Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 88: Ibatis Yokana Yesu

Aitetemet 88: Ibatis Yokana Yesu

KOANY ajele ebuni akou naka etunganan. Erai etunganan Yesu. Erai kwana ngesi lo ikar bala 30. Loejaas kede kanges erai Yokana. Kidaut aisisa nuke. Kiitutijo nekalosio Mariam aipejokin apajanake Elisabet, kosukor ikoku kakoik ke Elisabet kanu aiyalama? Ikoku ngin yenimam aurutai nges Yokana. Konye inyo nunyo ika kwana iswamaete Yokana ka Yesu?

Ibatisao ka Yesu

Adau Yokana aitulumikin Yesu Ocor Yorodan. Kwangin ibatisaere itunganan. Itulumikino ber toma akipi, Kosodete aikeun kuju. Naarai nuu ngesi iswamanakini Yokana itunga, enyaritai nges Yokana Ekebatisan. Konye kanukinyo ebatisa Yokana Yesu?

Eswama Yokana nu naarai Yesu engisi Yokana aibatis nges. Ibatisai Yokana itunga luekotos aitodun ebe itironikina kanuka aswamisio kec nukarokok. Konye iswamat cut Yesu idiobore yenerono tetere itironikin? Mam cut, mam Yesu iswamat naarai erai ngesi Okoku obe loka Edeke kokuju. Aso ingisit ngesi Yokana aibatis nges kanu akirot ace na egelakina. Kaanyutu anyoin bo akirot ngin.

Eroko Yesu kebuno nejai Yokana, arai ngesi ekeon. Ekeon nges itunganan yeniswamai iboro kakito, kwape nat imesan, icolongo ka abaoi nuiboiere. Yosep okilenike Mariam arai ekeon, ido abu kisisanak Yesu da araun ekeon. Konye mam Yawe ejukunit Okokuke akwap araut keon. Ejaas ngesi kaswam naitegelikina, ido adolu apak na egeara Yesu. Aso tetere itoduni ebe do kwana nges ageun aswam akote naka Papake, abu Yesu kingit Yokana aibatis ngesi. Elakara Edeke kede nuu?

Eebo, elakara, naarai kedoku Yesu kakipi, kotema eporoto kokuju ebe: ‘Lo nges Okokuka, loalelia eong.’ Ido, esubit bala apukor akuj kosodi ajele aijesun nejai Yesu. Konye mam erai ajele alope. Erai aputoke. Erai cut emoyo loka Edeke.

Kwana do ejaas Yesu kamuiomooma, aso nuipu aibois nakesil aparasia 40. Kangina kobunok Satan. Kotam Satan irwanauni acodun Yesu aswam ibore yen ebilit ikisila luka Edeke. Abu kolot konye mam Yesu iswama.

Akaulo kangun, kobong Yesu kiriamunos kitunga luapotu koraunos ikekatupitok arai ikesisiak. Ikiroria kicie ka kes Anderea, Petero (loenyaritai Simon), Pilip ka Natanael (loenyaritai Batolomayo). Koloto Yesu kalu Galilaya. Ko Galilaya kopaitkis ore Kana obuke Natanael. Kanen koloti Yesu opucit odukone, kiswama aanyunet ke nasodit. Ijeni jo arai inyo? Abu kituluo akipi ebino.

Matayo 3:13-17; 4:1-11; 13:55; Marako 6:3; Yokana 1:29-51; 2:1-12.



Angiseta

  • Luangai ikiliok iarei luejaas toma aputo?
  • Epone ani ibatisaere itunganan?
  • Lungai duc ebatisaenenei Yokana?
  • Kanu aswam ibore inyo yeni tegelikina akotor Yesu Yokana aibatos ngesi?
  • Epone ani etoduna Yawe ebe eyalama ngesi naarai ebatisaun Yesu?
  • Inyo abu kotakan elot Yesu aibois naelilingi adaun apaarasia 40?
  • Luangai ice kotoma ngul luageunete atupakin Yesu, ido ani aumokinet ke nasodit ngesi aswam?

Angiseta nuiyatakina

  • Kosiom Matayo 3:13-17.

    Anyunet ani obu Yesu kitodu kanu aibatisao naka ikesisiak? (Sab. 40:7, 8; Mat. 28:19, 20; Luka 3:21, 22)

  • Kosiom Matayo 4:1-11.

    Epone ani isinyikokina oni epone loetosoma Yesu aiwadikaeta ejok, aisisia ebaibuli duc? (Mat. 4:5-7; 2 Pet. 3:17, 18; 1 Yok. 4:1)

  • Kosiom Yokana 1:29-51.

    Abu Yokana iteten ikesisiak nejai ingai, ido epone ani iputora oni ngesi lolo? (Yok. 1:29, 35, 36; 3:30; Mat. 23:10)

  • Kosiom Yokana 2:1-12.

    Epone ani etodunitor aunokinet nasodit naka Yesu ebe, mam Yawe imikari idiobore yen ejok kojaanakinak ke? (Yok. 2:9, 10; Sab. 84:11; Yak. 1:17)