Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 82: Morudekai Ka Esita

Aitetemet 82: Morudekai Ka Esita

ABONGOSI ber kau ikaru idis eringa Esera keloto Yerusalem. Morudekai ka Esita kes itunga luka Isirael luepolok kotoma ajakanut nako Perusia. Esita erai akabaka, onaceke Morudekai erai loiyareit atupit ekabaka loipugat. Aanyutu epone ali eswamaunotor nu.

Apotu iuriak luka Esita kotwakata eringa ngesi edit noi, aso Morudekai etopolouni nges. Akasuero, ekabaka loko Perusia, ejaas ketogo loka apolou toma ore Susa, ido erai Morudekai ediopet kojanakinak ke. Adiopeparan abu aberu naka akabaka Basiti komwang Okilenike, aso koseuni ekabaka aberu naitetet araun akabaka. Ijeni jo aberu naseu ngesi? Eebo, atumunan nabucel Esita.

Haman Itakadikit Morudekai

Iseseni ijo etunganan lo loepoga loekukonokinos itunga? Erai lo Kaman. Erai ngesi etunganan loepol ko Perusia. Ekot Kaman Morudekai da loiseseni jo iboie kane, akukonokin nges. Konye mam Morudekai icaki. Mam nges eomit ebe edolit akukonokin etunganan loerono kwanat kalo. Apotu nu kitakadikis Kaman noi. Aso abu kiswamau nu.

Kolimok Kaman ekabaka nukaisab nuikamunito itunga luka Isirael. Kobala ngesi ebe: ‘Eraas ngul itunga lueroko lumam erimaritos ikisilakon. Ibusakinit aiyar kes.’ Mam Akasuero ejeni ebe akeberu Esita erai nako Isirael. Aso kopup ngesi nuebala Kaman, kosodi aitolomun ekisil ebe ebeit aiyar itunga luka Isirael kere.

Kepupu Morudekai nuikamuto ekisil, kokadak noi. Kijukak Esita akiro: ‘Ibusakinit ijo alimokin ekabaka, ingainga nges ayuun oni.’ Mam ekisil loko Perusia ecamakit alosit aanyuun ekabaka arai mam iwororitai. Konye abu Esita kolot elomar komam enyararitai. Ikiari ekabaka ekebela loka esabu nejai ngesi, apolouke ebe mam ebeit aiyar nges. Abu Esita konyarau ekabaka ka Kaman opucit. Kangina kingisi ekabaka Esita agangat naekot ngesi kane ejai ekabaka. Kotema Esita ebe elimokini ngesi arai kepotu ka Kaman bobo ainyam aparan naetupakini.

Kapak nainyam kangin kolimok Esita ekabaka: ‘Ikatunga ka eong ebeit aiyar.’ Konyunyurikin ekabaka. Kingit ebe: ‘Ingai iswamauni ibore yenikoni nen?’

Kobala Esita: ‘Etunganan loasurup nges ekaronon Kaman!’

Akabaka Esita Kitoronit Haman

Anyunyurikin ekabaka noi kwana. Kicorak koarai Kaman. Akaulo, kitarau ekabaka Morudekai loiyareit katupite nges. Ejai Morudekai aanyun ebe iswamaunio ekisil loitetet loecamakit itunga kuka Isirael ejie kanu aijarakec aparan naebeitor aiyar kes. Naarai erai kwana Morudekai etunganan loapolon, engarakisi itunga luipu itunga luka Isirael, ido ayuaros kesi kanejaas kukasurup kec.

Eitabo loko Ebaibuli loka Esita.



Angiseta

  • Lubo angai Morudekai ka Esita?
  • Kanukinyo akotor Ekabaka Akasuero aberu ace naitetet, ido ingai abu ngesi koseu?
  • Ingai bo Kaman, ido inyo abu koinak ngesi anyunyurikin noi?
  • Ekisil enyoin eswamaun, ido inyo abu Esita iswama akaulo na adumun akirot kane ejai Morudekai?
  • Inyo abu kotakanik Kaman, ido inyo abu kotakanik Morudekai?
  • Epone ani ayuarotor Isiraelin kane ejaa luasurupo kec?

Angiseta nuiyatakina

  • Kosiom Esita 2:12-18.

    Epone ani etoduria Esita ameda na aitoduun ‘emoyo lo asegara ka ayongit’? (Est. 2:15; 1 Pet. 3:1-5)

  • Kosiom Esita 4:1-17.

    Kwape ejaikinitere Esita arerengu na aswam kanu aingarakin aima nabeit, anyoin arerengu na ijaatar oni da lo kanu aitodun ainakina ka abeit wok nejai Yawe? (Est. 4:13, 14; Mat. 5:14-16; 24:14)

  • Kosiom Esita 7:1-6.

    Epone ani etodunatar luipu kotunga luka Edeke ebe epalitos kesi aijar kec kwape eswama Esita? (Est. 7:4; Mat. 10:16-22; 1 Pet. 2:12)