Kosomar nuejaas toma

Skip to secondary menu

Skip to table of contents

Ajenak Luka Yawe

Ateso

Eitaboka Loka Akiro Nuitetemit Ebaibuli

Aitetemet 67: Komunokina Yekosapat Yawe

Aitetemet 67: Komunokina Yekosapat Yawe

IJENI ijo luangai itunga luu ido inyoin bo iswamaete kesi? Ejaasi kesi alosit ojie ido itunga ngul luingarenitos kesi ewoete. Konye ipedori ijo aingitakin: ‘Kanukinyo mam awook etingitotor ikilenga ka akwaras kanu ajior?’ Aso kaanyutu.

Elosete isiraelin ejie

Erai Yekosapat ekabaka loka ajakanut naka atekerin aarei nuka Isirael. Ajai ngesi apaarasia nuka Ekabaka Akab ka Yesebel loka Ajakanut na atekerin 10 nuka agolitomei. Arai Yekosapat ekabaka lo ajokuna, papake da Asa arai ekabaka lo ajok. Aso kolelakis itunga luka ajakanut na atekerin aarei na engakimak aijar najokan adaun ikar luipu.

Konye kwana, eswamaun ice bore yen etukurian itunga. Kopotu lualimokinete Yekosapat ebe: ‘Ebunit ekodet loka ajore kakwapin nuka Moab, Amon ka luka Moru Seir asurokin ijo.’ Kotukokinos idwe luka Isirael Yerusalem aimo aingarakinio naka Yawe. Apotu koloto oyekalu, ido kangina, kilip Yekosapat ebe: ‘Wu Yawe Ekosideke, mam kijeni da nuibusakinit aswam. Emamei sio agogong asurokin ekodet lo loka ajore naepol. Esesenete akosikonye jo.’

Kopupok Yawe, kosodi alimokin ediopet kojaanakinak alimokin itunga ebe: ‘Mam ejie erai lokus, konye loka Edeke. Mam ibusakinit yesi ejie. Kosesenata, ido koanyutu epone lo itajara Yawe yesi.’

Aso kolimok Yekosapat itunga atupuruc na atupakin ebe: ‘Komunokinos Yawe!’ Kosodi ngesi aibwaikin awook ngaren na isilikaalei ke, ido na alosiotor kowoete aiturit Yawe. Ijeni ijo nuapotu iswamaunos eyapiosi kesi aboisit na ejie? Abu Yawe koinak ajore nasurup ajiikin bon. Kedolutu idwe luka Isirael, ngolisirikaalet kere lokasurup atwanit!

Mam kereka Yekosapat acoo amunokin Yawe? Icouni oni da arai imunokin ngesi.

1 Ikabakan 22:41-53; 2 Aisiitonokin 20:1-30.


Angiseta

  • Ingai bo Yekosapat, ido iboit ngesi kapaka ani?
  • Kanukinyo akuriakatar idwe luka Isirael, ido anyoika apotu luipu katesi iswamata?
  • Anyoin abongokinet nabu Yawe koinak kanu alipan naka Yekosapat?
  • Inyo abu Yawe koinak aiswamaun eroko ejie edolo?
  • Anyoika ipedori oni aisisiaun kanejai Yekosapat?

Angiseta nuiyatakina

  • Kosiom 2 Aisiitonokin 20:1-30.

    Epone ani etoduna Yekosapat nuibusakinit ijaanakinak luka Edete aswam neitereikinotor kesi kede ejautane loitukuriani? (2 Siit. 20:12; Sab. 25:15; 62:1)

    Kwape duc etosomaa Yawe erot loitejenunet akekiro nejaasi iketunga, enyoin erot loitosomai ngesi lolo? (2 Siit. 20:14, 15; Mat. 24:45-47; Yok. 15:15)

    Eyangau Edeke “ejie loka apaaran nakapolon naka Edeke Lokapedor kere,” epone ani aputokinor ajautene wok kede ngol loka Yekosapat? (2 Siit. 20:15, 17; 32:8; Apu. 16:14, 16)

    Anu oni aputoor kede ilebin, ipayonias ka imisionaris, eyangauni na akorakinet anyoin ne ejai alimonokin na akwap kere lolo? (2 Siit. 20:19; Rom. 10:13-15; 2 Tim. 4:2)