Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 75: Isapa Iwongon ko Babulon

Aitetemet 75: Isapa Iwongon ko Babulon

ABU Ekebaka Nebukadenesar koyanga idwe luka Isirael luesisianakinitai ejok kere Babulon. Akaulo kangun, abu ekabaka koseunun kotoma kec isap luibusiak ido itemelasi. Iwongon kalu kesi isap luitei ijo kane. Ediopet ngesi Daniel ido luce iuni apotu itunga luko Babulon, konyarata, Sadurak, Mesak ka Abednego.

Itemok Nebukadenesar aitutuor isap lu aijaanakin otogoke lokajakanut. Akaulo na aitutuor adaun ikar iuni, ebuni ngesi aseun ngul lu eberiang aingarakin ngesi aitemonokin atiokisio. Akoto ekabaka isapa korasi luegogong ido kongaleete ejaasi kesi toma aitutuoro. Aso abu kicorak ikejaanakinak ebe, ebusakinit kesi ainakin lu kere inyamat ka ebino loedumunei ngesi ka ekaleke.

Daniel, Sadurak, Mesak, ka Abednego itetemete aiyuun kec

Kosesen atumunan lo enyaritai Daniel. Ijeni ijo nuejai ngesi alimokin Asupenas ekapolon loka ijaanakinak luka Nebukadenesar? Ejai Daniel alimokin ngesi ebe, mam nesi ekoto ainyam inyamat lukomesa ekabaka luejokak. Konye iyalongongi Asupenas. Ebala ebe: ‘Itemokinit ekabaka luebeit yesi ainyam ka aimat. Ido arai mam yesi ingaleete kwape atumunak luce, epedori ngesi acepak aiyar eong.’

Abu Daniel kolot nejai eteon lo adakakinit asupenas ayait ngesi ka ipaupake iuni. Kobala ebe: ‘Kengaingait kitem ber ikonibulesin apaarasia 10 koinanakinete sio idiasio lukwii ainyam ka akipi da aimat. Kosodi konyet aitirian isio ka luce ikatumunak luenyamenenete inyamat luka ekabaka, ido koany luangai ejokuka.’

Kocam eteon aswam nu. Ido edaunos apaarasia 10, kongaleete awate nuka Daniel ka ipaupake iuni aitelekaarit atumunak luce. Kocamak do eteon kesi ainyikokin anyamenen idiasio lukwii itia inyamat lu etemokinit ekabaka.

Konyangarai atumunak kere akaulo na adaunotor ikar iuni ne ajai Nebukadenesar. Akaulo na ainer kakes kere, kodum ekabaka ebe Daniel ka ipapero ke iuni araasi luaberiang. Abu koyanga kesi aibwaikin togoke loka ajakanut. Ido duc ne engisenena ekabaka Daniel, Sadurak, Mesak ka Abedenego aingiseta araibo akiro nuetioko, ajenete irwan 10 adepar imurwok ka ikasupok ke.

Daniel 1:1-21.



Angiseta

  • Lubo angai isapa iwongon luejaasi toma aputo, ido kanukinyo ejaatar kesi Babulon?
  • Anyoika aitemonokineta nuejaatar Nebukadenesar kanuka isapa ngul iwongon, ido anyoika acoreta nu ainaki ngesi ikejaanakinak?
  • Alipan na aingit ani nabu Daniel koinak naikamunit inyamat ka imatan kanuke ka ipupake iuni?
  • Akaulo na anyamenen idiasio lukwii adaun apaarasia atomon, epone ani ajaar Daniel ka ipaupake iuni itiriani kede atumunak luce?
  • Opone ani adoluna Daniel ka ipaupake iuni togo loka ekabaka, ido opone ani ajokatar kesi adepar imurwok ka ikasupok?

Angiseta nuiyatakina

  • Kosiom Daniel 1:1-21.

    Agogong na ikoni ai ekotoi arai ikoto oni aitepeg acodununeta ka aipikor akalanyanut? (Dan. 1:8; Age. 39:7, 10; Gal. 6:9)

    Kopone ani acepak epedorere acodun araibo abuikin atumunak adiakar kotoma anu eomitos ice ebe “inyamat”? (Dan. 1:8; Awa. 20:1; 2 Kor. 6:17-7:1)

    Anyoika nu ingarakinete oni akiro nuka Obaibuli nukamunitos atumunak iwongon luaraasi Iburanian amisikin kanu aisisia aijen naka akwap? (Dan. 1:20; Isa. 54:13; 1 Kor. 3:18-20)