Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 68: Isapa Iarei Lu Apotu Kojarata Bobo

Aitetemet 68: Isapa Iarei Lu Apotu Kojarata Bobo

ORAI ijo otwanite, biai ti epupuna toto nakon aanyun ijo itajaruno? Ti ngesi iyamikin noi! Konye epedori kereka itunganan yeni etwanit aijar bobo? Iswamauna kereka ngun kolosek?

Kosesen etunganan lo, aberu ka isapat yenididi. Erai etunganan lo enabi Eliya. Erai aberu apuserut nako ore Sarapet ido esapat ngesi okokuke. Adiopepaaran, abu esapat odekakin. Kiyatakin adekake noi kiton ngesi atwanare. Kolimok do Eliya aberu ebe: ‘koinakinai okokukon.’

Ejai Eliya kede apuserut na etajaruno okokuke

Kodokaria Eliya ikoku yeni atwanit agola nakokuju kosodi aiperikin aperisite. Kilip ebe: ‘Wu Yawe, kobongok bobo aijar naka ikoku kayen tomakeng.’ Kogeu esapat eiyeng! Kodaku Eliya ikoku, kijesunor kagola kwap, kobala aberu ebe: ‘Koany, ejari do okokukon!’ Ngun ngesi iyalamar totoke.

Enabi ece loka Yawe loejenen noi ngesi enyaritai Elisa. Ejaanakini ngesi kwape engarakinan loka Eliya. Etubor apak abu Yawe itosom Elisa da aswam aumonokineta. Adiopepaaran abu Elisa olot ore loanyaritai Sunem ne abu aberu ingarakina ngesi. Ketubor apak, abu aberu na kouru esapat.

Atupuruc adiopet, akaulo na ikoku yen apolor, abu kolot nejai papake loeswanai amisiri. Kodelo ikoku atipet ebe: “Akakou, akakou!” Akaulo na ainyakar ngesi ore, abu otwana. Kitakadik ngin totoke noi! Kisunyak amoun Elisa.

Kedolu Elisa, koloma agola na eperikitai ikoku yeni atwanit. Kilip ne ajai Yawe, kosodi kobuburikin akuan ikoku. Atipet komwanu akuan naka ikoku ido kikares irwan akanykaarei. Kiyalamikin totoke noi na alomuna kosodi adumun ikekoku ejari!

Itunga luipu noi atwakata. Etakadiki na ikalia kec ka ipapero kec. Imameotor oni apedor na aitajarun lukatwak. Konye ejaatar Yawe. Ibuni oni aisisiaun epone lo itajaruna ngesi itunga aritai aritai.

1 Ikabakan 17:8-24; 2 Ikabakan 4:8-37.


Angiseta

  • Lubo angai itunga iuni luejaasi toma aputo, ido inyo abu kotakanik isapat?
  • Inyo abu Eliya ilip luikamunitos esapat, ido anyoika apotu iswamaunos?
  • Ingai bo ekiror loka engarakinan ke Eliya?
  • Kanukinyo anyararere Elisa ore loka aberu najai Sunem?
  • Inyo abu Elisa iswama, ido inyo abu iswamaikin ikoku yeni atwanik?
  • Apedor anyoin ejaatar Yawe kwape itodunitere kanejai Eliya ka Elisa?

Angiseta nuiyatakina

  • Kosiom 1 Ikabakan 17:8-24.

    Epone ani etemere arimarit ka aiyuun naka Eliya? (1 Ika. 17:9; 19:1-4, 10)

    Kanukinyo araar aiyuun naka apuserut naka Sarapet naaumokina noi? (1 Ika. 17:12-16; Luka 4:25, 26)

    Epone ani itodiaritor, aitijenaret na apusenut nako Sarapet abeit nuka akiro nuenera Yesu nuiwadikatai Matayo 10:41, 42? (1 Ika. 17:10-12, 17, 23, 24)

  • Kosiom 2 Ikabakan 4:8-37.

    Anyoika isisianakini oni aberu naka Sunem kanu aisukuny ipejok? (2 Ika. 4:8; Luka 6:38; Rom. 12:13; 1 Yok. 3:17)

    Orotin anu ipedoria oni aitoduun aswamisio nukasianut nejaas ijaanakinak luka Edeke lolo? (Asw. 20:35; 28:1, 2; Gal. 6:9, 10; Bur. 6:10)