Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 86: Itunga Lu Ingarenikit Aacerit

Aitetemet 86: Itunga Lu Ingarenikit Aacerit
Lukacoa

IPEDORI ijo aacerit aanyuun ngin asarani naedodit ediopet kotunga kalu? Kenyoutu kesi ko Yerusalem, kotakanuni aaceti. Itunga lu eraas Lukokide, ido isisiaate aacer. Iyuunito ebe eyangari aacerit na nakitetet kes nejai itungan yenepol.

Kedoloto itunga lu Yerusalem, apotu kingita: ‘Aibo ejaai ikoku loebeit araun ekabaka loka Iyudayan?’ “Iyuudayan” erai ekiror ecie loka, Israelin. Kobalas kesi ebe: ‘Apotu kaanyutu aacerit ke Kokide, ido kibunit isio aima nges.’

Nakepupunio Kerode, loerai ekabaka ko Yerusalem akiro nu, abu kiyalongong. Mam nges akoto ecie ekabaka ajaun aiboisike. Aso konyarau Kerode isasedotin kosodi aingit: ‘Aibo eurikinio ekabaka loisumunitai?’ Kobongokisi kesi atiar: ‘Ebala Ebaibuli toma Betelekem.’

Aso konyarau Kerode itunga Lukokide, kotema: ‘koloto komoata ikoku. Kidaut aanyun, kitejenikis eong. Akoto eong da alosit aima nges.’ Konye, akoto Kerode amoun ikoku kosodi aiyar cut!

Kanen kingarenik aacerit itunga kiton Betelekem, kosodi aibwo kaibois kaneejai ikoku. Kelomasi kesi togo, apotu kodumutu Mariam ka ikoku Yesu. Kolemutu ainanakineta kosodete ainakin Yesu. Konye ekaulo kikwenya Yawe kes kairujasit ebe siri kebongosi nejai Kerode. Aso kobongosi obukec kecie erot.

Nakesisiauna Kerode ebe, itunga lu Lukokide abongosi bukec, konyunyurikin noi. Aso abu kicorak aiar idwe kere lusap lukejaasi Betelekem lukeraas luka ikar iarei kwap. Konye kikwenya Yawe Yosep eringa apak kairujasit, kosodi Yosep ayangar ekaleke Misiri. Ekaulo, kisisiau Yosep ebe atwana Kerode, kinyaka ngesi Mariam ka Yesu ore Nasaret. Nee apolounio Yesu.

Iwomit jo ingai ainakini aacerit ngin nakitetet acaun? Kiitu, apotu itunga koloto ber Yerusalem akaulo na aanyun aacerit. Satan, Ekejodijodon ngesi akot aiyar Okoku loka Edeke, ido ajeni ebe abuni Ekabaka Kerode loka Yerusalem atamakin aiar nges. Aso Satan cut nges ainakini aacerit ngin acaun.

Matayo 2:1-23; Mika 5:2.



Angiseta

  • Lubo angai ikiliok luejaasi toma aputo, ido kanukinyo edoditor ediopet kakes naimilia?
  • Kanukinyo akadakina Ekabaka Kerode, ido inyo abu ngesi iswama?
  • Aibo obu naemilia kingarenik ikiliok, ido kanukinyo abongoratar kesi akwap kec korot ece?
  • Anyoin aicorakinet abu Kerode kicorak, ido kanukinyo?
  • Anyoika abu Yawe kolimok Yosep aswam?
  • Ingai abu koinak acaun, ido kanukinyo?

Angiset naiyatakina

  • Kosiom Matayo 2:1-23.

    Adaunit bo Yesu apak na atia ai ido aibo eboio ngesi epote lukacoa kokide aipejoikin ngesi? (Mat. 2:1, 11, 16)