Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 96: Etangaleu Yesu Luedekas

Aitetemet 96: Etangaleu Yesu Luedekas

NAKERIMOKINIA Yesu akwap, kitangaleu luadekas. Kisiarakin akirot naka aumonokineta nu kocaloi ka oreria lukapolok. Aso kopotu itunga koinut nges ingwalasik ka imudukiok ka ikimingik, kicie da luedekas. Kitangaleu Yesu kere.

Atuboros kwana ikar iuni ageun naebatisa Yokana Yesu. Kosodi Yesu alimokin ikeyakia ebe edodor ngesi alosit Yerusalem, ne earere ngesi, kosodi do ajarun kokatwak. Konye eringa ber ngesi iyatakit aitangaleunun itunga.

Itangaleuni Yesu aberu na edeka

Aparan adiope esisianakini Yesu Anasabato. Asabato erai apaaran naiyengis maka lyudayan. Aberu naiseseniyo kane edeka lem noi. Adaun ikar 18 ekudokina, komam epedori cut aitenar. Kidokok Yesu nges akekanin, kogeuni aitenar. Angaleu ngesi!

Kitakadikis nu ikayaitok luka edini. ‘Ejaas aparasia akanykape nuibusakinitor oni aswam,’ etaanuni odiopet kakesi ekodet. ‘Ngun kesi apaarasia nuebeitor abunere aitangaleunio, mere Nasabato!’

Konye kobongok Yesu ebe: ‘Yes ikiliok luiroko. Idis kayes epedori akesigiria kosodi ayangar aitamat apaaran Nasabato. Aso mam aberu na naadeka adaun ikar 18 ibusakinit aitangaleunio aparan Nasabato?’ Kisurum abongokinet naka Yesu itunga lu lueroko ileic.

Ekaulo kolot Yesu kaikeyakia abear Yerusalem. Kanen ejaas kesi kinga naka ere Yeriko, kiirasi imudukiok iarei ebe itorit Yesu orot. Kiworoto: ‘Yesu ingarak sio!’

Konyarau Yesu imudukiok lu, kingiti ebe: ‘Ikotos keswamaik inyo?’ Kobongokis ebe: ‘Ejakait kopukoros akonye kosi.’ Kotiro Yesu akecekonye, atipet kokwenyut! Ijeni ijo kanukinyo iswama Yesu aumonokineta nuu? Naarai emin ngesi itunga ido ekot kiyuutu nges. Aso abeit ipedori oni amunokin ebe kegeia ngesi aipuga kwape Ekabaka, emameun bobo yenedeka kakwap.

Matayo 15:30, 31; Luka 13:10-17; Matayo 20:29-34.



Angiseta

  • Inyo eswamaenenei Yesu ne alosenena Yesu anator akwap kere?
  • Akaulo na ikar iuni ageun ne ebatisaere Yesu, anyoika abu ngesi kolimok ikeyakia?
  • Lubo ngai itunga luejaasi toma aputo, ido inyo abu Yesu iswamaik aberu?
  • Kanukinyo esuruma abongokinet naka Yesu engarenok luka idiinin ileic?
  • Keapu Yesu ka ikeyakia Yeriko, inyo abu ngesi kiswamaik imudikiok lukican iarei?
  • Kanukinyo eswama Yesu aumonokineta?

Angiseta nuiyatakina

  • Kosiom Matayo 15:30, 31.

    Aitodiar apedor naka Edeke anyoin naitodunitai kanejai Yesu, ido epone ani ibusakinitor ngin atiror aijen wok na iboro luisumunit Yawe kanuka akwap nakitetet? (Sab. 37:29; Isa. 33:24)

  • Kosiom Luka 13:10-17.

    Epone ani itodunitor aiswamaenen naka Yesu akeumonokineta nuepolok kana Sabato alakunio na eyangauni ngesi otunga ne Ipugaa nges kokar Elukumit? (Luka 13:10-13; Sab. 46:9; Mat. 12:8; Kor. 2:16, 17; Apu. 21:1-4)

  • Kosiom Matayo 20:29-34.

    Epone ani itodunitor aiwadikaet na ebe Yesu mam apoloikinit aswam kanu aingarakin itunga, ido inyo ipedori oni aisisiaun kane? (Ikis. 15:7; Yak. 2:15, 16; 1 Yok. 3:17)