Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 72: Kingarak Edeke Ekabaka Kesekia

Aitetemet 72: Kingarak Edeke Ekabaka Kesekia

IJENI ijo kanukinyo ejaar etunganan lo ailip nejai Yawe? Kanukinyo epesikinitor ngesi ibaluan luu ngaren naka etem loka Yawe? Erai etunganan ngol Kesekia. Erai ngesi ekabaka loka ajakanut na engalakimak na atekerin aarei nuka Isirael. Ejai ngesi toma ationis naepol noi. Kanukinyo?

Ejai Ekabaka Kesekia ilipi

Naarai adautu ajoresio nuka Asuria amudiar atekerin 10 nuka agolitomei. Abu Yawe kocamak nu atakanun naarai aroko itunga ngul noi. Ido kwana, ebunitos ajoresio nuka Asuria aitiji ajakanut na atekerin aarei.

Ijukunit ekabaka loka Asuria ibaluan nejaai Ekabaka Kesekia. Lu kes ibaluan lu epesikinit Kesekia nee, ngaren naka Edeke. Imuaritos ibaluan lu Yawe ido elimokinitos Kesekia aikiar akan. Nu kes ejaar Kesekia ailip: ‘Wu Yawe, koyuwa sio kakan naka ekabaka loka Asuria. Nges do ejenunatar atekerin kere ebe ijo bon nges Edeke.’ Ebuni kereka Yawe apupokin Kesekia?

Erai Kesekia ekabaka loajokan. Mam ngesi eputosi kede ikaban luarokok luka ajakanut na atekerin 10 nuka Isirael karaida papake Ekabaka Akas. Acoikinit Kesekia duc arimarit ikisila kere luka Yawe. Edau Kesekia ailip, abu enabi Isaia kijukak ngesi akirot na kama ejai Yawe: ‘Mam cut ekabaka loka Asuria elomuni Yerusalem. Emamei ediopet kosilikaaleike lo ikunyuni osiepuke. Mam cut egumunete ediomale ore.’

Koany aputo na ejai toma apapula na. Ijeni ijo luangai isilikaalei luetwakito kere luu? Erasi kesi luka Asuria. Abu Yawe kijuk ekemalaika, ido kakware adiopet, abu emalaika kowara isilikaalei luka Asuria 185,000. Kojalak ekabaka loka Asuria ejie kosodi abongor oreke.

Isilikaalei Iuetwakito Asuria

Aponi koyuarai ajakanut naka atekerin aarei, kosodete itunga ajaun kede ainapakina adaun apak naedit. Konye etwana Kesekia, abu Manase okokuke oraun ekabaka. Manase ka okokuke Amon kere araasi ikabakan lu aroko noi. Aso ilelebun epali ka amumu toma akwap. Eyarata Ekabaka Amon ikejaanakinak, aponi itaraunai Yosia okokuke ekabaka loka ajakanut na atekerin aarei.

2 Ikabakan 18:1-36; 19:1-37; 21:1-25.



Angiseta

  • Ingai bo etunganan lo ejai toma aputo, ido kanukinyo ejaar ngesi toma ationis naepol?
  • Inyoika ibaluan lu apesikit Kesekia ngaren naka Edeke, ido anyoika nu ilipi Kesekia?
  • Erai Kesekia ekabaka lo ikoni ai, ido anyoika akiro nu ejukaki ngesi Yawe itosomai enabi Isaia?
  • Inyo abu emalaika loka Edeke iswamaik ajiok luka Asuria kwape itodunitere kotoma aputo?
  • Karaida abu ajakanut naka atekerin aarei odum ainapakin adaun apak naeuriana, inyo abu otakan akaulo na atwania Kesekia?

Angiseta nuiyatakina

  • Kosiom 2 Ikabakan 18:1-36.

    Epone ani atamitor Rabasake, eraban loka Asuria aitonokokar aiyuun naka idwe luka Isirael? (2 Ika. 18:19, 21; Any. 5:2; Sab. 64:3)

    Epone ani etupakinatar Ajenak luka Yawe aanyunet naka Kesekia ne itepegere kesi? (2 Ika. 18:36; Sab. 39:1; Awa. 26:4; 2 Tim. 2:24)

  • Kosiom 2 Ikabakan 19:1-37.

    Epone ani aputorotor lolo itunga luka Yawe ka Kesekia kotoma apak naka aburuun? (2 Ika. 19:1, 2; Awa. 3:5, 6; Bur. 10:24, 25; Yak. 5:14, 15)

    Anyoika ameneta auni nuabu Ekabaka Senakerib kodum, ido ingai itupusit ngesi kotoma adwaretait? (2 Ika. 19:32, 35, 37; Apu. 20:2, 3)

  • Kosiom 2 Ikabakan 21:1-6, 16.

    Kanukinyo ebalare ebe Manase ngesi ekabaka lo aronon akere aipuga Yerusalem? (2 Siit. 33:4-6, 9)