Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 79: Daniel Kaipany Naka Ingatunyo

Aitetemet 79: Daniel Kaipany Naka Ingatunyo

ITUKWII! Itukwii! Etakani bala ejai Daniel ationis naepol. Konye mam ingatunyo isiriebete nges! Ijeni ijo kanukinyo? Ingai bo ebwaikini Daniel nee ka ingatunyo lukere? Kangicutu ber oni.

Ekabaka kwana loko Babulon erai etunganan loenyaritai Dario. Emima Dario Daniel noi naarai esiana, eco da. Kodakak Dario Daniel araut ekapoloikiniton loka ibukui kotoma ajakanut ke. Abu na koinak luce itunga aikokotikin Daniel, ido kiswamata kwanata.

Dario

Apotu koloto nejai Dario kosodete atemar: ‘Kicamanar sio, Wu ekabaka, ebe ibusakinit ijo aiswamaun ekisil loebala ebe adaun aparasia 30 mam yenilipi nejai edeke ece kere arai itunganan icie kere dimarai neijai ijo, Wu ekabaka. Yenemengerikini, ibusakinit acakakin toma aipany naka ingatunyo.’ Mam Dario ejeni inyobo ekototor itunga lu ekisil lo kiswamaunai. Konye eomit ngesi ebe ejok aomisioit, aso kibwaik ekisil toma aiwadikaet. Kwana mam bobo ekisil lo ijulakin.

Kisisiau Daniel nuekisil abu kolot ore ailip, kwape lem duc. Ajenete itunga lu akarokok ebe, mam Daniel epalar ailip nejai Yawe. Eyalamas, naarai asubit bala akeceinerun amudiar Daniel eswamai.

Kisisau Ekabaka Dario kanukinyo akototor itunga lu aiswamaun ekisil lo, abu kokadak. Konye mam epedori aijulakin ekisil, aso ajai nges aicorakin Daniel kocakakinai toma aipany naka ingatunyo. Konye kolimok ekabaka Daniel ebe: ‘Amuno eong Edeke kon loijanakini, iyuuni ijo.’

Kokadak Dario noi mam abu ojotoor akware ngin. Tupuruc sek abu oker aipany naka ingatunyo. Ipedori ijo aanyun nges. Kodelor Dario: ‘Daniel, ekejaanakinan loka Edeke! Epedorit kereka Edeke loijaanakin ijo aitajar ijo kanejaas ingatunyo?’

Ejai Daniel toma aipany ingatunyo

Kobongok Daniel: ‘Abu Edeke kijuk ekemalaika, itubuta aituke nuka ingatunyo, aso mam kesiriebito eong.’

Kolakar ekabaka noi. Kicorak alemun Daniel kaipany. Kosodi acakakin itunga ngul luatamitos a mudiar Daniel nejaas ingatunyo. Neperinga kes kedolo kwap kaipany, ikamarete ingatunyo abilibilar akojokec kere.

Kosodi Ekabaka Dario aiwadikakin itunga kere kotoma ajakanutuke: ‘Ecorakit ebe ngin itunganan ibusakinit ayongite Edeke loka Daniel. Isomai nuaumokin. Abu koyu Daniel tetere mam ingatunyo enyamate.’

Daniel 6:1-28.



Angiseta

  • Ingai bo Dario, ido epone ani esesena ngesi Daniel?
  • Inyo apotu itunga icie luekokote koinakis Dario aswam?
  • Inyo abu Daniel iswama akaulo na ngesi aisisiaun nuekamunitos ekisil loitetet?
  • Kanukinyo akadakinitos Dario noi kiton ajoo aimen, ido inyo abu ngesi iswama atupuruc natupakini?
  • Epone ani abu Daniel kobongokina Dario?
  • Inyo abu kotakanik itunga luaroko luatamitos aiyar Daniel, ido inyo abu Dario kiwadikak itunga ke kere kotoma ajakanut ke?

Angiseta nuiyatakina

  • Kosiom Daniel 6:1-28.

    Epone ani isitoikina oni ainerun naka ebotet nejai Daniel nuetamitos etepegak aswam kanu aitikokin aswam naka Ajenak luka Yawe lolo? (Dan. 6:7; Sab. 94:20; Isa. 10:1; Rom. 8:31)

    Epone ani epedoriata ijanakinak luka Edeke aputor Daniel kotoma apaikin inonokikit ‘lueyaito’ lolo? (Dan. 6:5, 10; Rom. 13:1; Asw. 5:29)

    Epone ani ipedoria oni atupakin aanyunet naka Daniel na ‘aijaanakin Yawe tiritir’? (Dan. 6:16, 20; Pil. 3:16; Apu. 7:15)