Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 95: Epone Loisisianakina Yesu

Aitetemet 95: Epone Loisisianakina Yesu

ADIOPEPAARAN, kolimok Yesu etunganan epone lo ibusakinitor nges amin ekeidunyet. Kingit etunganan Yesu: ‘Ingai bo ekaidunyet?’ Eebo, ajeni Yesu nu aomoomei etunganan lo. Eomit etunganan lo ebe, itunga luateker ke bon ka lu odinike kesi eraasi ikedunyeta. Aso, kaanyutu lu elimokini Yesu ngesi.

Kapakio ace, esisianakini Yesu kopone lo ainakin aitetemet. Nu nges abu ngesi iswama kwana. Abu koinok aitetemet naekamunit Eyudayat ka Esamariat. Idaunit oni aisisiaun ebe Iyudayan luipu mam ekotosi Isamaritan. Na ngesi aitetemet naka Yesu:

Adiope Paaran, ajai eyudayat lo etorit orot lo omoru aibe Yeriko. Konye apotu angatak kosurokis ngesi. Apotu oyangasi akepesan ka aibunga nges kiton asiep atwanare.

Kokau kangun, kobu esasedoti loyudayat aitor orot ngol. Koany etunganan loebungaitai. Inyo iwomit ijo abu iswama? Abu kinac ngesi kosodi ainyikokin akelosit. Kobu bobo etunganan loedini noi. Erai Elebit. Abu kereka opaik? Mam, mam abu kopaik aingaraki etunganan loebungatai. Ipedori ijo aanyun esasedoti ka elebit kongaran elosete korot.

Konye, koany, ingai bo ejai ne ka etunganan loibungatai. Erai Esamariat. Ido, ejai ngesi aingarakin Eyudayat. Ejai apikakin ekia ajimis ke. Okau, abu koyanga Eyudayat aibois na epedoria ngesi aiyengun ka atamakin.

Ekadunyet lo Samaria

Akaulo na adaun aketetemet, kolimok Yesu etunganan loengisit ngesi aingiset: ‘Ingai kotoma lu luni abu iswama kwape edunyet loka etunganan leobungatai? Arai kereka esasedoti, Elebit araibo Esamariat?’

Kobongok etunganan: ‘Esamariat. Ajokuna ngesi nejai etunganan loebungatai.’

Kotema Yesu: ‘Idolit ijo. Aso kolot koyaite luce kwape eswamaa ngesi.’

Mam ijo imina epone loesisianakina Yesu? Ipedori oni aisisiaun iboro luipu noi arai ipupok oni luebala Yesu kotoma obabuli, mam kereka oni ipedori?

Luka 10:25-37.



Angiseta

  • Anyoin aingiset abu etunganan kingit Yesu, ido kanukinyo?
  • Inyo duc etapit Yesu aitosom isisianakina, ido anyoika nuidaunit oni aisisiaun nuikamunitos Iiyudayan ka Isamaritan?
  • Kaitetemet nainakini Yesu, inyo obu kotakanik Eyudayat etorit orot aibe Yeriko?
  • Inyo abu iswamaun kitoroto esasedoti lo Yudayat ka Elebit orot ngol?
  • Kotoma aputo, ingai ajai aingarakin Eyudayat loemusunguna?
  • Akaulo na Yesu adaun aketetemet, angiset ani abu ngesi ingit, ido epone ani abu etunganan kobongokina?

Angiseta nuiyatakina

  • Kosiom Luka 10:25-37.

    Aboisit na arasakin abongokin, epone ani abu Yesu kingarakina etunganan loajeni ikisila aomoom ber ? (Luka 10:26; Mat. 16:13-16)

    Epone ani etosoma Yesu aitupuseta kanu aingarakin ikepupok aipikor aimuarit akekirot? (Luka 10:36, 37; 18:9-14; Tito 1:9)