Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 69: Ingarak Ipese Etunganan Lo Agogong

Aitetemet 69: Ingarak Ipese Etunganan Lo Agogong

IJENI ijo nu inera ipese yenididi yen? Ejai ngesi alimonokin amucalat ngin nuikamunitos Elisa enabi loka Yawe, ka akiro nukaumokin nu ingarakinit Yawe ngesi aswam. Mam amucalat ngin ejeni nuikamunitos Yawe naarai mam ngesi erai adiopet kadwe luka Isirael. Aso do kaanyutu, kanukinyo ejaar ipese yen ore loka amucalat kangin.

Erai amucalat naka Suria. Erai okilenike Naaman ekapolon loka ajore naka Suria. Ekamaritos itunga luka Suria ipese yen kosodete oyangaun ngesi aijaanakin aberu naka Naaman.

Aberu Namaan ka ajanakinan ke napese

Ajaatar Naaman kede adeka naronon naenyaritai atapon. Ijaikini adeka na atutubena ace nuka etunganan atubonor awai. Aso nuu ngesi ejai ipese alimonokin aberu naka Naaman: “Arai papaka kolot nejaai enabi loka Yawe Isirael. Ti kitangaleu ngesi kataponike.” Etubor apak, aponi olimokinai okilenike aberu nuu.

Akoto Naaman angaleun noi, aso abu itemokin alosit Isirael. Kedol ngesi ngina abu kolot togo loka Elisa. Kijukak Elisa Naaman ekiyakia, alimokin nges alosit ailong Ocilet loko Yorodan irwan akanykaarei. Konye konyunyurikin Naaman, kobala ebe: ‘Itelekarito icileta luka ore icileta luka Isirael!’ Akaulo alimun nuu, kolot Naaman.

Konye kolimok ediopet kojanaakinak ke ebe: ‘Okwe papa, arai olimokinite Elisa ijo aswam naetiono, ti ijo iswama. Kwana, kanukinyo mam ijo ilongia, kwape ebalar ngesi?’ Kopupok Naaman ikejaanakinan, kijesar, kolumono Ocilet loka Yorodan irwan kanyikaarei. Edau aswam ngun, kitemokin bobo akekuan, kongaleu!

Kiyalamikin Naaman noi. Kobongo nejai Elisa, kobala ebe: ‘Kwana ajeni cut ebe, Edeke loka Isirael nges bon Edeke lokabeit kakwap kere. Aso ca kengaingait, kijaa ainakinet naka ekonikejaanakinan.’ Konye kobongok Elisa ebe: ‘Mam kejaari idiobore.’ Ajeni Elisa ebe arono ngesi aijaar ainakinet naarai arai Yawe ngesi etangaleuni Namaan. Konye Gekasi, ekejaanakinan loka Elisa, akoto ainakinet ngin kanuke.

Aso, nuu nesi abu Gekasi kiswama. Akaulo na Namaan anyoun, abu Gekasi ibwapak ngesi. Kobala Gekasi ebe: ‘Ejukunit Elisa eong mamakon ebe ekoto ice kotoma ainakinet kon kanu ainakin ipapero lu adolokis ngesi.’ Arai na cut aisab. Konye mam Namaan ajeni ebe arai na aisab, aso abu ngesi koinak Gekasi ice kotoma oboro.

Kebongo Gekasi ore, ajeni Elisa nu eswamaa ngesi. Alimokinit Yawe ngesi. Kobala ebe: ‘Naarai iswama ijo ibore yeni aronon, ebunokini ijo atapon naka Namaan.’ Ido iswamaunos ngun, kanepanen!

Anyoika isisiauni oni kotoma anu kere? Nasodit, aputosi ka ipese yenididi, kenerata nuikamunito Yawe. Eyangauni ajokis naepol noi. Nakiaret, enyeikisi apogakin kwape ka Namaan sek ber; konye ibusakinit arimarit ijaanakinak luka Edeke. Ido nakiuniet, mam ibusakinit oni aisab kwape ka Gekasi. Mam keraka oni isisiauni nuipu kotoma asiomenen Ebaibuli?

2 Ikabakan 5:1-27.



Angiseta

  • Kotoma aputo, inyo ejaai ipese ngin alimonokin amucalat?
  • Ingai bo amucalat na ejai aputo ido inyoin bo iswamai ipese kotogo loka amucalat kangin?
  • Inyo abu Elisa icorak ejaanakinanike alimokin Naaman, ido kanukinyo anyunyurikinor Naaman?
  • Inyo abu iswamaun epupoki Naaman ijaanakinake?
  • Kanukinyo angeria Elisa ainakinet naka Naaman, ido inyo abu Gekasi iswama?
  • Anyoika nu apotu iswamaikinos Gekasi, ido anyoika ipedori oni aisisiaun kane?

Angiseta nuiyatakina

  • Kosiom 2 Ikabakan 5:1-27.

    Epone ani epedora aanyunet naka ipese angin aisinyokikin atumunak lolo? (2 Ika. 5:3; Sab. 8:2; 148:12, 13)

    Kanukinyo ejokunar aitun aanyunet naka Naaman ne idumuna aicorio na elibunit Awadikaeta nukalaunak? (2 Ika. 5:15; Bur. 12:5, 6; Yak. 4:6)

    Anyoika nuipedori oni aisisiaun kotoma aitirian aanyunet naka Elisa ka Gekasi? (2 Ika. 5:9, 10, 14-16, 20; Mat. 10:8; Asw. 5:1-5; 2 Kor. 2:17)