ekabaka kokuju. Inyo idis koboro kalu?

Ebala Yesu ebe ejaunos ijiisio luepolok, edekakinos itunga luipu ido oriebi etengei, eroniar noi epali ido ejaun amaran naka akwap. Ebala bobo Yesu ebe akiro nukajokak nuka ajakanut naka Edeke elimonokinio aboisio kere kotoma akwap. Kianyu oni, ianyut akiro nu iswamas kaparasia wok? Eebo! Aso ipedori oni aitigogong cut ebe ipugai kwana Yesu kokuju. Edodor ngesi aitangang nuarokok kere kakwap.

Matayo 21:46; 23:1-39; 24:1-14; Marako 13:3-10.



Angiseta

  • Kotoma aputo, ani etunganan lo erai Yesu, ido luangai bo lu ejaas kangesi?
  • Anyoika apotu isasedotin kotamata aiswamaikin Yesu koyekalu, ido anyoika abu ngesi kolimok kesi?
  • Inyo apotu ikeyakia kingita Yesu?
  • Kanukinyo alimokina Yesu ikeyakia icie bore luepote aiswamaunun kakwap ne ipuga ngesi kwape Ekabaka kotoma akuj?
  • Anyoika abu Yesu kolim epote aiswamaun eroko ngesi itananga cut aronis kere kotoma akwap?

Angiseta nuiyatakina

  • Kosiom Matayo 23:1-39.

    Karaida itodunitos aiwadikaeta ebe mam erono aitosom ikiroria lukadoketa kotoma aswam, inyoika itodunitos akiro nuka Yesu nuejaas Matayo 23:8-11 nuikamunitos ikiroria luadoketa kotoma atukot na Ikristayon? (Asw. 26:25; Rom. 13:7; 1 Pet. 2:13, 14)

    Inyo apotu Iparisayon itosomata kanu asimik itunga araun Ikristayon, ido epone ani itosomatar ingarenok luka idiinin aswamisio kwape kangul kapakio kanu? (Mat. 23:13; Luka 11:52; Yok. 9:22; 12:42; 1 Ses. 2:16)

  • Kosiom Matayo 24:1-14.

    Epone ani ikeunitere eipud lo atitinyikin kotoma Matayo 24:13?

    Anyoin apolou na akirot “awasia” kotoma Matayo 24:13? (Mat. 16:27; Rom. 14:10-12; 2 Kor. 5:10)

  • Kosiom Marako 13:3-10.

    Ani akirot kotoma Marako 13:10 naitodunit eipud loaisunyit alimonikin akiro nukajokak, ido epone ani etirorotor oni akiro nuka Yesu? (Rom. 13:11, 12; 1 Kor. 7:29-31; 2 Tim. 4:2)