Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 78: Aiwadik Naakan Ejai Arwatat

Aitetemet 78: Aiwadik Naakan Ejai Arwatat
Aiwadik naakan ejai arwatat

ANYOIKA bo iswamas kane? Ejaas itunga opucit. Enyaraut ekabaka loko Babulon ijaka elukumit. Itosomaete aikopon nuka esabu ka aikopon nuka epuesa ka abakulin luayangario koyekalu loka Yawe loejai Yerusalem. Konye, kanepekanen, kotakanut ibokor luka akan naka etunganan kosodi ageun aiwadik arwatat. Ngin itunganan kere akurianar.

Belesasar ka ipejok ke

Belesasar, etatait loka Nebukadenesar, nes kwana erai ekabaka. Kiworo aitolomun itunga luka coa. Kobala ekabaka ebe: ‘Ngin yenepedori asiomun nuiwadikatai nu ka alimokin eong apoloikec, einakinio ainanakineta luipu ido itaraunio ekayaiton lokiwuniet loka ajakanut.’ Konye mam itunga lukacoa epedorete aisiom nuiwadikatai arwatat karaida alimun apoloukec.

Kopupuni totoke ekabaka ecelet kosodi alomun togo loka epucit. Kolimok ekabaka ebe: ‘Mam iyalongongoi. Ejai etunganan toma ajakanutukon loejeni idekesio lukalaunak. Kapak naraar papaakon Nebukadenesar ekabaka abu kitarau nges ekapolon loka itunga luka acoa. Erai ekekiror Daniel. Konyarau ngesi, ido ilimokini ngesi ijo apolou nanu kere.’

Kanepekanen konyaraunai Daniel toma togo. Akaulo naigir ainakineta, abu Daniel kitatam kanukinyo alemaria Yawe Nebukadenesar papaake Belesasar kotoma araut ekabaka. ‘Apoga ngesi noi,’ ebala Daniel. ‘Ido abu Yawe itisilana ngesi.’

Kolimok Daniel Belesasar: ‘Konye ijo kijeni kere nuapotu kotakanikis nges, konye iringa ipoga kwape kolo Nebudkadenesar. Kiyaunit akopon ka abakulin koyekalu loka Yawe kosodi amasia. Ibu kiturite idekesio luka akito ka amor, mam ibu koinak Lokisubi angosibib. Nuu kes ejukunia Edeke akan aiwadik akiro nu.’

‘Nu kes iwadikatai,’ ebala Daniel: ‘MENE, MENE, TEKEL ka UPARASIN.’

‘MENE apolouke ebe abu Edeke kimar aparasia nuka ajakanut kon, kitanang da. TEKEL apolouke ebe kitemitoi jo kaitemisioit ido itakanu mam ijokuna. UPARASIN apolouke ebe einakinio akonijakanut Imedin ka Iperesian.’

Nepe eringa Daniel inera, kogeunete Imedin ka Iperesian asurokin Babulon. Apotu ikamutu ere ka aiyar Belesasar. Nuiwadikatai arwatat araunos abeit akware ngipengin! Konye inyo do kwana iswamaikin itunga luka Isirael? Ibuni angicun katipet, konye aanyutu ber nuiswamakinos Daniel.

Daniel 5:1-31.



Angiseta

  • Inyo abu otakan ni etemokinitor ekabaka lo Babulon epucit kosodi aitosom akopon ka abakulan nu ayangaritai ko Yekalu loka Yawe loajai Yerusalem?
  • Anyoika abu Belesasar kolimok lukacoa ke, konye inyo mam kesi apedorete aswam?
  • Anyoika abu totoke ekabaka olimokin ngesi aswam?
  • Kotoma akiro nu alimokini Daniel ekabaka, kanukinyo ejukunitor Edeke akan aiwadik arwatata?
  • Epone ani abu Daniel kitetema apolou na akiro nuewadikaatai arwatat?
  • Anyoika nu apotu otakanutu nepe eroko Daniel inera?

Angiseta nuiyatakina

  • Kosiom Daniel 5:1-31.

    Kitiriam akuriau na ayongit Edeke kede akuriau na abu odoik Belesasar keanyu ngesi awaidikaet arwatat? (Dan. 5:6, 7; Sab. 19:9; Rom. 8:35-39)

    Epone ani abu Daniel itoduna atiting napol noi ne eneratar ngesi kede Belesasar ka ijakake? (Dan. 5:17, 18, 22, 26-28; Asw. 4:29)

    Epone ani itopoloritor Daniel isula 5 epugae loka Yawe? (Dan. 4:17, 25; 5:21)