Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 90: Kede Aberu Atan

Aitetemet 90: Kede Aberu Atan

APAAIK Yesu aiyengun atan ko Samaria. Aloto ikekesisiak egwelet inyamat. Aberu naineratar Yesu ebunit aiwok akipi. Kotema Yesu: ‘Koinak eong akipi kamat.’

Inerasi Yesu ka aberu nako Samaria

Koumok aberu noi. Ijeni ijo kanukinyo? Naarai Yesu erai Eyudayat, aberu erai Asamariat. Iyudayan luipu mam ekotos Isamarian. Mam ineras da kakes! Konye Yesu emin itunga kere. Aso kotema: ‘Arai ijo kojeni ngol lokingisit akipi, tikilip nges, tikiinak jo akipi nukaijar.’

Ebala aberu ebe: ‘Ejakait, idul atan, ido emamei ijo ibore yeniwokunet. Idumakini aibo akipi ngun nukaijar?’

‘Arai kimat ijo akipi katan kana ijaki bobo akur,’ ebala Yesu. ‘Konye akipi nuainakini eong epedorete aitajar itunganan ikar kere.’

Ebala aberu ebe: ‘Ejakait, koinakinai eong akipi ngun! Kenyek akur aijak karaida abunenen ne aiwok akipi.’

Eomit aberu ebe inera Yesu akipi akulepek. Konye inera ngesi abeit naka Edeke ka kejakanut. Abeit na erai bala akipi nukaijar. Epedorete ainakin itunganan aijar namam edaun.

Kolimok do kwana Yesu aberu: ‘Kolot konyarau okilenikon, kobongu ne.’

Kobongok ngesi ebe: ‘Emamei eong ekiliokit.’

Obala Yesu: ‘Ibongok abeit. Konye kijaas kikiliok ikany, ngol da loijaatar kwana mam erai okilenikon.’

Koumok aberu, naarai nukere erai abeit. Biai ajenunia Yesu nu? Eebo, naarai erai Yesu Lokisumunitai kijukuni Edeke, ido ainak Edeke nges akiro nu. Kapak kana, kobongunete isisiak luka Yesu, koumokis naarai kineras kaberu Nasamariat.

Nunyoika kisisauni kanu kere? Itodunit ebe esiana Yesu kede itunga lukatekerin kere. Ibusakinit oni da aswam kwangin. Mam ibusakinit oni aomit ebe eroko icietunga kanuka ateker kec. Ekot Yesu itunga kere ajenun abeit nakitodoli aijar namam edaun. Oni da ibusakinit akote aingarakin itunga aisisia abeit.

Yokana 4:5-43; 17:3.



Angiseta

  • Kanukinyo apaikina Yesu atan nako Samaria, ido anyoika nuineras ngesi ka aberu nangina?
  • Kanukinyo eumokinitor aberu, anyoika alimoki Yesu ngesi, ido kanukinyo?
  • Akipi anyoika nu eomit aberu ebe enera Yesu, konye akipi anyoika nu cut enera ngesi?
  • Kanukinyo aumokina aberu ebe ejeni Yesu nuipu nuikamunitos ngesi, ido epone ani aduma ngesi akiro nu?
  • Anyoika nuipedori oni aisisisiaun kanejai aberu najai atan?

Angiseta nuiyatakina

  • Kosiom Yokana 4:5-43.

    Katupitos anyunet naka Yesu, epone ani ibusakinitor oni asesen itunga lu ateker acie, araibo lu ejautene ece? (Yok. 4:9; 1 Kor. 9:22; 1 Tim. 2:3, 4; Tito 2:11)

    Anyoika arerengusio nu emoyo nueponikinete itunganan yen araun esisian loka Yesu? (Yok. 4:14; Isa. 58:11; 2 Kor. 4:16)

    Epone ani ipedoria oni aitudoun aiyalama kwape etoduna asamariat ido na okukurana aimor kaluce nuesisiaut ngesi? (Yok. 4:7, 28; Mat. 6:33; Luka 10:40-42)