Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 74: Etunganan Lomam Akuriana

Aitetemet 74: Etunganan Lomam Akuriana

KOANY itunga lu ejaasi akwenar atumunan lo. Ijeni ijo ingai bo ngesi? Erai ngesi Yeremia. Erai nges enabi loepol noi loka Edeke.

Ekwenatar itunga Yeremia

Akaulo na Ekabaka Yosia ageun amudianar aputosia kotoma akwap, abu Yawe kolimok Yeremia araun Ekenabi. Konye, aomit Yeremia ebe adit nges, mam apedori araun enabi. Abu Yawe kotema ebe ebuni aingarakin ngesi.

Kolimonok Yeremia itunga ajalakin aswam iboro luarokok. Kobala ebe: ‘Idekesio luemaete itunga lukakwapin eraasi lukaisab.’ Konye idwe luka Isirael luepu etojokaritos aima aputosia itia aima Yawe Edeke lokabeit. Kelimok Yeremia itunga ebe, ebuni Edeke aitisilaar kesi kanu aronis kec, akwenatar ngesi akwenar.

Kotuboros ikar. Kotwana Yosia, ido akaulo na ilapio iuni, koraun Yekoiakim okokuke ekabaka. Kinyikokinite Yeremia alimonokin itunga ebe: ‘Emudiaro Yerusalem arai mam yesi ijalakinete irotin kus luarokok.’ Kikamutu isasedotin Yeremia kosodete ataanuun ebe: ‘Ibusakinit aiyar ijo kanu ener akiro nu.’ Ido kolimokis ikapolok luka Isirael ebe: ‘Ibusakinit Yeremia atwanare naarai adwaraki erewok aronis.’

Inyoin do ebuni Yeremia aswam kwana? Mam ngesi ekuriana! Kolimok kesi kere ebe: ‘Yawe ngesi ejukunit eong alimokin yes akiro nu. Arai mam yesi ijulakinete irotin kus lukarokok luka aijar, emudiari Yawe Yerusalem. Konye kojenutu kereka yesi: Arai kiyarata eong, iyarete etunganan lomam iswamat aronis.’

Kojalakis ikapolok Yeremia ejari, konye mam idwe luka Isirael apotu ijulakinos korotin kec. Akaulo, kobu Nebukadenesar, ekabaka loko Babulon aitiji Yerusalem. Kopedo Nebukadenesar aitaraun idwe luka Isirael ikebulesin. Abu koyanga ilukumin luipu Babulon. Aso, koomoom epone lo ejaunor arai eyangasi itunga luegelaka ijo anyoun orekon kiton akwap ace naegelara!

Yeremia 1:1-8; 10:1-5; 26:1-16; 2 Ikabakan 24:1-17.



Angiseta

  • Ingai bo atumunak loejai toma aputo?
  • Anyoika aomit Yeremia kanu ngesi araun enabi, konye anyoika abu Yawe kolimok ngesi?
  • Akiro anyoika abu Yeremia kinyikok alimonokin itunga?
  • Epone ani apotu isasedotin otamatar aitikokin Yeremia, konye epone ani abu nges itoduna ebe mam ngesi ekuriana?
  • Inyo abu iswamaun kengeroto idwe luka Isirael aijulakin irotin kec luaroko?

Angiseta nuiyatakina

  • Kosiom Yeremia 1:1-8.

    Kwape itodunitor aanyunet naka Yeremia, inyo itogogongori itunganan kanuka aswam naka Yawe? (2 Kor. 3:5, 6)

    Asinyikokinet anyoin einakit aanyunet naka Yeremia atumunak Lukristayon lolo? (Lim. 12:1; 1 Tim. 4:12)

  • Kosiom Yeremia 10:1-5.

    Anyoin aitupuset nagogong nabu Yeremia itosom aitoduna abanganut na amunokina aputosia? (Yer. 10:5; Isa. 46:7; Kbk. 2:19)

  • Kosiom Yeremia 26:1-16.

    Ne ikwenyanaratar itunga, epone ani ericitotor luideuna luinyonyoikinitai aicorakinet naka Yawe nejai Yeremia ebe ‘sirikimunon adiokirot’ otaon kec? (Yer. 26:2; Ikis. 4:2; Asw. 20:27)

    Aanyunet anyoin najokan na ijaikinit Yeremia Ajenak luka Yawe lolo, kotoma alimonokin aikwenyanareta luka Yawe nejaasi atekerin? (Yer. 26:8, 12, 14, 15; 2 Tim. 4:1-5)

  • Kosiom 2 Ikabakan 24:1-17.

    Anyoika nukarokok nuopotu kotakanutu akaulo na Yuda aipalikin Yawe? (2 Ika. 24:2-4, 14)