Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 81: Amunokina Agangat Naka Edeke

Aitetemet 81: Amunokina Agangat Naka Edeke

EJAAS itunga lueapiarete 50,000 orot loalwanan anyoun ko Babulon kitoni Yerusalem noi. Konye kedoloto, emunara Yerusalem. Emamei yeniboie kangina. Ebeit itunga luko Isirael aitemun bobo aiduk nginibore kere.

Idiopet koboro lusodit aiduk erai elutairi. Erai abosit na einakinere Yawe asuban nuka itiang ka ainakineta. Ketuboros ilapio idis kogeutu itunga luko Isirael aiduk eyekalu. Konye mam idunyeta luasurup ekotos Isiraelin aiduk. Aso apotu kotamata aitukurian kesi tetere epalarete. Kawasia, apotu kitosomata ekabaka loitetet loko Perusia aitolomun ekisil loitanangi aiduk.

Kotuboros ikaru. Erai kwana ikar 17 anyoun nabongunatar itunga luka Isirael ko Babulon. Kijuk Yawe ikenabin Kagai ka Sekaria alimokin itunga ageun aiduk bobo. Komunokis itunga agangat naka Edeke, ido erimaritos inabin. Kogeutu bobo aiduk, araida egirit ekisil.

Aso abu ejakait loko Perusia ekekiror Tatenai kobu aingit Isiraelin lu apedor naejatar kesi aiduk eyekalu. Kolimokinete itunga luka Isirael nges ebe, ne ajatar kesi Babulon, abu Ekabaka kuro kolimok kes: ‘Koloto, Yerusalem ido kudukoto eyekalu loka Yawe, Edekekus.’

Kijukari Tatenai ebalua ngina Babulon aingit arai Kuro, lo kwana etwanit, abu kolimute ngun. Katipet kobonguni ebalua kanejai ekabaka loitetet loko Perusia. Ebala ebe abu cut Kuro kolimute ngun. Aso kiwadik ekabaka: ‘Kodukoto itunga luka Isirael eyekalu loka Edekekec. Ido ecorakit yes aingarakin kes.’ Kodaun aidukio naka eyekalu kotoma kapak na bala ikaru iwongon, kiyalamikinos itunga luka Isirael noi.

Atuboros bobo ikaru icie luipu. Erai kwana ikaru luepiarete 48 anyoun nangetakinor eyekalu. Icanas itunga luko Yerusalem, ere ka eyekalu loka Edeke mam ibusak. Ko Babulon, Esera etunganan loka Isirael, abu kisisiau nuka aitemokin eyekalu loka Edeke. Aso ijeni ijo nueswama ngesi?

Abu Esera Kolot aanyun Aratasasata, ekabaka loko Perusia, kosodi ekabaka lo kwape ajokar ainakin Esera ainakineta nuipu ayangar Yerusalem. Kosodi Esera aingit itunga luka Isirael luajaasi Babulon aingarakin ngesi ayangar ainanakineta nu Yerusalem. Kotemasi itunga luadolitos 6,000 ebe elosete kesi. Ejatar kede epuesa ka esabu loepol ka icieboro da aibwokor.

Iyalongongoi Esera, naarai ejaas itunga luarokok orot. Eminas itunga luayangar ekec epuesa ka esabu, ka aiyar kes. Aso konyarau Esera itunga nepepe, kwape iteio ijo kaput. Kesodete ailip nejai Yawe ayuar kes korot ebongorete Yerusalem.

Esera keda itunga Ilipete

Abu Yawe koyuwa kes. Akaulo nalosit adaun ilapio iwongon, kodolunete Yerusalem ejok cut. Mam na itodunit ebe epedori Yawe ayuwar ngul lu emunokina akegangat?

Esera isulai 2 kiton 8.



Angiseta

  • Itunga idi apotu obongosi anyoun Babulon kiton Yerusalem alosit na oja, konye inyo apotu kesi kodumutu kedolutu kesi?
  • Inyo apotu Isiraelin ogeutu aswam akaulo na kesi adolun, konye inyo apotu lu asurup kec kiswamaata?
  • Lubo angai Kagai ka Sekaria, ido inyo apotu kesi kolimokisi itunga?
  • Kanukinyo ejukara Tetanai ebalua Babulon, ido abongokinet anyoin abu ngesi kodum?
  • Inyo abu Esera iswama isisiau ngesi epud lo aitemokin eyekalu loka Edeke?
  • Inyo ejai Esera ailip kotoma aputo, ido epone bo ani abongokinere ailip ke, ido inyo isisianakin na oni?

Angiseta nuiyatakina

  • Kosiom Esera 3:1-13.

    Arai kijaun oni aboisit na emameor atukot naka itunga luka Edeke, inyo ibusakinit oni ainyikokin aiswamaenen? (Esr. 3:3, 6; Asw. 17:16, 17; Bur. 13:15)

  • Kosiom Esera 4:1-7.

    Anyunet anyoin abu Serubabel kitodiik itunga luka Yawe kanu ainyalinyal aiyuun? (Any. 34:12; 1 Kor. 15:33; 2 Kor. 6:14-17)

  • Kosiom Esera 5:1-5, 17 ka 6:1-22.

    Kanukinyo ekaruna etepegak aitapaikin adukoi naka eyekalu? (Esr. 5:5; Isa. 54:17)

    Epone ani isinyikokina aswamisiot naka imakio luka Iyudayan imakio lu Kristayon amoot aitetenio naka Yawe ne ejaar aitepegio? (Esr. 6:14; Sab. 32:8; Rom. 8:31; Yak. 1:5)

  • Kosiom Esera 8:21-23, 28-36.

    Eroko oni egeuna adioswamisiot, Anyoin aanyunet naka Esera na ibusakinit oni atupar? (Esr. 8:23; Sab. 127:1; Awa. 10:22; Yak. 4:13-15)