Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 85: Kourikinai Yesu Togo Loka Itiang

Aitetemet 85: Kourikinai Yesu Togo Loka Itiang

IJENI ijo ingai bo imukeru yen? Eebo, erai Yesu. Aurikin ngesi togo loka itiang. Kiperik Mariam Yesu atuba nakenyamenenata asigirian ka itiang ice. Konye kanukinyo ejaatar Mariam ka Yosep nee kede ibaren? Mam ne edolit aodoikin imukeru cut?

Mam cut. Nuta ejaatar kesi nee: Ekayaiton loka Rome, Kaisar Agusito, iswamaut ekisil ebe koloto itunga kere aiwadikao, ngin itunganan bukec. Aso eurikitai Yosep ne Betelekem. Konye kedolutu ngesi ka Mariam, amamei adio agola kanukec kanginiboisit kere. Aso ajai do kesi abunere nee ka ibaren. Kapaaran napana, idouni Mariam Yesu! Kwape isesena ijo, engale ngesi.

Yosep, Mariam, ka Yesu imukeru

Itei ijo ikecokok epote aanyun Yesu? Ajaas kesi ais kuare aidar akecemerekekin, kocauni aica airimokin kes. Arai emalaika! Kokuriakaros ikecokok noi. Konye kotema emalaika: ‘Sirikikuriakaros! Kainunit yes akiro nukajokak. Lolo ko Betelekem, auruun Kristo Ejakait. Ebuni ayuun itunga! Idumunete imukokitai kigoen koperi katuba.’ Atipet kopotu imalaikan luipu kogeunetu aitur Edeke. Aso atipet koloto ikecokok lu aimo Yesu, kodumutu.

Ijeni ijo, inyo bo eraar Yesu loitegelikina? Ijeni ijo cut ingai ngesi? Kiitu, kotoma aitetemet nasodit koitabo kalo apotu kalimutu nuikamunitos Ekiai loka Edeke. Okoku lo iswamat kede Yawe aisub akuj ka akwap kanginibore kere. Aso lo nges araun Yesu!

Eebo, abu Yawe kolem aijar naka Okokuke kokuju kosodi aibwaikin toma akoik naka Mariam. Atipet kogeuni imukeru apoloo kotomake kwape epoloto idwe ice kotoma nuka totokec. Konye arai imukeru yen Okoku loka Edeke. Engetakini idounete Yesu kotogo loka itiang ko Betelekem. Ipedori jo kwana aanyun inyo bo eyalamatar imalaikan kanu apedor alimokin itunga ebe auruun Yesu?

Luka 2:1-20.



Angiseta

  • Igai bo imukeru kotoma aputo, ido aibo iperikit Mariam ngesi?
  • Kanukinyo aurikinere Yesu togo loka itiang nepepe ka itiang?
  • Kotoma aputo, lubo angai itunga luelomarete togo loka itiang, ido anyoika alimokit emalaika kesi?
  • Kanukinyo etegelikinar Yesu?
  • Kanukinyo epedorere anyara Yesu Okoku loka Edeke?

Angiseta nuiyatakina

  • Kosiom Luka 2:1-20.

    Anyoin atutubet nabu Kaisar Augusito iswama kanu ailelebikin adwarasit naikamunit aurio naka Yesu? (Luka 2:1-4; Mika 5:2)

    Epone ani epedoria idiotunganan araun idiopet kangul luenyaritai ‘itunga luitojokitai’? (Luka 2:14; Mat. 16:24; Yok. 17:3; Asw. 3:19; Bur. 11:6)

    Arai epedorete ecokok lueyapara luko Yudaya aiyalamikin noi kanu aurio naka Elakunan, anyoika nuepolok noi nuepedorata ijaanakinak luka Edeke aiyalamikin lolo? (Luka 2:10, 11; Pes. 3:8, 9; Apu. 11:15; 14:6)