Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetmet 76: Amudiar Yerusalem

Aitetmet 76: Amudiar Yerusalem

ERAI kwana adepar ikar 10 ageun ne ayangara Ekabaka Nebukadenesar idwe luka Isirael luesisianakinitai ejok Babulon. Konye kwana koany nuiswamasi! Ejakai aicwear Yerusalem. Ido idwe luka Isirael lumam aponi kowari, kesi lu eyangaro Babulon kwape isubei.

Kiitu, nu nesi ekwenyarit enabi loka Yawe ebe epote atakanun arai mam kesi ijulakinete irotin kec luaroko. Konye mam idwe luka Isirael apotu opupokisi inabin. Apotu kiyatakisi aamaenen idekesio lukaisab itia Yawe. Adolit do atisilar itunga. Ijeni oni nu naarai elimokinit oni Esekiel enabi loka Edeke iboro luaroko lu eswamaenenete idwe luka Isirael.

Ijeni ijo, ingai bo Esekiel? Arai nges ediopet katumunak lu ayangarit Ekabaka Nebukadenesar Babulon ikar 10 eroko amudiaro naa nati naka Yerusalem iswanauna. Apaarasia ngupengun ayangaritere Daniel, ka ipaupake iuni Sadurak, Mesak ka Abedenego Babulon.

Eroko Esekiel ejai Babulon, abu Yawe kitodik ngesi iboro luaroko lueswamasi ko Yerusalem, oyekalu. Eswamai Yawe nuu kotoma aitapoet. Ajai cut Esekiel Babulon, konye abu Yawe kisipedo nges aanyun nginibore kere yen eswama oyekalu. Ido etukuranete nu abu Esekiel koany!

Kobala Yawe Esekiel ebe: ‘Koany iboro luketale luiswamaete itunga oyekalu. Koany, arwatat inomitai aputosia nuka imunuo ka itiang ice. Ido koany idwe luka Isirael emaete kesi!’ Opedo Esekiel aanyun iboro lu kere ido iwadik lueswamasi.

Anyou ekodet loka Isubei ko Yerusalem

Kingit Yawe Esekiel ebe: ‘Iseseni ijo nuiswamaete engarenok luka Isirael kotoma aiyeya? Eebo, apedori ngesi anyun nuda. Ajaasi ikiliok 70, ido kesi kere amaete idekesio lukaisab. Kobalas ebe: ‘Mam Yawe itei oni. Ajalaki ngesi akwap.’

Kosodi Yawe aitodikin Esekiel angor ace korute loka agolitomei loka etogo loka ejakait. Eboete kesi angina emaete Tamus edeke lokaisab. Ido koany itunga ngul luejaasi alomaret naka eyekalu loka Yawe! Eraasi kesi 25. Koanyu Esekiel kesi. Ekukosi kesi iteete iretakec kide ido komaete akolong!

Kobala Yawe ebe: ‘Mam itunga lu anyongito eong. Mam kesi iswamaete iboro luarokok bon konye apotu oyekaluka ka aswam ngun da!’ Kisumun Yawe ebe: ‘Epote kesi apupun apedor na anyunyuraka. Ido mam esionei kesi ne emudiarere.’

Arai akaulo na ikar iuni bon ageun ne etodikina Yawe Esekiel iboro lu nesi epalikinata idwe luka Isirael Ekabaka Nebukadenesar. Abu do ngesi kolot aitiji kesi. Akaulo na ekaru ka atutubet, apotu Ikaludean opedosi abilar arwatatin luko Yerusalem kosodete aicweikin ere kwap. Koari itunga luipu ido ice aponi koyangarai kwape isubei Babulon.

Kanukinyo acamakina Yawe amudiaro naerono kana atakanikin idwe luka Isirael? Eebo naarai mam kesi apotu apupokisi Yawe ido mam apotu korimasi ikekisila. Itodunit na ebe erai ibore yen epol noi oni duc aswam nu ebala Edeke.

Kotoma ageunet, aponi ocamakinai itunga idis bon aiboinen kotoma akwap naka Isirael. Abu Ekabaka Nebukadenesar kodakak eyudayat lo anyaritai Gedalia ayait kes. Konye apotu ice kodwe luka Isirael koarata Gedalia. Kokuriakata kwana itunga ebe epote Ikaludean amudiar kesi naarai eswamaun ibore yeni aronon. Aso apotu kobuikis Yeremia aimorikikin kakes kosodete akerit alomar akwap nako Misiri.

Koinak do na akwap na Isirael epaikini emame idiotunganan cut. Amamei idio itunganan yen eboie kotoma akwap adaun ikar 70. Asil cut. Konye esumunit Yawe ainyakun iketunga akwap na akaulo na ikar 70. Konye do, inyo eswamanakin itunga luka Edeke kakwap naka Babulon ne ayangaritai kesi? Kaanyutu.

2 Ikabakan 25:1-26; Yeremia 29:10; Esekiel 1:1-3; 8:1-18.



Angiseta

  • Inyo ejai atakanikin Yerusalem ka idwe luka Isirael kwape itodunitere kotoma aputo?
  • Ingai bo Esekiel, ido inyoika iboro luetukurianete luabu Yawe kitodik ngesi?
  • Kwape mam idwe luka Isirael anyongitotor Yawe, inyo abu nges kisumunik kesi?
  • Inyo abu Ekabaka Nebukadenesar iswama akaulo na idwe luka Isirael aipalikin ngesi?
  • Kanukinyo acamakina Yawe amudiaro narono na aswamakin odwe luka Isirael?
  • Opone ani ajalakinere akwap naka Isirael emamei idiotunganan ido adaun apak naetia ai?

Angiseta nuiyatakina

  • Kosiom 2 Ikabakan 25:1-26.

    Ingai bo Sedekia, inyo abu kotakanik ngesi, ido epone ani elelebikina na adwarasit na Obaibuli? (2 Ika. 25:5-7; Esk. 12:13-15)

    Ingai etepesenit Yawe kanu epali kere lo eswamat isirael? (2 Ika. 25:9, 11, 12, 18, 19; 2 Siit. 36:14, 17)

  • Kosiom Esekiel 8:1-18.

    Epone ani aputokinotor Ikristayon luesoswai kede idwe luka Isirael luaparitos lu amaete akolong? (Esk. 8:16; Isa. 5:20, 21; Yok. 3:19-21; 2 Tim. 4:3)