Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 70: Yona Ka Agar Nati

Aitetemet 70: Yona Ka Agar Nati

KOSESEN etunganan lo ejai toma akipi. Ejai toma ationis naepol noi, mam kereka cut? Edodor agar ngin ailikor ngesi! Ijeni ijo, ingai bo etunganan ngol? Erai ekekiror Yona. Aso kaanyutu epone lo alomara ngesi toma ationis na.

Erai Yona enabi loka Yawe. Akaulo na apak adio edau enabi Elisa atwanare, abu Yawe kolimok Yona ebe: ‘Kolot Ninebe ere ngol loepol. Aronis naka itunga lukangina epol noi, ido akoto eong ijo ainerakin kakes nuikamunitos nu.’

Yona ka agar nati

Konye mam Yona akoto alosit. Kodum ataker nalosi aibelokit Ninebe epur. Mam Yawe alakara Kede Yona kanu akerit awai. Abu Yawe kijuk ekwam loepol. Kiyatakin ekwam noi kangolol, koyapiei do ataker alumor. Kokuriata ekwangak noi, kiwone nginitungan ekedeke kanu aingarakinio.

Kosodi do Yona alimokin kes ebe: ‘Arai eong amaan loka Yawe, Edeke loesubit akuj ka akwap. Ido ajai eong akerit awai ainac aswam na ijaikinit Yawe eong aswam.’ Kingita ngesi ekwangak ebe: ‘Anyoika ibusakinit isio iswamaikin ijo tetere angolol iyamakin?’

Kobala Yona ebe: ‘Kocakakis eong toma angolol, kwangin iyamakinor angolol.’ Mam ekwangak akotosi aswam ngun, konye kiketakin ekwam aronioar, apotu do kesi kocakutu Yona kinga naka ataker. Atipet kopaik ekwam, kiyamakin angolol bobo.

Kwape ajaar Yona alumor toma akipi, kobu agar nati kiliko nges. Konye mam abu kotwana. Adaun apaarasia auni ka akuaresia auni, ajai nges toma akoik naka agar kangin. Kitasonikin Yona noi naarai mam ngesi abu orima Yawe alosit Ninebe. Ijeni ijo nuabu ngesi iswama?

Abu Yona kilip nejai Yawe kanu aingarakinio. Kosodi Yawe ainakin agar alekakin Yona toma akwap neonit. Akaulo kangin abu Yona kolot Ninebe. Mam kereka na isisianakini oni ebe ibusakinit aswam kere nuebala Yawe?

Eitabo lo Obaibuli loka Yona.



Angiseta

  • Ingai bo Yona, ido inyo abu Yawe kolimok ngesi aswam?
  • Naarai mam ngesi akoto alosit ne alimokinit Yawe ngesi, inyo abu Yona iswama?
  • Anyoika nu abu Yona olimok ekwangak aswam tetere ekwam lo angolol iyamakin?
  • Kwape iteio ijo kotoma aputo, inyo abu kiswaun kelumo Yona akipi?
  • Apak na etia ai abu Yona kodau kakoik naka agar, ido inyo abu ngesi kiswama kangina?
  • Ai abu Yona kolot akaulo na ngesi alomun kakoik naka agar, ido inyo isisianakini na oni?

Angiseta nuiyatakina

  • Kosiom Yona 1:1-17.

    Kotoma aidelel, epone ani asesena Yona epelu ke lo alimonokin itunga luko Nenebe (Yona 1:2, 3; Awa. 3:7; Lim. 8:12)

  • Kosiom Yona 2:1, 2, 10.

    Epone ani idumuna oni amuno kanejai aitijenaret naka Yona ebe, ebongokini Yawe alipasinei wok? (Sab. 22:24; 34:6; 1 Yok. 5:14)

  • Kosiom Yona 3:1-10.

    Asinyokikinet anyoin idumuni oni opone kalo abu Yawe iyatakina aitosom Yona karaida sek abu omen ngesi ailelebikin epelu ke? (Sab. 103:14; 1 Pet. 5:10)

    Anyoika nu isisianaki oni aitijenaret naka Yona kede itunga luka ninebe nuikamunit mam atubonokin itunga ane ilimonokina oni? (Yona 3:6-9; Lim. 11:6; Asw. 13:48)