Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 94: Komina Nges Idwe Ludidik

Aitetemet 94: Komina Nges Idwe Ludidik

KOAY Yesu isirimorit akekanin aitun isapat Yenididi. Ipedori ijo ajenun ebe epodokinit Yesu luididik. Itunga luiteete kesi ekeyakia. Anyoika ejai Yesu alimokin kesi? Angicutu ber.

Apote Yesu ka ikeyakia kotoma alosit naeoja noi. Kotoma oroit, apeganakinos eyakia bonik. Kingit Yesu kesi akaulo na alosit ebe: ‘Anyoika nuipeganakinos yesi bonik korot?’ Eebo, ajeni Yesu nuekamunitos epeget ngol kere. Konye, ingisit ngesi aingiset kanu aanyuun arai elimokinet eyakia ngesi.

Yesu ka ikoku

Mam iyakia, apotu kobongokis, naarai apeganakinos korot nuikamunitos, ingai bo akesi epol aitekarit luce. Ekotosi ice iyakia apolou aitelekarit luce. Epone ani elimokina Yesu kesi ebe, mam ejok akote apolou?

Abu konyarau isapat yenididi, kosodi aisibwo ngesi koingaren kec kere. Kosodi alimokin ekeyakia: ‘Akoto eong yesi ajenun na cut, Arai mam yesi ijulakinos kosodete araun bala idwe luididik, mam yesi ilomarete ajakanut naka Edeke. Etunganan loepol kotoma ajakanut ngesi leoputosi kwape ikoku kanyen.’ Ijeni ijo kanukinyo alimuna Yesu nu?

Eebo, mam idwe ludidik epodosi araut luapolok adepar luce. Aso, ibusakinit ikeyakia aisisiaun araun kwape idwe kopone kalo ido komam apeganakin kanuka apolou.

Ejaa bobo apakio ace nuetodunitor Yesu ebe epodokinit ngesi idwe. Olapio idis koingaren, konyantu itunga icie idwe aanyun Yesu. Kotamakis ikeyakia asukunyar kesi awai. Konye, kolimok Yesu eikeyakia ebe: ‘Kojalakis idwe kopotu mama ajai, ido sirimika kesi, naarai ajakanut naka Edeke erai na itunga kwa kakesi.’ Kosodi Yesu adakunun idwe akanin ke, kosodi aisirereng kesi. Mam kereka ejok ajenun ebe emina Yesu idwe ludidik?

Matayo 18:1-4; 19:13-15; Marako 9:33-37; 10:13-16.



Angiseta

  • Inyoin bo epeganakinos iyakia korot ebongunete?
  • Kanukinyo anyarauna Yesu ikoku yenididi kosodi aisibwo kokiding naka iyakia?
  • Kopone ani ibusakinitor iyakia aisisiaun araun kwape idwe?
  • Kolapio luatupakinete idis, epone ani etoduna Yesu ebe emina ngesi idwe?

Angiseta nuiyatakina

  • Kosiom Matayo 18:1-4.

    Kanukinyo etosoma Yesu aitupuseta kotoma aisisianakin? (Mat. 13:34, 36; Mk. 4:33, 34)

  • Kosiom Matayo 19:13-15.

    Inyoika iponesio luka idwe lu ibusakinit oni aisisiaun aitup arai ikoto oni adumun arerengusio nuka Ajakanut? (Sab. 25:9; 138:6; 1 Kor. 14:20)

  • Kosiom Marako 9:33-37.

    Anyoika abu Yesu isisianak ikesisiak kanu akoto aibosio nukapolou? (Mak. 9:35; Mat. 20:25, 26; Gal. 6:3; Pil 2:5-8)

  • Kosiom Marako 10:13-16.

    Opone ani araar Yesu loapatana adolokin, ido anyoika isisiaunete imakio kotoma anyunet ke? (Mk. 6:30-34; Pil. 2:1-4; 1 Tim. 4:12)