Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 83: Arwatat Naka Yerusalem

Aitetemet 83: Arwatat Naka Yerusalem
Iswamak edukete bobo arwatat nako Yerusalem

KOANY aswam na iswamaa kane kere. Ejaasi itunga luka Isirael aiduk arwatat naka Yerusalem. Kemudia Ekabaka Nebukadenesar Yerusalem ikaru 152 kau, abu kotiyak arwatat kaicweikin irutei lukore. Mam itunga luka Isirael apotu ber kodukoto arwatat kebongutu ko Babulon.

Anyoika nu iwomit ijo epupete itunga lu aiboi kane ikaru lukere komamei arwatat nairimokit erekec? Mam kes epupete ayuara. Epedorete luasurup kec alomun kapatanu asurokin kes. Konye do kwana etunganan lo Nekemia engaraki itunga aiduk bobo arwatat. Ijeni ijo ingaibo Nekemia?

Nekemia erai Esiraelit loelomunit kotoma ore Susa, neiboyoto Morudekai ka Esita. Eswamai Nekemia togo loka ekabaka, aso acepak erai epapero loka Morudekai ka Akabaka Esita. Konye mam Ebaibuli ebala ebe ejanakini Nekemia okilenike Esita, Ekabaka Akasuero. Ejanakini ngesi ekabaka loatupakini, Ekabaka Aratasasata.

Kiitu Aratasasata nges ekabaka loajokan loabu koinak Esera apesan ngul kere ayanngar Yerusalem adukio eyekalu loka Yawe. Konye mam Esera abu koduk arwat natiyara nakore. Aanyutu ber oni ikwaikini ai ebe Nekemia eswamai aswam na.

Erai ikaru 13 ageun naeinakina Aratasasata Esera isirigin adukio eyekalu. Nekemia kwana erai lo epoloikinit aitingakit Ekabaka Aratasasata aikopo. Apolouke ebe ijanakini ngesi ekabaka ekebino, ka aanyun ebe emamei itunganan etami ainakin ekabaka ekia loeyari. Erai aswam ke nadoketait nakokuju.

Adiopeparan kopotu Kanani onaceke Nekemia ka icietunga ko lsirael aipejokin Nekemia. Kolimokis nges ationis naejaatar Isiraelin, ka epone loeringar arwatat etiara. Kitakadikis nu Nekemia kosodi ailip nejai Yawe.

Adiopeparan, koany ekabaka ebe ekadakit Nekemia, kingit: ‘Inyobo itakadikit ijo?’ Kolimok Nekemia nges ebe, erai naarai erono ejautene loko Yerusalem ka arwatat da etiara. Ingit ekabaka bobo ebe, ‘inyobo ikoto ijo?’

Ingarenikit Nekemia aswam naka iduku

Kobala Nekemia, ‘Kocamac eong kalot Yerusalem tetere eong aduki arwatat.’ Esiana noi ekabaka Aratasasata. Ebala ebe, epedori Nekemia alosit, ido ingarak nges adumun akito nuedukere aduketa acie. Katipet kedolu Nekemia Yerusalem, kolimok itunga aitemonokineta ke. Isimas kesi aomisioit, kotemasi: ‘Ageutu aiduk.’

Kewanyutu lukasurup luka Isiraelin arwatat ikunyi kuju, kotemasi: ‘Kilosi aiyar kes, kaitapalar aduk.’ Konye kopup Nekemia nu, kosodi ainakin eswamak ikilenga ka akwaras. Kobala: ‘Mam ikuriaka lukasurup wok. Kojioto kanu inacanakus, kanu idwekus, kanu angor kus, ka kanu ireriakus.’

Atiting itunga noi. Itemokitos ikecejiisio etenito paaran ka akware, koutas aiduk. Aso kotoma aparasia 52 kodaun arwatat. Kwana epupete itunga ayuara kotoma ore. Isisianakinete Nekemia ka Esera itunga ekisil loka Edeke, ido iyalamas itunga.

Konye eringa iboro mam eputos kwape ajaatar eringa Isiraelin keyangara kwape imusuben Babulon. Ipugat ekabaka loko Perusia itunga, ido ibusakinit kesi aijanakin da nges. Konye isumunit Yawe ebe ijukuni ngesi ekabaka loitetet, ido eyauni ekabaka lo ainapakin otunga. Ingai bo ekabaka lo? Epone bo ani eyauna ngesi ainapakin akwap? Ikaru lueyapiarete 450 atuboros eringa adis kisisiauna nuikamutos nu. Kanen ejai aurio naka imukeru naepol noi. Konye erai ngin aitetemet acie.

Nekemia isulai 1 kiton 6.



Angiseta

  • Epone ani apupotor Isiraelin kanu amamear arwatat na erimokinit erekec Yerusalem?
  • Ingai bo Nekemia?
  • Anyoin aswam ke Nekemia, ido kanukinyo eraar naepol noi?
  • Inyoika iyemuto luetakadikis Nekemia, ido inyo abu ngesi iswamaa?
  • Epone bo ani etodikina Ekabaka Aratasasata Nekemia asianut?
  • Epone bo ani abu Nekemia itemokina aswam na aduko tetere mam lukasurup luka Isirael itapaikinete aswam?

Angiseta nuiyatakina

  • Kosiom Nekemia 1:4-6 ka 2:1-20.

    Epone bo ani amoia Nekemia aingarenikinio naka Edeke? (Nek. 2:4, 5; Rom. 12:12; 1 Pet. 4:7)

  • Kosiom Nekemia 3:3-5.

    Anyoika nuepedorete imakio ka ejanakinan aisisiaun kotoma kanejaai aitirian kiding Itekoin ka “isotiakec”? (Nek. 3:5, 27; 2 Ses. 3:7-10; 1 Pet. 5:5)

  • Kosiom Nekemia 4:1-23.

    Inyo etogogongi Isiraelin aiyatakin aiduk karaida ejai areio namuana noi? (Nek. 4:6, 8, 9; Sab. 50:15; Isa. 65:13, 14)

    Opone ani itogogonga anyunet naka Isiraelin oni lolo?

  • Kosiom Nekemia 6:15.

    Inyo itodunit airikakinio aiduk arwatat naka Yerusalem kotoma olapia iarei bon nuikamunit apedor naka aiyuun? (Sab. 56:3, 4; Mat. 17:20; 19:26)