Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 92: Yesu Itajaruni Ikatwak

Aitetemet 92: Yesu Itajaruni Ikatwak

APESE na iseseni ijo kane erai naka ikar 12. Itingit Yesu akekan, papake ka totoke ebwaas kanepe kanen. Ijeni ijo kanukinyo iyalamatar kesi? Angicutu ber oni.

Itajaruni Yesu akoke Yairo

Papake apese erai etunganan loepol loenyaritai Yairo. Apaara adiope abu akoke kodekakin, kiperikinete oitada. Konye mam abu kotamak. Iyata do ariebo noi. Kiyalongong Yairo ka ekeberu noi naarai etakani bala elosi apesekec atwanare. Erai ngesi apese nateluna. Aso kolosi Yairo aimo Yesu. Epupuut ngesi aumonokineta nuiswamai Yesu.

Nakedumunia Yairo Yesu, ejai ekaodet loepol irimokit nges. Konye abu Yairo kitor okodet kosodi aibirokin akeje nuka Yesu. Kobala ebe: ‘Edeka akooka noi, noi. Ke ngaingait, kobu kitangaleu nges.’ Kobala Yesu ebe, abuni eong.

Napelosete kesi, iyatak ekodet aridakin. Atipet kopaik Yesu. ‘Ingai atiro eong?’ ingisi ngesi. Apupi Yesu agogong enyouni kamake, aso ajeni ebe etiroritice nges. Konye ingai? Erai aberu nadeka noi adaun ikar 12. Abu kobu atiror igoen luka Yesu, kitangaleunete!

Koinakis akiro nu Yairo ajaun ejok, naarai epedori ngesi aanyum epone lo epatanikitor Yesu aitangaleun itunganan. Konye kanen obuni etunganan. ‘Sirikitaar bobo Yesu,’ elimokini ngesi Yairo. ‘Atwana akokukon.’ Kiira Yesu nu ido kolimok Yairo: ‘Mam iyalongongoi, engaleuni ngesi.’

Nakedolioto togo loka Yairo, emonyete itunga noi. Konye kotema Yesu: ‘Mam imonyete. Mam ikoku etwanit. Ejotoi.’ Konye kokenatar Yesu naarai ejenete ebe etwanit.

Koyangari do Yesu papake apese ka totoke ka ikeyakia iuni toma agola neperio ikoku. Kiting akekan kosodi atiar: ‘Konyou!’ Kobonguni aijar ke, kwape isesenia ijo kane. Kosodi anyoun! Ngupengun iyalamatar totoke ka papake noi, noi.

Mam na erai itunganan yenisodit Yesu aitajarun. Nasodit nebala Ebaibuli erai okoke apuserut naiboie kore Nain. Ketuboros ngun, kitajaru bobo Yesu Lasaro, onaceke Mariam ka Marita. Neipuga Yesu kwape ekabaka loka Edeke, itajaruni ngesi luipu, luipu luetwakito. Mam nu isialamikitos oni?

Luka 8:40-56; 7:11-17; Yokana 11:17-44.



Angiseta

  • Ingai bo papake apese kana ejai toma aputo, ido kanukinyo ekurianar ngesi ka akeberu?
  • Anyoika abu Yairo iswama edumu Yesu?
  • Inyo abu kotakanu nepe elosi Yesu ore loka Yairo, ido anyoika akiro nuabu Yairo kadum korot?
  • Kanukinyo akwenator icetunga luajaas togo loka Yairo Yesu?
  • Akaulo na aupar nepepe ka ikeyakia iuni, papakake ka totoke apese, anyoika abu Yesu kiswama?
  • Ingai bobo ice yen etajarunit Yesu kokatwak, ido inyo itodunitos nu?

Angiseta nuiyatakina

  • Kosiom Luka 8:40-56.

    Epone ani etodikina Yesu aberu nalelete aokot aitim ka aiwomisionut, ido inyo epedorete imakio lu Kristayon atukot aisisiaun kane? (Luka 8:43, 44, 47, 48; Leb. 15:25-27; Mat. 9:12, 13; Kol. 3:12-14)

  • Kosiom Luka 7:11-17.

    Kanukinyo epedoratar luetwakiaritos luminan kec kotoma atwanare adumun aitalakario kanu eswamaikini Yesu apuserut naka Nain? (Luka 7:13; 2 Kor. 1:3, 4; Bur. 4:15)

  • Kosiom Yokana 11:17-44.

    Epone ani etoduna Yesu ebe ejok aimony atwanare na iminat kon? (Yok. 11:33-36, 38; 2 Sam. 18:33; 19:1-4)