Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 87: Yesu Ne Araar Ikoku Koyekalu

Aitetemet 87: Yesu Ne Araar Ikoku Koyekalu

KOANY isapat ineras kitunga luepolok. Eraas kesi ikesisianakinak koyekalu loka Edeke ko Yerusalem. Isapat nges Yesu. Apolou ngesi. Erai kwana ngesi wikar 12 lukapolou.

Eumokitos ikesisianakinak noi ebe ejeni Yesu nuipu nuikamunitos Edeke ka nuiwadikatai toma Obaibuli. Konye kanukinyo emamiatar Yosep ka Mariam kane? Aibo ejaas kesi? Angicutu ber oni.

Yesu eroko erai ikoku inerasi ka ikesisianakinak

Kangol karu eyauni Yosep ekaleke Yerusalem ainumunum epucit loka Aleleng. Eoja erot anyoun ko Nasaret kiton Yerusalem. Emami yen ejaatar kemotoka, agalin nukapuru da emamete. Amamete iboro ngul aparasia ngun kangun. Itunga luipu erai alosit kakej, ido eyangaikini kes aparasia bala auni adolere Yerusalem.

Ejaatar Yosep kwana do kekale loepol. Aso ejaas do Yesu ka kinacan kaanacan ludidik luebeit aidas. Kokaru kalo, anyout Yosep ka Mariam kede idwe kec erot loelwana abongor ore Nasaret. Koomitos kesi ebe ejai Yesu da kaluce. Konye ne abwounata ebong, mam kes apotu opedosi adumun Yesu. Kosodete aimo nges opajanakec ka opaperokec da, konye emame ngesi! Aso kobongosi kesi Yerusalem emotos nges.

Kanen kodumakisi do Yesu kakesisianakinak. Epupokinit kesi ido ingisingisei, kesi aingiseta. Koumokis itunga kere epone lo acoar naka Yesu. Konye kotema Mariam: ‘Ikakoku, kanukinyo kikonakinia sio kwangin? Papakon ka eong da kapotu.’

Kobongok Yesu: ‘Kanukinyo kimoiata eong? Mam kereka yes ijenete ebe kebusakinit aiboi kotogo loka Papaka?’

Eebo, amin Yesu ajaut ne epedoria ngesi aisisia nuka Edeke. Mam ti oni da ipupi kwangin? Kore Nasaret, alosenene Yesu atukonokin aima kangolisabiti. Naarai apupokinit duc, abu kisisiau iboro luipu ko Baibuli. Katupata oni da aanyunet naka Yesu.

Luka 2:41-52; Matayo 13:53-56.



Angiseta

  • Araibo Yesu lo ikar idi lukapolou kotoma aputo, ido aibo ajai ngesi?
  • Inyoin eswamaenenei Yosep nepepe ka ekale ke angol karu?
  • Akaulo na alosit adaun apaaran adiopet kere kanu abongor ore, kanukinyo abongoratar bobo Yosep ka Mariam Yerusalem?
  • Aibo apotu Yosep ka Mariam kodumakis Yesu, ido kanukinyo aumonokinotor itunga lu ajaas ngina?
  • Anyoika abu Yesu kolimok Mariam totoke?
  • Epone ani ipedoria oni araun bala Yesu kotoma aisisia nuikamunitos Edeke?

Angiseta nuiyatakina

  • Kosiom Luka 2:41-52.

    Karaida ebala Ekisil ebe ikiliok bon ebusakinit alosenen opucito Yerusalem angolikaru, anyoin anyunet na ejok naijaikinit Yosep ka Mariam auriak lolo? (Luka 2:41; Ikis. 16:16; 31:12; Awa. 22:6)

    Epone ani etoduna Yesu anyunet naejok kanuka atumunak lolo kopone lo arimarit iuriak kec? (Luka 2:51; Ikis. 5:16; Awa. 23:22; Kol. 3:20)

  • Kosiom Matayo 13:53-56.

    Lungai inacan iwongon lueurunitai kede Yesu kakoik adiopet lu elimunitai kotoma Obaibuli, ido epone ani etosomaere iarei kakes kotoma atukot naka Ekristayone kokau? (Mat. 13:55; Asw. 12:17; 15:6, 13; 21:18; Gal. 1:19; Yak. 1:1; Yuda 1)